ໃນວັນທີ 12 ກຸມພາ 2018, ໄດ້ຈັດພິທີເປີດນໍາໃຊ້ຂົວມິດຕະພາບລາວ-ຍີ່ປຸ່ນ ແຂວງເຊກອງ ( ຂົວຂ້າມນໍ້າເຊກອງ ) ທີ່ເຊື່ອມຕໍ່ລະຫວ່າງເມືອງລະມາມ ຫາ ເມືອງ ດາກຈຶງ ແຂວງເຊກອງ ເປັນກຽດເຂົ້າຮ່ວມຂອງທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ, ທ່ານ ທາເຄຊິ ຮິຄິຮາຣະ ເອັກອັກຄະລາຊະທູດຍີ່ປຸ່ນປະຈໍາ ສປປ ລາວ, ມີລັດ ຖະມົນຕີກະຊວງໂຍທາທິການ ແລະ ຂົນສົ່ງ, ເຈົ້າແຂວງໆເຊກອງ, ບັນດາແຂກຖືກເຊີນ ແລະ ພາກສ່ວນທີ່ກ່ຽວ ຂ້ອງເຂົ້າຮ່ວມ.
ໂອກາດນີ້, ທ່ານ ປອ ບຸນຈັນ ສິນທະວົງ ລັດຖະມົນຕີ ກະຊວງ ຍທຂ ກ່າວວ່າ: ໂຄງການຂ້າມຂົວນໍ້າເຊກອງ ແຕ່ເມືອງລະມາມ ຫາ ເມືອງດາກຈຶ ແຂວງເຊກອງ ແມ່ນໄດ້ຮັບການຊ່ວຍເຫຼືອລ້າຈາກລັດຖະບານ ແລະ ປະຊາ ຊົນຍີ່ປຸ່ນ ໃນມູນຄ່າທັງໝົດ 1,62 ຕື້ເຢັນ ຫຼື ປະມານ 16,20 ລ້ານໂດລາສະຫະລັດ ໂດຍຜ່ານອົງການໄຈກາ, ທີ່ໄດ້ໃຫ້ການສະໜັບສະໜູນ ຊ່ວຍເຫຼືອລັດຖະບານລາວ; ໂຄງການກໍ່ສ້າງຂົວນໍ້າເຊກອງ ມິດຕະພາບລາວ-ຍີ່ປຸ່ນ ແມ່ນໄດ້ສ້າງມາແຕ່ຕົ້ນປີ 2015 ເຊິ່ງໃຊ້ເວລາກໍ່ສ້າງ 39 ເດືອນ, ຂົວມີຄວາມຍາວ 300 ແມັດ, ອອກແບບ ກໍ່ສ້າງຕາມມາດຖານເຕັກນິກຂອງສາກົນ, ເປັນຂົວເບຕົງເສີມເຫຼັກອັດແຮງແບບປະສົມລະຫວ່າງສາຍກາບຖ່ວງດຶງ ແລະ ຂາງແບບຮູບກັບ 4 ຫຼ່ຽມ, ສາມາດຮັບນໍ້າໜັກໄດ້ 800 ໂຕນ, ມີ 3 ເສົາກາງນໍ້າ ແລະ ເສົາຫົວຂົວ 2 ເສົາ, ລະບົບຮາກຖານຈໍານວນໜຶ່ງຕອກເສົາເຂັມ, ມີຈໍານວນ 17 ຕົ້ນ, ມີ 4 ຊ່ວງ, ຊ່ວງກາງນໍ້າກວ້າງທີ່ສຸດ 110 ແມັດ, ຄວາມກວ້າງຂອງໜ້າຂົວ 11 ແມັດ, ໜ້າທາງລົດແລ່ນ 8 ແມັດ, ທາງຍ່າງເບື້ອງລະ 1,5 ແມັດ, ປູດ້ວຍຢາງຂົ້ວ, ໜາ 8 ຊັ່ງຕີແມັດ, ມີທາງເຂົ້າຂົວ 2 ເບື້ອງ, ຍາວ 528 ແມັດ, ກວ້າງ 10 ແມັດ, ປູ້ດ້ວຍຢາງຂົ້ວ, ໜາ 10 ຊັງ ຕີແມັດ, ມີລະບົບໄຟເຍືອງທາງ ເພື່ອຮັບປະກັນຄວາມປອດໄພໃນເວລາການສັນຈອນ.
ທ່ານ ເຈົ້າແຂວງໆເຊກອງ ກ່າວວ່າ: ການເປີດນໍາໃຊ້ຂົວຂ້າມນໍ້າເຊກອງ ໃນມື້ນີ້ນອກຈາກສ້າງຄວາມສະດວກໃຫ້ແກ່ ການຄົມມະນາຄົມຂົນສົ່ງ, ການໄປມາຫາສູ່ຄ້າຂາຍ ແລະ ການເຂົ້າເຖິງການບໍລິການດ້ານການສຶກສາ-ສາທາລະນະ ສຸກຂອງປະຊາຊົນທີ່ອາໃສຢູ່ 2 ຝາກຝັ່ງແມ່ນໍ້າເຊກອງແລ້ວ, ຍັງເປັນການເປີດເສັ້ນທາງໃຫ້ແກ່ການເຊື່ອມໂຍງດ້ານ ເສດຖະກິດ, ການຄ້າ, ການລົງທຶນ ແລະ ການທ່ຽວທ່ອງ ທີ່ອັດຕັນມາດົນນານລະຫວ່າງພາກພື້ນ ແລະ ອະນຸພາກ ພື້ນ, ການເຊື່ອມໂຍງລະຫວ່າງ ສປປ ລາວ, ສສ ຫວຽດນາມ, ກໍາປູເຈຍ ແລະ ຊາລາອານາຈັກໄທ; ຈາກການເຊື່ອມ ໂຍງດັ່ງກ່າວຈະເຮັດໃຫ້ມູນຄ່າດ້ານການຄ້າ, ການລົງທຶນ ແລະ ການຂົນສົ່ງສິນຄ້າຂະຫຍາຍໄປເຖິງຊາຍແດນຈີນ ໂດຍຜ່ານ ສສ ຫວຽດນາມອີກດ້ວຍ.