ກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງປ້ອງກັນຄວາມສະຫງົບ ສສ ຫວຽດນາມ ໄດ້ຈັດກອງປະຊຸມພົບປະແລກປ່ຽນກ່ຽວກັບ ວຽກງານປັບປຸງກົງຈັກການຈັດຕັ້ງ ໃນວັນທີ 11 ມັງກອນ 2023 ທີ່ກະຊວງປ້ອງກັນຄວາມສະຫງົບລາວ ເພື່ອຮັບໃຊ້ໃຫ້ແກ່ການເຄື່ອນໄຫວຂອງກໍາລັງປ້ອງກັນຄວາມສະຫງົບ ສປປ ລາວ ໃນຕໍ່ໜ້າ ໃຫ້ແທດເໜາະກັບສະພາບການຕົວຈິງໃນປັດຈຸບັນ.
ຝ່າຍລາວ ນຳໂດຍ ພົຈວ ຄອນສະຫວັນ ສົມພະໄຊ ຮອງຫົວໜ້າກົມໃຫຍ່ການເມືອງ ຫົວໜ້າກົມພະນັກງານ ກົມໃຫຍ່ການເມືອງ ກະຊວງ ປກສ ລາວ, ຝ່າຍ ສສ ຫວຽດນາມ ນຳໂດຍ ພັອ ເລ ມິງ ທ້າວ ຮອງຫົວໜ້າກົມຈັດຕັ້ງພະນັກງານ ກະຊວງຕຳຫຼວດ ສສ ຫວຽດນາມ, ມີບັນດາຄະນະຜູ້ແທນທັງສອງຝ່າຍ ເຂົ້າຮ່ວມ.
![](https://www.lsecuritynews.com/wp-content/uploads/2023/01/DSC_8359-1-1024x652.jpg)
![](https://www.lsecuritynews.com/wp-content/uploads/2023/01/DSC_8386-1024x651.jpg)
ໃນກອງປະຊຸມ, ພົຈວ ຄອນສະຫວັນ ສົມພະໄຊ ໄດ້ສະເໜີແລກປ່ຽນວຽກງານການປັບປຸງລະບົບກົງຈັກການຈັດຕັ້ງ ພາຍໃນກະຊວງປ້ອງກັນຄວາມສະຫງົບລາວ ໂດຍສະເພາະ ປະຕິບັດຕາມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ໄດ້ຊີ້ນໍາໃຫ້ກໍາລັງປ້ອງກັນຄວາມສະຫງົບ ຄົ້ນຄວ້າການປັບປຸງກົງຈັກການຈັດຕັ້ງຂັ້ນກົມໃຫຍ່ ໂດຍຍົກສູງປະສິດທິພາບຂອງວຽກງານຕາມທິດກະທັດຮັດ ແລະ ດ້ວຍເຫດຜົນ.
![](https://www.lsecuritynews.com/wp-content/uploads/2023/01/DSC_8373-1-1024x573.jpg)
ປັດຈຸບັນ, ຄະນະຮັບຜິດຊອບ ໄດ້ຄົ້ນຄວ້າເນື້ອໃນ ແລະ ຈັດກອງປະຊຸມສໍາມະນາວິທະຍາສາດ ຄົ້ນຄວ້າປັບປຸງກົງຈັກການຈັດຕັ້ງ ຍຸບຂັ້ນກົມໃຫຍ່ ຢູ່ບັນດາກົມກອງ-ທ້ອງຖິ່ນ ເພື່ອສ້າງຄວາມເປັນເອກະພາບ, ລະດົມຄວາມຄິດເຫັນ ແລະ ການປະກອບສ່ວນຢ່າງຕັ້ງໜ້າຂອງກຳລັງປ້ອງກັນຄວາມສະຫງົບ ນັບແຕ່ຂັ້ນສູນກາງຮອດທ້ອງຖິ່ນ, ບົນພື້ນຖານຖອດຖອນບົດຮຽນ ການຈັດຕັ້ງປະຕິບັດຕາມຮູບແບບ, ກົນໄກ ແລະ ໂຄງປະກອບການຈັດຕັ້ງຂອງ ກະຊວງຕຳຫຼວດ ຫວຽດນາມ ທີ່ໄດ້ຈັດຕັ້ງເຮັດສຳເລັດກ່ອນແລ້ວ.
![](https://www.lsecuritynews.com/wp-content/uploads/2023/01/DSC_8381-1024x542.jpg)
ການຈັດຕັ້ງປະຕິບັດວຽກງານດັ່ງກ່າວ ຄາດກະວ່າ: ແຕ່ນີ້ຫາເດືອນມີນາ 2023 ຈະສຳເລັດ ເພື່ອນຳສະເໜີກົມການເມືອງສູນກາງພັກ ພິຈາລະນາຕົກລົງ ແລ້ວຈຶ່ງຈະສາມາດຈັດຕັ້ງຜັນຂະຫຍາຍກ້າວເຂົ້າສູ່ການຍຸບ-ໂຮມບັນດາກົມ ແລະ ສັບຊ້ອນ-ຈັດວາງພະນັກງານຕາມສະພາບເງື່ອນໄຂຕົວຈິງ; ຄຽງຄູ່ກັນນັ້ນ, ຄະນະຮັບຜິດຊອບ ໄດ້ກະກຽມສ້າງແຜນດຳເນີນງານປັບປຸງ ແລະ ສ້າງບັນດານິຕິກຳ, ກົນໄກປະສານງານ, ສິດ-ພາລະບົດບາດທີ່ກ່ຽວຂ້ອງ ເພື່ອຮັບໃຊ້ໃຫ້ແກ່ການເຄື່ອນໄຫວຂອງກໍາລັງປ້ອງກັນຄວາມສະຫງົບ ໃນຕໍ່ໜ້າ (ເມື່ອມີການຍຸບກົມໃຫຍ່).
![](https://www.lsecuritynews.com/wp-content/uploads/2023/01/DSC_8398-1024x574.jpg)
ສຳລັບໂຄງຮ່າງການຈັດຕັ້ງຂອງ ກະຊວງປ້ອງກັນຄວາມສະຫງົບລາວ ໃນປັດຈຸບັນ ແມ່ນມີ 15 ຫົວໜ່ວຍ ແລະ ມີ 18 ກອງບັນຊາການ ປກສ ແຂວງ-ນະຄອນຫຼວງ ຂຶ້ນກັບ; ຢູ່ຂັ້ນກະຊວງ ມີ 4 ກົມໃຫຍ່ ແລະ 1 ຫ້ອງວ່າການກະຊວງ, ມີ 5 ກົມ, 3 ກອງບັນຊາການ ແລະ 2 ວິທະຍາຄານ; ໃນນັ້ນ, ມີ 70 ກົມນ້ອຍ ແລະ ທຽບເທົ່າ ທີ່ຂຶ້ນກັບ ກົມໃຫຍ່-ຫ້ອງວ່າການ.