ບຸນກຸດສົງການ ຫຼື ບຸນປີໃໝ່ລາວ ພສ 2564 ເປັນປາງບຸນໃຫຍ່ຂອງປວງຊົນລາວທັງຊາດ ສະເພາະປີນີ້ຈະບໍ່ມີການສະເຫຼີມສະຫຼອງໃຫຍ່ຄືກັບຫຼາຍປີທີ່ຜ່ານມາ ຍ້ອນການແພ່ລະບາດຂອງພະຍາດໂຄວິດ-19, ໂດຍລັດຖະບານ ກໍຄືຫ້ອງວ່າການສຳນັກງານນາຍົກ ກໍໄດ້ອອກແຈ້ງການກ່ຽວກັບການສະ ເຫຼີມສະຫຼອງບຸນປີໃໝ່ລາວ ພສ 2565 ໂດຍໃຫ້ແຕ່ລະພາກສ່ວນຈັດຕັ້ງປະຕິບັດຕາມຮີດຄອງປະເພນີຂອງລາວ ແລະ ຮັກສາໄດ້ມູນເຊື້ອວັດທະນະ ທຳ, ປະເພນີອັນດີງາມຂອງຊາດ ເສີມສ້າງຄວາມສາມັກຄີໄມຕີຕິດມິດຕະພາບເທົ່ານັ້ນ; ແຕ່ຢ່າງໃດກໍຕາມ, ຄືດັ່ງທີ່ເຮົາຮູ້ນຳກັນແລ້ວວ່າ ສັງຄົມລາວບໍ່ວ່າຈະເປັນງານໃດໆ ກໍມີການພົບປະສ້າງສັນການດື່ມສິ່ງມຶນເມົາ ແຕ່ທຸກຄົນຈົ່ງຫຼິ້ນກິນຢ່າງມີສະຕິ, ຫຼິ້ນໃຫ້ມີຄວາມພໍເໜາະພໍດີ ແລະ ຮັບປະກັນຄວາມສະຫງົບ-ປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ.
ຫຼາຍປີຜ່ານມາ, ການສະເຫຼີມສະຫຼອງສົ່ງ ທ້າຍປີເກົ່າ-ຕ້ອນຮັບປີໃໝ່ລາວຂອງປວງຊົນລາວ ໃນຂອບເຂດທົ່ວປະເທດ ເປັນຕົ້ນແມ່ນຢູ່ນະຄອນຫຼວງວຽງຈັນ ຍັງມີຫຼາຍດ້ານທີ່ຍັງບໍ່ທັນສອດຄອງກັບກັບລະບຽບກົດໝາຍ ແລະ ຮີດຄອງປະເພນີອັນດີງາມຂອງລາວ ອັນດັບຕົ້ນໆ ກໍຄືດື່ມສິ່ງມຶນເມົາແລ້ວຂັບຂີ່ລົດ, ຫຼິ້ນສິ່ງເປີ້ເປື້ອນ ແລະ ລາມົກອະນາຈານເຊັ່ນ: ນໍ້າສີ, ນໍ້າເປື້ອນ ນໍ້າຄັນແກວ່ງຖົງນໍ້າ-ແກວ່ງນໍ້າກ້ອນໃສ່ກັນ, ນຸ່ງເຄື່ອງໂປ້ເປືອຍເຂົ້າວັດ ແລະ ສະຖານທີ່ຊຸມຊົນ, ບາງຈຸດຕັນທາງການສັນຈອນຕາມເສັ້ນທາງແລ້ວ ລັດລົດຫົດນໍ້າຢູ່ກາງທາງ, ເປີດສຽງດົນຕີເນືອງນັນລົບກວນຜູ້ອື່ນ ແລະ ກາຍກຳນົດເວລາ; ນອກນີ້, ຍັງມີບາງປະກົດການຫຍໍ້ທໍ້ທີ່ເກີດຂຶ້ນ, ເຊິ່ງພວກຄົນບໍ່ດີມັກສວຍໂອກາດໄລຍະນີ້ ເປັນຕົ້ນແມ່ນປຸ້ນຈີ້ຊິງຊັບ, ລັກຊັບ, ລວມໄປເຖິງບັນຫາຄາດ ຕະກໍາ ເຊິ່ງສ້າງຄວາມບໍ່ສະຫງົບ ແລະ ຄວາມບໍ່ ເປັນລະບຽບຮຽບຮ້ອຍໃນສັງຄົມ; ດັ່ງນັ້ນ ໃນປີ ໃໝ່ລາວ ພສ 2565 ທີ່ຈະມາເຖິງນີ້ ແຂວງ ໃນຂອບເຂດທົ່ວປະເທດ ກໍຄື ນະຄອນຫຼວງວຽງຈັນ ກໍໄດ້ວາງຄໍາສັ່ງ ເພື່ອໃຫ້ຈັດຕັ້ງປະຕິບັດ.
ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ ຖະແຫຼງວ່າ: ທ່າມກາງສະພາບທີ່ເຊື້ອພະຍາດໂຄວິດ 19 ຍັງສືບຕໍ່ແພ່ລະບາດໃນນະຄອນ ຫຼວງວຽງຈັນ. ສະນັ້ນ, ເພື່ອເຮັດໃຫ້ການສະເຫຼີມສະຫຼອງປີໃໝ່ລາວປີນີ້ມີບັນຍາກາດ ສະຫງົບອົບອຸ່ນ, ຖືກຕ້ອງຕາມຮີດຄອງ, ທີ່ ເຕັມໄປດ້ວຍຄວາມສະມັກຄີ, ໄມຕີມິດຕະພາບ, ຮັກສາໄດ້ວັດທະນາທໍາ, ຮີດຄອງປະເພນີ, ຂະນົບທໍານຽມອັນດີງາມ ຮັບປະກັນຄວາມສະຫງົບ, ປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ ເຈົ້າຄອງນະຄອນຫຼວງວຽງຈັນ ອອກຄໍາສັ່ງ 6 ຂໍ້ຫ້າມຄື:
- ຫ້າມອົງການຈັດຕັ້ງຂອງລັດ, ເອກະຊົນ ແລະ ສັງຄົມ ຢູ່ໃນນະຄອນຫຼວງວຽງຈັນ ຈັດງານລ້ຽງ-ງານອວຍພອນ ເພື່ອປ້ອງກັນການຕິດເຊື້ອ ແລະ ແພ່ເຊື້ອໂຄວິດ ໃຫ້ມີຄວາມເຂັ້ມງວດ ທັງເປັນການປະຢັດມັດທະຍັດ.
- ຫ້າມຈັດຄອນເສີດ, ເປີດເຄື່ອງຂະຫຍາຍສຽງ ຫຼື ເສບດົນຕີ ແລະ ສະແດງສີລະປະກາງແຈ້ງ ຢູ່ຕາມສະຖານທີ່ຕ່າງໆ ເຊັ່ນ: ບໍລິເວນວັດ, ສະຖານທີ່ທ່ອງທ່ຽວ, ສວນອາຫານ, ສວນນໍ້າ ແລະ ອື່ນໆ.
- ຫ້າມຫົດສາດນໍ້າສີ-ນໍ້າເປື້ອນ, ນໍ້າມັນ ແລະ ນໍາໃຊ້ພາຫະນະເລາະສາດນໍ້າໃສ່ກັນຕາມຖະໜົນ, ຮ່າຍນໍ້າໃສ່ຖົງຢາງ ຫຼື ພາສະນະອື່ນໆ ເພື່ອດຶກໃສ່ກັນ.
- ຫ້າມນຸ່ງເຄື່ອງໂປ້ເປືອຍ ແລະ ປະພຶດລາມົກອະນາຈານຢູ່ຕາມວັດອາຮາມ, ສະຖານທີ່ສັກ ກະລະບູຊາ ແລະ ສະຖານທີ່ຕ່າງໆ.
- ຫ້າມຜູ້ດື່ມເຄື່ອງດື່ມທີ່ມີທາດເຫຼົ້າ ແລະ ເສບສິ່ງມຶນເມົາຂັບລົດ, ຜູ້ຂັບລົດບໍ່ໃຫ້ດື່ມເຄື່ອງ ດື່ມທີ່ມີທາດເຫຼົ້າ ແລະ ເສບສິ່ງມຶນເມົາ.
- ຫ້າມຈູດກະໂພກ, ກໍ່ສຽງແຕກ ແລະ ເປີດສຽງດົນຕີເນືອງນັນລົບກວນຜູ້ອື່ນ. ຢ່າງໃດກໍຕາມ, ການສະເຫຼີມສະຫຼອງບຸນປີ ໃໝ່ລາວລາວນີ້ ເຈົ້າໜ້າທີ່ໄດ້ຝາກເຕືອນສະຕິມາ ຍັງພໍ່-ແມ່ປະຊາຊົນໃຫ້ມີຄວາມລະມັດລະວັງ ເປັນຢ່າງສູງເປັນຕົ້ນການຈະເດີນທາງໄປທ່ຽວກໍ ຕ້ອງມ້ຽນມັດຊັບສິນໄວ້ໃຫ້ດີ ຕ້ອງມີຜູ້ເຝົ້າເຮືອນ ເພື່ອປ້ອງກັນບໍ່ໃຫ້ກຸ່ມຄົນບໍ່ດີລັກຊັບ ຕະຫຼອດຮອດການນໍາໃຊ້ຟືນໄຟ ເຂົ້າໃນການດໍາລົງຊີວິດ ເພື່ອປ້ອງກັນບໍ່ໃຫ້ມີອັກຄີໄພເກີດຂຶ້ນ. ນອກນີ້, ກໍພ້ອມກັນປະຕິບັດກົດລະບຽບ ແລະ ຂໍ້ຫ້າມທາງເຈົ້າໜ້າທີ່ວາງອອກຢ່າງເຂັ້ມງວດ.