ໃນວັນທີ 22 ມີນາ 2022, ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ໃຫ້ສຳພາດຕໍ່ສື່ມວນຊົນ ປກສ ກ່ຽວກັບ ການຈັດຕັ້ງປະຕິບັດວາລະແຫ່ງຊາດຂອງ ອົງການໄອຍະການປະຊາຊົນສູງສຸດ ວ່າ:
ພາຍຫຼັງ ສະພາແຫ່ງຊາດ ແລະ ລັດຖະບານ ໄດ້ຮັບຮອງ, ອອກຄຳສັ່ງກ່ຽວກັບ ການຈັດຕັ້ງປະຕິບັດວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດ, ອົງການໄອຍະການສູງສຸດ ກໍໄດ້ຖືເອົາວຽກງານດັ່ງກ່າວເປັນວຽກງານສຳຄັນ ແລະ ຮີບຮ້ອນໃນການຈັດຕັ້ງປະຕິບັດ.
ເຊິ່ງມາຮອດປັດຈຸບັນ ໄດ້ເຮັດສຳເລັດຫຼາຍດ້ານ ໃນນັ້ນໄດ້ສຳເລັດບາດກ້າວທຳອິດ ຄື: ການກະກຽມເອກະສານ, ການເຜີຍແຜ່ມະຕິ, ຄຳສັ່ງຂອງຂັ້ນເທິງ ແລະ ເອກະສານທີ່ສຳຄັນໃຫ້ແກ່ ອົງການໄອຍະການປະຊາຊົນ ໃນຂອບເຂດທົ່ວປະເທດ, ເຮັດໃຫ້ທົ່ວລະບົບອົງການໄອຍະການປະຊາຊົນ ເຊື່ອມຊຶມ, ກຳແໜ້ນ ແລະ ມີຄວາມເປັນເອກະພາບສູງ ຕໍ່ຄຳສັ່ງເລກທີ 02 ຂອງກົມການເມືອງສູນກາງພັກ ວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດຂອງລັດຖະບານຢ່າງເລິກເຊິ່ງ ແລະ ໄດ້ຈັດຕັ້ງຜັນຂະຫຍາຍວາລະແຫ່ງຊາດດັ່ງກ່າວ ເຂົ້າໃນວຽກງານໄອຍະການປະຊາຊົນທ້ອງຖິ່ນຢ່າງຖືກຕ້ອງ.
ໄດ້ສໍາເລັດບາດກ້າວທີ 2 ໄປແລ້ວຈໍານວນໜຶ່ງ ເປັນຕົ້ນແມ່ນ: ການປັບປຸງກົງຈັກການຈັດຕັ້ງແຕ່ສູນກາງລົງຮອດທ້ອງຖິ່ນ ແລະ ໄດ້ສຳເລັດການສ້າງນິຕິກຳໃຕ້ກົດໝາຍ ເພື່ອນໍາໃຊ້ເຂົ້າໃນວຽກງານການແກ້ໄຂບັນຫາຢາເສບຕິດຫຼາຍສະບັບ ເຊັ່ນ:
ຄຳສັ່ງຂອງຫົວໜ້າອົງການໄອຍະການປະຊາຊົນສູງສຸດ ວ່າດ້ວຍ ການແຕ່ງຕັ້ງຄະນະຮັບຜິດຊອບຊີ້ນຳ ໃນການຜັນຂະຫຍາຍໂຄງການຈັດຕັ້ງປະຕິບັດ ວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດ
- ຄຳສັ່ງຫົວໜ້າອົງການໄອຍະການປະຊາຊົນສູງສຸດ ວ່າດ້ວຍ ການດຳເນີນຄະດີຢາເສບຕິດ ແລະ ຄະດີຟອກເງິນ
