ພິທີປະກາດການຈັດຕັ້ງ ຂັ້ນຮອງກອງບັນຊາການ ແລະ ຫົວໜ້າຫ້ອງເຕັກນິກ ຢູ່ ກອງບັນຊາການ ທະຫານ ນະຄອນຫຼວງວຽງຈັນ (ນວ) ໄດ້ຈັດຂຶ້ນໃນວັນທີ 11 ມິຖຸນາ 2020, ເປັນປະທານໂດຍ ພົຈວ ຄຳພາ ສີພອນໄຊ ຮອງຫົວໜ້າກົມໃຫຍ່ເຕັກນິກ ກອງທັບ, ພ້ອມທັງມີ ພົຈວ ສີພອນ ຈັນສົມວົງ ຫົວໜ້າການເມືອງ ກອງບັນຊາການ ທະຫານ ນວ, ມີຕາງໜ້າໃຫ້ ກົມເສນາເຕັກນິກ ພ້ອມດ້ວຍຄະນະພັກ-ຄະນະກອງບັນຊາການ, ຄະນະບັນຊາຈາກອົງການ 5 ຫ້ອງ ແລະ ກົມກອງອ້ອມຂ້າງ ຕະຫຼອດຮອດ ພະແນກການທີ່ກ່ຽວຂ້ອງ ເຂົ້າຮ່ວມ.
ໃນພິທີດັ່ງກ່າວ, ພັທ ອິນພອນ ໄຊຍະສິດ ຫົວໜ້າພະແນກຈັດຕັ້ງ ກົມພະນັກງານ ກົມໃຫຍ່ການເມືອງ ກອງທັບ ໄດ້ຜ່ານຂໍ້ຕົກລົງຂອງ ກະຊວງປ້ອງກັນປະເທດ ສະບັບເລກທີ 2385/ກປທ ວ່າດ້ວຍ ການຍົກຍ້າຍນາຍທະຫານ ຢູ່ ກອງບັນຊາການ ທະຫານ ນວ ໄປໃຫ້ ວິທະຍາຄານເຕັກນິກການທະຫານ, ເຊິ່ງໄດ້ຕົກລົງໂຍກຍ້າຍ:
- ພັທ ວົງຈິດ ໄຟສະຫວ່າງ ຮອງຫົວໜ້າກອງບັນຊາການ ຮັບຜິດຊອບວຽກງານເຕັກນິກ ທັງເປັນ ຫົວໜ້າຫ້ອງເຕັກນິກ ກອງບັນຊາການ ທະຫານ ນວ ໄປໃຫ້ ວິທະຍາຄານເຕັກນິກການທະຫານ.
ພ້ອມນີ້, ຍັງໄດ້ຜ່ານຂໍ້ຕົກລົງ ວ່າດ້ວຍ ການແຕ່ງຕັ້ງ ຮອງຮັບຜິດຊອບວຽກງານເຕັກນິກ ຂອງ ກອງບັນຊາການ ທະຫານ ນະຄອນຫຼວງວຽງຈັນ ຈຶ່ງໄດ້ຕົກລົງແຕ່ງຕັ້ງ:
- ພັທ ສີວອນ ດາວມະນີຈັນ ເປັນ ຮອງຫົວໜ້າກອງບັນຊາການ ຮັບຜິດຊອບວຽກງານເຕັກນິກ ທັງເປັນ ຫົວໜ້າຫ້ອງເຕັກນິກ ຂອງ ກອງບັນຊາການ ທະຫານ ນວ.
ໃນໂອກາດນີ້, ພົຈວ ຄຳພາ ສີພອນໄຊ ໄດ້ເນັ້ນໃຫ້ຜູ້ທີ່ຖືກໂຍກຍ້າຍ ແລະ ຜູ້ທີ່ໄດ້ຮັບໜ້າທີ່ໃໝ່ ຈົ່ງຍົກສູງພາລະບົດບາດການຊີ້ນຳ-ນຳພາບັນຊາຂອງຕົນ ໃຫ້ມີຄວາມໜັກແໜ້ນເຂັ້ມແຂງ ແລະ ກວ້າງຂວາງ; ໂດຍສະເພາະແມ່ນ ການຈັດຕັ້ງປະຕິບັດຕໍ່ໜ້າທີ່ວຽກງານ ໃຫ້ມີປະສິດທິຜົນສູງ, ເອົາໃຈໃສ່ສຶກສາອົບຮົມ ການເມືອງນຳພາແນວຄິດໃຫ້ເຂັ້ມແຂງ, ເອົາໃຈໃສ່ຝຶກຝົນຫຼໍ່ຫຼອມຕົນເອງ ໃນການຊອກຮູ້ຮ່ຳຮຽນ ເພື່ອຍົກລະດັບຄວາມຮູ້-ຄວາມສາມາດຂອງຕົນ ໃຫ້ສູງຂຶ້ນເປັນກ້າວໆ, ມີຄວາມສາມັກຄີພາຍໃນໃຫ້ແໜ້ນແຟ້ນ, ປັບປຸງແບບແຜນການນຳພາເຮັດວຽກ ລວມສູນປະຊາທິປະໄຕເປັນໝູ່ຄະນະ, ແບ່ງໃຫ້ບຸກຄົນຮັບຜິດຊອບຕໍ່ໜ້າທີ່ການເມືອງຂອງຕົນ ເພື່ອເຮັດສຳເລັດໜ້າທີ່ທີ່ພັກ-ລັດ ກໍຄື ການຈັດຕັ້ງຂັ້ນເທິງ ມອບໝາຍໃຫ້ເປັນຢ່າງດີ.
