ພິທີຊາປະນາກິດສົບ ສະຫາຍ ພົອ ສີສະຫວາດ ແກ້ວບຸນພັນ ໄດ້ຈັດຂຶ້ນຢ່າງເປັນທາງການໃນຕອນບ່າຍຂອງວັນທີ 16 ພຶດສະພາ 2020 ທີ່ເດີ່ນພຣະທາດຫຼວງ; ໂດຍມີສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ, ພ້ອມດ້ວຍບັນດາສະຫາຍການນຳພັກ-ລັດ, ບັນດາທູຕານຸທູດປະຈຳລາວ, ສະມາຊິກພັກ, ພະນັກງານ-ນັກຮົບ, ຄອບຄົວ-ລູກຫຼານ ແລະ ຍາດພີ່ນ້ອງເຂົ້າຮ່ວມຢ່າງຫຼວງຫຼາຍ.
ໃນພິທີ, ສະຫາຍ ທອງລຸນ ສີສຸລິດ ນາຍົກລັດຖະມົນຕີ ປະທານຄະນະຮັບຜິດຊອບງານຊາປະນາກິດສົບສະຫາຍ ພົອ ສີສະຫວາດ ແກ້ວບຸນພັນ ໄດ້ໃຫ້ກຽດຂຶ້ນກ່າວສະດຸດີ ແລະ ອ່ານປະຫວັດຫຍໍ້ຂອງສະຫາຍ ພົອ ສີສະຫວາດ ແກ້ວບຸນພັນ ອະດີດກຳມະການສູນກາງພັກສະໄໝທີ I; II; III; IV; V; VI; VII ແລະ VIII, ອະດີດນາຍົກລັດຖະມົນຕີ, ອະດີດຮອງປະທານປະເທດ, ອະດີດປະທານສູນກາງແນວລາວສ້າງຊາດ, ອະດີດຫົວໜ້າເສນາທິການໃຫຍ່ກອງທັບປົດປ່ອຍປະຊາຊົນລາວ, ອະດີດລັດຖະມົນຕີປະຈຳສຳນັກງານນາຍົກລັດຖະມົນຕີ, ອະດີດລັດຖະມົນຕີກະຊວງປ້ອງກັນຄວາມສະຫງົບ, ອະດີດເລຂາຄະນະພັກ, ປະທານຄະນະກຳມະການປົກຄອງກຳແພງນະຄອນວຽງຈັນ, ອະດີດລັດຖະມົນຕີກະຊວງກະສິກຳ ແລະ ປ່າໄມ້, ອະດີດປະທານຄະນະຂົນຂວາຍສ້າງຕັ້ງຄະນະຊາວໜຸ່ມປະຊາຊົນ ປະຕິວັດລາວ; ເຊິ່ງສະຫາຍໄດ້ສິ້ນລົມຫາຍໃຈໃນເວລາ 7 ໂມງເຊົ້າຂອງວັນທີ 12 ພຶດສະພາ 2020, ລວມອາຍຸໄດ້ 92 ປີ.
ດ້ວຍຜົນງານ ແລະ ຄຸນງາມຄວາມດີທີ່ສະແດງອອກເຖິງຄຸນສົມບັດສິນທຳປະຕິວັດອັນຜ່ອງໃສ ແລະ ຄວາມຮັກເຊື້ອງແພງຊາດ, ສະຫາຍໄດ້ຮັບຄວາມໄວ້ເນື້ອເຊື່ອໃຈ, ຄວາມເຄົາລົບຮັກແພງຈາກສະມາຊິກພັກ, ພະນັກງານ-ນັກຮົບ ແລະ ປະຊາຊົນລາວບັນດາເຜົ່າ ກໍຄືປະເທດເພື່ອນມິດຢ່າງກວ້າງຂວາງ, ເພື່ອເປັນການສັນລະເສີນກຽດຕິຄຸນຂອງສະຫາຍ, ພັກ ແລະ ລັດຖະບານ ໄດ້ຕົກລົງມອບຫຼຽນໄຊຂັ້ນສູງປະເພດຕ່າງໆໃຫ້ແກ່ສະຫາຍ.
ຈາກນັ້ນ, ກໍແມ່ນພິທີທາງສາສະໜາ ເປັນຕົ້ນແມ່ນ: ພະສົງສູດສັກອານິຈາ, ພິທີວາງຜ້າໄກ, ວາງດອກໄມ້ທູບ-ທຽນຂອງພະສົງ, ແມ່ຂາວ, ຄະນະຊາປະນກິດສົບ ແລະ ບັນດາຜູ້ຕາງໜ້າຄອບຄົວ, ບັນດາທ່ານຜູ້ນຳພັກ-ລັດ ແລະ ອະດີດການນຳຂັ້ນສູງ, ບັນດາທ່ານລັດຖະມົນຕີ, ເຈົ້າແຂວງ, ປະທານອົງການທຽບເທົ່າກະຊວງ ແລະ ຮອງລັດຖະມົນຕີ, ຮອງເຈົ້າແຂວງ, ຮອງປະທານອົງການທຽບເທົ່າກະຊວງ ພ້ອມດ້ວຍບັນດາທ່ານທີ່ເຂົ້າຮ່ວມ.
ສະຫາຍ ພົອ ສີສະຫວາດ ແກ້ວບຸນພັນ ແມ່ນຜູ້ນຳຮຸ່ນທຳອິດຂອງພັກ ແລະ ລັດ ທີ່ໄດ້ອຸທິດຊີວິດຂອງຕົນຕິດພັນກັບການຕໍ່ສູ້ກູ້ຊາດ ຕ້ານຈັກກະພັດລ່າເມືອງຂຶ້ນແບບເກົ່າ ແລະ ໃໝ່, ສະຫາຍແມ່ນນັກຮົບປະຕິວັດຜູ້ອົງອາດທີ່ເກັ່ງກ້າສາມາດ, ມີນຳ້ໃຈເສຍສະລະອັງສູງສົ່ງ ເປັນທີ່ເຄົາລົບຮັກຂອງກຳລັງປະກອບອາວຸດ ແລະ ປະຊາຊົນລາວບັນດາເຜົ່າ, ແມ່ນພະນັກງານການນຳທີ່ມີແບບແຜນນຳພາທີ່ດີ, ມີຄວາມສາມັກຄີເປັນເອກະພາບພາຍໃນພັກ ແລະ ຢຶດໝັ້ນໃນອຸດົມການປະຕິວັດຢ່າງສູງສົ່ງໃນພາລະກິດປະຕິວັດປົດປ່ອຍຊາດ, ປົກປັກຮັກສາ ແລະ ສ້າງສາລະບອບໃໝ່, ພວກເຮົາປວງຊົນລາວທັງຊາດ ຂໍລະນຶກເຖິງຄຸນງາມຄວາມດີຂອງສະຫາຍຢູ່ໃນຄວາມຊົງຈຳຕະຫຼອດໄປ.