- ຄຳສັ່ງຂອງຫົວໜ້າອົງການໄອຍະການປະຊາຊົນສູງສຸດ ກ່ຽວກັບ ການຈັດຕັ້ງຜັນຂະຫຍາຍມະຕິກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ວ່າດ້ວຍ ການຮັບຮອງເອົາວາລະແຫ່ງຊາດຂອງລັດຖະບານ ກ່ຽວກັບ ການແກ້ໄຂບັນຫາຢາເສບຕິດ ແຕ່ປີ 2021-2023 ເຂົ້າສູ່ວຽກງານໄອຍະການ
- ຄຳສັ່ງຂອງຫົວໜ້າອົງການໄອຍະການປະຊາຊົນສູງສຸດ ກ່ຽວກັບ ການຈັດຕັ້ງຜັນຂະຫຍາຍວາລະແຫ່ງຊາດ ແກ້ໄຂບັນຫາຢາເສບຕິດ ແລະອື່ນໆ
ນອກນັ້ນ, ຍັງໄດ້ສ້າງກົນໄກການປະສານງານລະຫວ່າງ ອົງການໄອຍະການປະຊາຊົນສູງສຸດ ແລະ ກະຊວງປ້ອງກັນຄວາມສະຫງົບ ກ່ຽວກັບ ການຜັນຂະຫຍາຍບົດບັນທຶກກອງປະຊຸມຮ່ວມ 4 ພາກສ່ວນ ຄັ້ງທີ VI ແລະ ໄດ້ເຊັນບົດບັນທຶກປະສານງານຮ່ວມກັນ ໃນຄັ້ງວັນທີ 8 ທັນວາ 2021 ແລະ ໄດ້ເປີດກອງປະຊຸມຄະນະປະສານງານ ຄັ້ງທີ 1 ໃນວັນທີ 27 ມັງກອນ 2022, ເຊິ່ງໄດ້ເອກະພາບກັນໃຫ້ພະນັກງານໄອຍະການປະຊາຊົນ ເຂົ້າຮ່ວມໃນການດໍາເນີນຄະດີຢາເສບຕິດລາຍໃຫຍ່ ຮ່ວມກັບ ເຈົ້າໜ້າທີ່ຕຳຫຼວດ.
ປັດຈຸບັນ, ອົງການໄອຍະການປະຊາຊົນທ້ອງຖິ່ນ ພວມຈັດຕັ້ງຜັນຂະຫຍາຍເຂົ້າໃນວຽກງານຢູ່ທ້ອງຖິ່ນຂອງຕົນ; ອົງການໄອຍະການປະຊາຊົນແຕ່ລະຂັ້ນ ໄດ້ມີຄວາມເຂັ້ມງວດ ແລະ ເດັດຂາດຂຶ້ນກວ່າເກົ່າ ໃນການຕິດຕາມກວດກາການດໍາເນີນຄະດີຢາເສບຕິດ ອັນພົ້ນເດັ່ນແມ່ນ ໄດ້ມີການຕົກລົງເປັນເອກະພາບລະຫວ່າງ ອົງການໄອຍະການປະຊາຊົນສູງສຸດ ແລະ ກະຊວງປ້ອງກັນຄວາມສະຫງົບ ໃຫ້ພະນັກງານໄອຍະການປະຊາຊົນເຂົ້າຮ່ວມໃນການຕິດຕາມກວດກາຄະດີຢາເສບຕິດລາຍໃຫຍ່ ຮ່ວມກັບ ເຈົ້າໜ້າທີ່ຕຳຫຼວດ ເລີ່ມແຕ່ຫົວທີ ເພື່ອເຮັດໃຫ້ການດໍາເນີນຄະດີມີຄວາມຄົບຖ້ວນ, ຮອບ ດ້ານ ແລະ ພາວະວິໄສ; ພ້ອມນີ້, ຍັງໄດ້ຍາດແຍ່ງການຊ່ວຍເຫຼືອຈາກຕ່າງປະເທດ ເພື່ອຝຶກອົບຮົມການສ້າງຄວາມເຂັ້ມແຂງໃຫ້ແກ່ພະນັກງານໄອຍະການປະຊາຊົນ ແລະ ເຈົ້າໜ້າທີ່ຕຳຫຼວດຜູ້ເຮັດວຽກການດໍາເນີນຄະດີຢາເສບຕິດຕົວຈິງ ຢູ່ນະຄອນຫຼວງວຽງຈັນ ຄັ້ງວັນທີ 6-7 ທັນວາ 2021 ເຊິ່ງມີຜູ້ເຂົ້າຮ່ວມທັງໝົດ 61 ຄົນ.
