ວັນທີ 10 ເມສາ 2020, ບໍລິສັດລ້ານຊ້າງ ມີເນໂຣນສ໌ ລິມິເຕັດ (ລຊມລ) ບໍ່ຄຳ-ທອງເຊໂປນ ໄດ້ມອບອຸປະກອນ-ເຄື່ອງມືປ້ອງກັນການລະບາດ COVID-19 ໃຫ້ແຂວງສະຫວັນນະເຂດ ແລະ ເມືອງວິລະບູລີ ລວມມູນຄ່າທັງໝົດ 142.000.000 ກີບ; ໃນນີ້, ມອບໃຫ້ເມືອງວິລະບູລີ ມູນຄ່າ 44.500.000 ກີບ ປະກອບມີ: ໜ້າກາກອະນາໄມ, ເຄື່ອງກວດອຸນຫະພູມຮ່າງກາຍ, ນ້ຳຢາລ້າງມື, ເຄື່ອງສະເປຢາຂ້າເຊື້ອ ໄຟຟ້າ ແລະ ນ້ຳຢາຂ້າເຊື້ອ.
ຕາງໜ້າ ບໍລິສັດ ລຊມລ ມອບໂດຍ ທ່ານ ນາງ ລັດສະນີ ສີສານ ຫົວໜ້າພົວພັນກັບລັດຖະບານ, ຮັບໂດຍ ທ່ານ ພູຂົງ ນາມມະຈັກ ຫົວໜ້າຫ້ອງການປົກຄອງແຂວງສະຫວັນນະເຂດ ໂດຍຊ້ອງໜ້າ ທ່ານ ປອ ໂພໄຊ ໄຊຍະສອນ ຮອງເຈົ້າແຂວງໆສະຫວັນນະເຂດ; ສ່ວນເມືອງ ວິລະບູລີ ມອບໂດຍ ທ່ານ ພໍ ແຮຣິສ໌ ຜູ້ຈັດການໃຫຍ່ ລຊມລ, ຮັບໂດຍ ທ່ານ ຄຳຜຸຍ ສີບຸນເຮືອງ ເຈົ້າເມືອງໆວິລະບູລີ.
ທ່ານ ສະໝານ ອະເນກາ ຜູ້ອຳນວຍການໃຫຍ່ຂອງ ລຊມລ ກ່າວວ່າ: ທາງບໍລິສັດ ລຊມລ ຫວັງເປັນຢ່າງຍິ່ງວ່າອຸປະກອນ–ເຄື່ອງມືທີ່ຈຳເປັນເຫຼົ່ານີ້ ຈະປະກອບສ່ວນໃນການຕໍ້ສູ້–ຮັບມືກັບການລະບາດ COVID-19 ແລະ ທັງຈະຊ່ວຍໃຫ້ພະນັກງານໃນແຖວໜ້າ ກໍຄືແພດໝໍ ແລະ ປະຊາຊົນເມືອງວິລະບູລີ ແລະ ແຂວງສະຫວັນນະເຂດ ໄດ້ຮັບຄວາມສະດວກຍິ່ງຂຶ້ນ.
