ມາຮອດວັນທີ 27 ເມສາ ນີ້, ແຂວງຜົ້ງສາລີ ຍັງສືບຕໍ່ເຂັ້ມງວດປ້ອງກັນການແພ່ລະບາດຂອງພະຍາດ COVID-19 ໂດຍເລັ່ງໃສ່ການໂຄສະນາການຈັດຕັ້ງປະຕິບັດຕາມຄໍາສັ່ງ ເລກທີ 06/ນຍ ຂອງທ່ານນາຍົກ ກ່ຽວກັບການປ້ອງກັນ, ຄວມຄຸມ ແລະ ແກ້ໄຂການລະບາດພະຍາດ COVID-19, ບັນດາຄໍຳສັ່ງ, ແຈ້ງການຂອງຄະນະສະເພາະກິດເພື່ອປ້ອງກັນ, ຄວມຄຸມ ແລະ ແກ້ໄຂການລະບາດພະຍາດ COVID-19 ຂັ້ນສູນກາງ, ຂັ້ນແຂວງ ແລະ ຂັ້ນເມືອງຢ່າງເຂັ້ມງວດ ໂດຍການໂຄສະນາເຜີຍແຜ່ຜ່ານສື່ວິທະຍຸຂອງແຂວງ, ໂທລະພາບຂອງແຂວງ, ໂທລະໂຄ່ງ 7 ເມືອງ ແລະ ສື່ອອນລາຍຕ່າງໆ.
ພ້ອມດຽວກັນນີ້, ທາງໜ່ວຍງານສະເພາະກິດເພື່ອປ້ອງກັນ, ຄວມຄຸມ ແລະ ແກ້ໄຂການລະບາດພະຍາດ COVID-19 ຂັ້ນແຂວງ ແລະ 7 ເມືອງ ເປັນຕົ້ນແມ່ນພະແນກສາທາລະນະສຸກແຂວງ, ຫ້ອງການສາທາລະນະສຸກ 7 ເມືອງ ແລະ ເຈົ້້າໜ້າທີ່ຕຳຫຼວດຈະລາຈອນ ກໍໄດ້ໃຊ້ລົດເຄື່ອນທີ່ໂຄສະນາດ້ວຍເຄື່ອງສຽງໄປຕາມເສັ້ນ ທາງເທດສະບານແຂວງ ແລະ 7 ເມືອງ ເພື່ອແນະນໍຳໃຫ້ເຂັ້ມງວດໃນການປະຕິບັດຄຳສັ່ງຂອງທ່ານນາຍົກລັດຖະມົນຕີເລກທີ 06/ນຍ ລົງວັນທີ 29 ມີນາ 2020 ອີກຈົນຮອດວັນທີ 3 ພຶດສະພາ 2020. ໃນນັ້ນ, ແມ່ນໃຫ້ສືບຕໍ່ເພີ່ມທະວີຄວາມເຂັ້ມງວດມາດຕະການຫ້າມອອກຈາກເຮືອນ ຫຼື ບ່ອນພັກອາໄສ, ຫ້າມໄປເຂດທີ່ມີຄວາມສ່ຽງໃນການຕິດເຊື້ອ, ມາດຕະການຫ້າມຊຸມແຊວທີ່ມີຈຳນວນຄົນເກີນ 10 ຄົນຂຶ້ນໄປ ແລະ ຫ້າມການຈັດງານທຸກປະເພດ ພ້ອມວິທີປ້ອງກັນພະຍາດ COVID-19.
ທັງນີ້, ກໍເພື່ອໃຫ້ທົ່ວສັງຄົມ ຈົ່ງເຂົ້າຮ່ວມປະຕິບັດຄຳສັ່ງເລກທີ 06/ນຍ ຢ່າງເຄັ່ງຄັດເປັນຮູບປະທຳ ໃນຂອບເຂດທົວແຂວງ ແນໃສ່ໃຫ້ປະຊາຊົນ ແລະ ປະເທດຊາດເຮົາຫຼຸດພົ້ນອອກຈາກສະພາບການລະບາດຂອງພະຍາດ COVID-19 ໂດຍໄວ.
