ໃນປີນີ້, ຄະນະ ກອງພັນ 207 ກອງບັນຊາການປ້ອງກັນທີ່ຕັ້ງ ກະຊວງ ປກສ ຈະສືບຕໍ່ປ້ອງກັນເວນຍາມ ແລະ ປະຈໍາການກຽມພ້ອມສູ້ຮົບຕະຫຼອດ 24 ຊົ່ວໂມງ ໂດຍຕິດພັນກັບການຝຶກອົບຮົມວຽກງານວິຊາສະເພາະໃຫ້ພະນັກງານ-ນັກຮົບ ມີເຕັກນິກໄຫວພິກ ແລະ ມີຄວາມຊໍານານບັນຈຸກຳລັງຕົວຈິງສັບຊ້ອນເຂົ້າບັນດາຈຸດປ້ອງກັນໃຫ້ມີຄວາມພຽງພໍ.
ພັທ ບົວພາ ໝື່ນສຸພົມ ຮອງຫົວໜ້າກອງພັນ 207 ກ່າວໃນກອງປະຊຸມສະຫຼຸບວຽກງານ ປະ ຈໍາປີ 2019 ແລະ ທິດທາງແຜນການປີ 2020 ໃນວັນທີ 12 ກຸມພາ 2020 ເປັນປະທານໂດຍ ພັທ ຄໍາພູມີ ດີມາກ ຫົວໜ້າກອງພັນ 207; ເຂົ້າຮ່ວມໂດຍ ພັອ ປອ ທອງແດງ ຄໍາພິທູນ ຮອງຫົວໜ້າກອງບັນຊາການປ້ອງກັນທີ່ຕັ້ງວ່າ: ໃນປີນີ້, ຄະນະກອງພັນ 207 ຈະສືບຕໍ່ປ້ອງກັນເວນຍາມ ແລະ ປະຈໍາການກຽມພ້ອມສູ້ຮົບຕະຫຼອດ 24 ຊົ່ວໂມງ ໂດຍຈະສ້າງເປັນແຜນນໍາພາຝຶກອົບຮົມວຽກງານວິຊາສະເພາະໃຫ້ກຳລັງຢ່າງຕໍ່ເນື່ອງ ເພື່ອເຮັດໃຫ້ພະນັກງານ-ນັກຮົບມີຄວາມຮັບຮູ້ທາງດ້ານທິດສະດີ ແລະ ມີຄວາມສາມາດ, ມີເຕັກນິກໄຫວພິບ, ມີຄວາມຊໍານິຊໍານານທາງດ້ານວິຊາສະເພາະ; ເປັນຕົ້ນແມ່ນວິທີການສອບສວນຂັ້ນຕົ້ນ, ວິຊາງົດງາມ 13 ຈັງຫວະມືເປົ່າ, ຮູບແຖວໝວດ ແລະ ຮູບແຖວໝູ່ ພ້ອມທັງສືບຕໍ່ກວດກາແຜນບັນຈຸກຳລັງ ແລະ ກຳລັງຕົວຈິງ ເພື່ອບັນຈຸສັບຊ້ອນເຂົ້າບັນດາຈຸດປ້ອງກັນທີ່ຕັ້ງ ທີ່ຂຶ້ນກັບຄວາມຮັບຜິດຊອບໃຫ້ພຽງພໍກັບຄວາມຕ້ອງການ, ອອກກວດກາລາດຕະເວນໃຫ້ມີຄວາມສະຫງົບ-ປອດໄພໂດຍພື້ນຖານ, ເກັບກຳສະພາບທີ່ເກີດຂຶ້ນລາຍງານໃຫ້ການຈັດຕັ້ງ ແລະ ຂໍທິດຊີ້ນໍາຈາກຂັ້ນເທິງເປັນປົກກະຕິ.
ປີ 2019 ຜ່ານມາ, ຄະນະກອງພັນ 207 ໄດ້ເອົາໃຈໃສ່ຊີ້ນໍາ-ນໍາ ພາກຳລັງເຄື່ອນໄຫວປະຕິບັດວຽກງານວິຊາສະເພາະຢ່າງຕັ້ງໜ້າໄດ້ຈັດວາງກຳລັງເຂົ້າປ້ອງກັນຈຸດທີ່ຕັ້ງສໍາຄັນ 27 ແຫ່ງ 33 ປ້ອມຍາມ ແລະ ປ້ອງກັນງານສໍາຄັນຕ່າງໆ 88 ຄັ້ງ, ປ້ອງກັນເຄື່ອນຍ້າຍວັດຖຸມີ ຄ່າ 164 ຄັ້ງ, ບັນທຶກລົດເຂົ້າ-ອອກສະຖານທູດ 3.281 ຖ້ຽວຄັນ, ປ້ອງກັນລົດໄທ-ລົດລາວມາສົ່ງ ແລະ ຮັບນໍ້າມັນຢູ່ສາງນໍ້າມັນດົງຫຼວງ ໄດ້ 3.996 ຖ້ຽວຄັນ, ຈັດຕັ້ງກຳລັງປະຈໍາການກຽມພ້ອມສູ້ຮົບຕະຫຼອດ 24 ຊົ່ວໂມງ 365 ວັນ ແລະ ອອກກວດກາລາດຕະເວນ 50 ຄັ້ງ ເຫັນວ່າມີຄວາມສະຫງົບ-ປອດໄພໂດຍພື້ນຖານ.
ພາບ-ຂ່າວ: ສາຄອນ
