ໂດຍຕອບສະໜອງຕາມຄຳເຊີນຂອງສະຫາຍ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ປະຊາຊົນ ປະຕິວັດລາວ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ; ຄະນະຜູ້ແທນຂັ້ນສູງ ກະຊວງຕຳຫຼວດ ແຫ່ງ ສສ ຫວຽດນາມ ນຳໂດຍ ສະຫາຍ ພົອ ໂຕ ເລິມ ກຳມະການກົມ ການເມືອງສູນກາງພັກຄອມມູນິດ ຫວຽດນາມ ລັດຖະມົນຕີກະຊວງ ຕຳຫຼວດ ແຫ່ງ ສສ ຫວຽດນາມ ໄດ້ເດີນທາງມາຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສອງຝ່າຍ ປະຈຳປີ 2020 ໃນລະຫວ່າງວັນທີ 10-12 ກຸມພາ 2020.
ພິທີຕ້ອນຮັບຢ່າງເປັນທາງການໄດ້ຈັດຂຶ້ນໃນວັນທີ 10 ກຸມພາ 2020 ທີ່ກະຊວງ ປ້ອງກັນຄວາມສະຫງົບ ນຳໂດຍ ພົທ ວິໄລ ຫຼ້າຄຳຟອງ ພ້ອມຄະນະ; ພາຍຫຼັງສຳເລັດການຕ້ອນຮັບ ທັງສອງຝ່າຍກໍໄດ້ດຳເນີນກອງປະຊຸມສະຫຼຸບການຈັດຕັ້ງປະຕິບັດແຜນການຮ່ວມມື ປະຈຳປີ 2019 ແລະ ທິດທາງແຜນການຮ່ວມມື ປະຈຳປີ 2020 ເປັນປະທານຮ່ວມໂດຍ ສະຫາຍ ພົທ ວິໄລ ຫຼ້າຄຳຟອງ ແລະ ພົອ ໂຕ ເລິມ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ທັງສອງຝ່າຍໄດ້ແຈ້ງສະພາບ ແລະ ປຶກສາຫາລືເຊິ່ງກັນແລະກັນ, ໂດຍໄດ້ທົບທວນຄືນການຮ່ວມມືຂອງສອງກະຊວງໃນໄລຍະຜ່ານມາ, ພ້ອມທັງໄດ້ເຫັນດີເປັນເອກະພາບສືບຕໍ່ຮັດແໜ້ນການພົວພັນຮ່ວມມືໃນການຮັກສາຄວາມສະຫງົບທາງດ້ານການເມືອງ ແລະ
ຄວາມເປັນລະບຽບຮຽບຮ້ອຍທາງ ສັງຄົມໃຫ້ມີໝາກຜົນດີຍິ່ງຂຶ້ນ; ສອງຝ່າຍເຫັນດີສືບຕໍ່ຮ່ວມມືກັນໃນຂົງເຂດວຽກງານການກໍ່ສ້າງກຳລັງ ແລະ ການຊ່ວຍເຫຼືອເຊິ່ງກັນແລະກັນທາງດ້ານອຸປະກອນເຕັກນິກວິຊາສະເພາະ ແລະອື່ນໆ; ພ້ອມນີ້, ທັງສອງຝ່າຍກໍໄດ້ລົງນາມແຜນການຈັດຕັ້ງປະຕິບັດສັນຍາຮ່ວມມືວຽກງານ ປ້ອງກັນຄວາມສະຫງົບ ປະຈຳປີ 2020.
ໃນໂອກາດນີ້ ຄະນະຜູ້ແທນຂັ້ນສູງກະຊວງຕຳຫຼວດ ແຫ່ງ ສສ ຫວຽດນາມ ໄດ້ນຳເອົາເຄື່ອງອຸປະກອນວິຊາສະເພາະຈຳນວນໜຶ່ງ ມາມອບໃຫ້ກະຊວງປ້ອງກັນຄວາມສະຫງົບແຫ່ງ ສປປ ລາວ ເພື່ອນຳໃຊ້ເຂົ້າໃນວຽກງານວິຊາສະເພາະ ແລະ ໃນໂອກາດທີ່ມີຄວາມໝາຍ ສຳຄັນນີ້; ລັດຖະບານແຫ່ງ ສສ ຫວຽດນາມ ກໍໄດ້ປະດັບຫຼຽນໄຊມິດຕະພາບ ແລະ ຫຼຽນກາມິດຕະພາບໃຫ້ນາຍຕຳຫຼວດກະຊວງ ປ້ອງກັນຄວາມສະຫງົບ ທີ່ມີຜົນງານດີເດັ່ນໃນການປະກອບສ່ວນເພີ່ມພູນຄູນສ້າງສາຍພົວພັນຮ່ວມມືລະຫວ່າງກະຊວງຕຳຫຼວດ ແຫ່ງ ສສ ຫວຽດນາມ ແລະ ກະຊວງປ້ອງກັນຄວາມສະຫງົບແຫ່ງ ສປປ ລາວ ຈຳນວນ 18 ສະຫາຍ, ໃນນັ້ນ ໄດ້ປະດັບຫຼຽນໄຊມິດຕະພາບ 8 ສະຫາຍ, ຫຼຽນກາມິດຕະພາບ 10 ສະຫາຍ; ໃຫ້ກຽດປະດັບຫຼຽນ ໂດຍ ພົອ ໂຕ ເລິມ.
ຈາກນັ້ນ, ຄະນະຜູ້ແທນຂັ້ນສູງ ທັງສອງຝ່າຍ, ກໍໄດ້ເຂົ້າຢ້ຽມຂໍ່ານັບ ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ ເພື່ອເຂົ້າລາຍງານຜົນສຳເລັດຂອງການຢ້ຽມຢາມສັນຖະວະໄມຕີ ສປປ ລາວ ຂອງຄະນະຜູ້ແທນຂັ້ນສູງກະຊວງຕຳຫຼວດ ສສ ຫວຽດນາມ ແລະ ຜົນສຳເລັດຂອງກອງປະຊຸມຮ່ວມມືຂອງທັງ 2 ຝ່າຍ.
ພາບ-ຂ່າວ: ບຸນເຫຼືອ
