ທ້າຍອາທິດທີ່ຜ່ານມາ, ຄ້າຍຄຸມຂັງ-ດັດສ້າງ ແຂວງໄຊຍະບູລີ ຈັດພິທີອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດ ປະຈໍາປີ 2019 ຕໍ່ຜູ້ມີຄວາມກ້າວໜ້າໃນການປະຕິບັດລະບຽບຢູ່ໃນຄ້າຍຄຸມຂັງ-ດັດສ້າງ ໂດຍໃຫ້ກຽດເປັນປະທານຂອງ ທ່ານ ຍັນຍົງ ສີປະເສີດ ຮອງເຈົ້າແຂວງໆໄຊຍະບູລີ ປະທານຄະນະກໍາມະການອະໄພຍະໂທດແຂວງ. ມີຕາງໜ້າຈາກບັນດາພະແນກການອົງການທີ່ກ່ຽວຂ້ອງ, ແຂກຮັບເຊີນຈາກອໍານາດການປົກຄອງບ້ານ, ຍາດພີ່ນ້ອງຂອງນັກໂທດ ແລະ ນັກໂທດຜູ້ ທີ່ຖືກຜ່ອນໂທດເຂົ້າຮ່ວມ.
ທ່ານ ສົມເພັດ ຫຼຽນທອງ ຫົວໜ້າອົງການໄອຍະການປະຊາຊົນແຂວງໄຊຍະບູລີ ໄດ້ຂຶ້ນຜ່ານລັດຖະດໍາລັດຂອງ ປະທານປະເທດ ວ່າດ້ວຍການອະໄພຍະໂທດ-ຫຼຸດຜ່ອນໂທດ ໃຫ້ນັກໂທດທີ່ມີຄວາມກ້າວໜ້າໃນຂອບເຂດທົ່ວປະເທດ ເນື່ອງໃນໂອກາດວັນຊາດທີ 2 ທັນວາ ຄົບຮອບ 44 ປີ. ໃນນີ້. ຢູ່ຄ້າຍຄຸມ ຂັງ ແຂວງໄຊຍະບູລີ ມີນັກໂທດທີ່ໄດ້ ຮັບການອະໄພຍະໂທດຫຼຸດຜ່ອນໂທດ ມີຈໍານວນ 81 ຄົນ ຍິງ 10 ຄົນ ແລະ ອະໄພຍະໂທດປ່ອຍຕົວກ່ອນກໍານົດ ຈໍານວນ 3 ຄົນ.
ພິທີດັ່ງກ່າວ, ທ່ານປະທານຄະນະກໍາມະການສານອະໄພຍະໂທດຂັ້ນແຂວງ ໄດ້ໃຫ້ກຽດໂອ້ລົມ, ສຶກສາອົບ ຮົມ ແລະ ໃຫ້ທິດເຍືອງທາງແກ່ນັກໂທດ ຜູ້ທີ່ຖືກອະໄພຍະໂທດ – ຫຼຸດຜ່ອນໂທດ ຈົ່ງສືບຕໍ່ປະຕິບັດກົດລະ ບຽບຂອງຄ້າຍຄຸມຂັງໃຫ້ເຂັ້ມງວດ, ຕັ້ງໜ້າຝຶກຝົນຫຼໍ່ຫຼອມ, ສ້າງຕົນເອງນັບແຕ່ການຄິດດີ, ປະພຶດດີ ແລະ ເປັນແບບຢ່າງທີ່ດີ ເພື່ອໃຫ້ໄດ້ຮັບການອະໄພຍະໂທດປ່ອຍຕົວໃນຄັ້ງຕໍ່ໄປ.
