ສະຫະພັນແມ່ຍິງ ກົມສື່ສານ ກະຊວງ ປກສ ສະຫຼຸບວຽກງານປະຈໍາປີ 2021 ແລະ ວາງທິດທິດທາງແຜນການ ປີ 2022 ໃນວັນທີ 17 ກຸມພາ 2022, ເຂົ້າຮ່ວມໂດຍ ພັອ ແສງປະເສດ ສຸທໍາມະວົງ ຫົວໜ້າກົມສື່ສານ, ມີ ພັທ ນາງ ຄໍາປຸ່ນ ຈູມມະນີ ປະທານສະຫະພັນແມ່ຍິງ ກົມສື່ສານ, ມີຮອງປະທານສະຫະພັນແມ່ຍິງ, ໜ່ວຍແມ່ຍິງ, ແຂກຮັບເຊີນ ແລະ ສະມາຊິກແມ່ຍິງ ເຂົ້າຮ່ວມ.
+ ພັທ ນາງ ຄໍາປຸ່ນ ຈູມມະນີ ກ່າວວ່າ:
ໃນໄລຍະ 1 ປີຜ່ານມາ, ຄະນະສະຫະພັນແມ່ຍິງ ກົມສື່ສານ ໄດ້ເອົາໃຈໃສ່ຊີ້ນໍາ-ນໍາພາສະມາຊິກ ຈັດຕັ້ງປະຕິບັດວຽກງານວິຊາສະເພາະ ດ້ວຍຄວາມຫ້າວຫັນ ແລະ ມີຜົນສໍາເລັດຫຼາຍດ້ານ ເປັນຕົ້ນແມ່ນ ໄດ້ປັບປຸງການຈັດຕັ້ງຂອງຕົນຖືກຕ້ອງຕາມລະບຽບຂອງ ສູນກາງສະຫະພັນແມ່ຍິງລາວ ແລະ ສອດຄ່ອງກັບສະພາບຈຸດພິເສດຂອງແຕ່ລະໜ່ວຍ, ໄດ້ຄົ້ນຄວ້ານິຕິກໍາເພື່ອເປັນບ່ອນອີງໃນການເຄື່ອນໄຫວ, ໄດ້ປຸກລະດົມສະມາຊິກແມ່ຍິງ ເຂົ້າຮ່ວມປະຕິບັດວຽກງານວິຊາສະເພາະ ແລະ ຂະບວນການຕ່າງໆ ເຊັ່ນ:
ຊຸກຍູ້ເອື້ອຍ-ນ້ອງແມ່ຍິງຕັ້ງໜ້າປະຕິບັດໜ້າທີ່ວຽກງານວິຊາສະເພາະ ປະຕິບັດລະບອບປະຈໍາການ ຕະຫຼອດ 24 ຊົ່ວໂມງ, ຮັບປະກັນໄດ້ດ້ານຂໍ້ມູນຂ່າວສານແຕ່ສູນກາງລົງທ້ອງຖິ່ນ, ແຕ່ທ້ອງຖິ່ນຂຶ້ນສູ່ສູນກາງ, ໄດ້ທັນເວລາປະຕິບັດຖືກຕ້ອງຕາມພາລະບົດບາດຂອງວິຊາສະເພາະສື່ສານ ໄດ້ເປັນຢ່າງດີ, ຮັບປະກັນຄວາມລັບ, ວ່ອງໄວ, ທັນເວລາ ແລະ ທັນສະໄໝ.
ທິດທາງແຜນການຕໍ່ໜ້າ ຈະສືບຕໍ່ຊຸກຍູ້ ສະຫະພັນແມ່ຍິງແຕ່ລະໜ່ວຍ ເອົາໃຈໃສ່ກຳແໜ້ນແນວທາງນະໂຍບາຍຂອງພັກ, ຍົກສູງພາລະບົດບາດການນຳພາ ແກ້ໄຂບັນຫາປະກົດການຍໍ້ທໍ້ ຢູ່ພາຍໃນໜ່ວຍແມ່ຍິງຂອງຕົນໃຫ້ຂາດຕົວ ໂດຍຖືເອົາການຮ່ວມຊີວິດພາຍໃນແມ່ຍິງແຕ່ລະເດືອນໃຫ້ປົກກະຕິ, ສືບຕໍ່ສຶກສາອົບຮົມການເມືອງ-ນຳພາແນວຄິດ ໃຫ້ສະມາຊິກແມ່ຍິງຢ່າງຕໍ່ເນື່ອງ ໂດຍຕິດພັນກັບການເຂົ້າຮ່ວມເຊື່ອມຊຶມກຳແໜ້ນແນວທາງນະໂຍບາຍຂອງພັກ-ລັດ, ລະບຽບຂອງກຳລັງປ້ອງກັນຄວາມສະຫງົບ ກໍຄື ການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງແມ່ຍິງລາວວາງອອກ, ສ້າງບຸກຄົນ 3 ດີ, ໜ່ວຍ 3 ດີ ແລະ ສະຫະພັນແມ່ຍິງ 3 ດີ.
ໃນພິທີ ຍັງໄດ້ມອບໃບຍ້ອງຍໍຂອງ ສູນກາງສະຫະພັນແມ່ຍິງລາວ ທີ່ໄດ້ປະຕິບັດຂໍ້ແຂ່ງຂັນ 3 ດີ ໃຫ້ໜ່ວຍແມ່ຍິງທີ່ຂຶ້ນກັບ ສະຫະພັນແມ່ຍິງກົມສື່ສານ ຈໍານວນ 3 ໜ່ວຍ ແລະ ມອບໃບຍ້ອງຍໍໃຫ້ບຸກຄົນທີ່ມີຜົນງານດີເດັ່ນ ໃນການປະຕິບັດຂໍ້ແຂ່ງຂັນ 3 ດີ ຈຳນວນ 36 ສະຫາຍ.