ກະຊວງວິທະຍາສາດ ແລະ ເຕັກໂນໂລຊີ ແລະ ສູນກາງຊາວໜຸ່ມປະຊາຊົນ ປະຕິວັດລາວ ໄດ້ ເຊັນບົດບັນທຶກ ຄວາມເຂົ້າໃຈວ່າດ້ວຍການຮ່ວມມືດ້ານວິທະຍາສາດ ແລະ ເຕັກໂນໂລຊີໃນຂົງເຂດຊາວໜຸ່ມ-ເຍົາວະຊົນ ຜ່ານລະບົບວີດີໂອຄອນຟຣີເລັນ ໃນວັນທີ 30 ເມສາ 2020 ໂດຍການເປັນປະທານ ແລະ ລົງນາມໂດຍ ທ່ານ ບັນດິດ ສຈ. ບໍ່ວຽງຄໍາ ວົງດາລາ ລັດຖະມົນຕີກະຊວງວິທະຍາສາດ ແລະເຕັກໂນໂລຊີ ແລະ ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ ພ້ອມດ້ວຍພະນັກງານຫລັກແຫລ່ງທັງສອງຝ່າຍເຂົ້າຮ່ວມ.
ການເຊັນບົດບັນທຶກຄວາມເຂົ້າໃຈໃນຄັ້ງນີ້ ເພື່ອກຳນົດຂອບເຂດການຮ່ວມມືດ້ານວິທະຍາສາດ ແລະ ເຕັກໂນໂລຊີຂອງກະຊວງວິທະຍາສາດ ແລະ ເຕັກໂນໂລຊີ ແລະ ສູນກາງຊາວໜຸ່ມປະຊາຊົນ ປະຕິວັດລາວ ເພື່ອພັດທະນາຊາວໜຸ່ມ-ເຍົາວະຊົນລາວໃຫ້ກາຍເປັນນັກວິທະຍາສາດ ແລະ ມີຄວາມເຂົ້າໃຈຢ່າງເລິກເຊິ່ງກ່ຽວກັບບົດບາດຄວາມສໍາຄັນຂອງວຽກງານວິທະຍາສາດ ແລະ ເຕັກໂນໂລຊີກັບການພັດທະນາເສດຖະກິດ-ສັງຄົມຂອງຊາດ.
ທັງສອງຝ່າຍໄດ້ເຫັນດີເປັນເອກະພາບຮ່ວມມືກັນຄື: ໂຄງການນ້ອງຢາກເປັນນັກວິທະຍາສາດ ທັງສອງຝ່າຍຈະຮ່ວມກັນຈັດກິດຈະກຳໂຄສະນາເຜີຍແຜ່, ປູກຈິດສໍານຶກທາງດ້ານວຽກງານວິທະຍາສາດ ແລະ ເຕັກໂນໂລຊີໃຫ້ແກ່ຊາວໜຸ່ມ-ເຍົາວະຊົນ; ສ້າງພິພິທະພັນຊາວໜຸ່ມລາວແບບເອເລັກໂຕຼນິກ ທັງສອງຝ່າຍຈະຮ່ວມກັນຄົ້ນຄວ້າ ແລະ ພັດທະນາເວບໄຊທ໌, ແອັບພຣິເຄເຊິນໃນໂທລະສັບມືຖືລະບົບເອັນດຼອຍ ແລະລະບົບໄອໂອເອສ ແລະ ລະບົບຖານຂໍ້ມູນຂອງພິພິທະພັນຊາວໜຸ່ມບົນພື້ນຖານການສະໜອງ ແລະ ປ້ອນຂໍ້ມູນຂອງສູນກາງຊາວໜຸ່ມປະຊາຊົນ ປະຕິວັດລາວໃຫ້ສໍາເລັດກ່ອນກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII; ສ້າງລາຍການໂທລະພາບ, ວິທະຍຸ ແລະ ສື່ອອນລາຍໃນຮູບແບບຕ່າງໆໃຫ້ສອດຄ່ອງກຸ່ມເປົ້າໝາຍກັບວຽກງານວິທະຍາສາດ ແລະ ເຕັກໂນໂລຊີ; ຈັດຝຶກອົບຮົມ, ສໍາມະນາ ແລະ ແລກປ່ຽນຄວາມຮູ້ດ້ານວຽກງານວິທະຍາສາດເຕັກໂນໂລຊີ ແລະ ນະວັດຕະກຳ ເພື່ອສ້າງຄວາມຮູ້, ຄວາມເຂົ້າໃຈ ແລະ ສາມາດນໍາໃຊ້ເຂົ້າໃນວຽກງານຕົວຈິງຕາມຄວາມຮຽກຮ້ອງຕ້ອງການຂອງການພັດທະນາແຕ່ລະໄລຍະ ແລະ ດ້ານອື່ນໆກ່ຽວກັບວຽກງານວິທະຍາສາດ ແລະ ເຕັກໂນໂລຊີ ທີ່ີ່ສອດຄ່ອງ ແລະ ສັງຄົມມີຄວາມຮຽກຮ້ອງຕ້ອງການບົນພື້ນຖານການຕົກລົງເຫັນດີເປັນເອກະພາບຂອງສອງຝ່າຍ.
