ວັນທີ 24 ມີນາ ຜ່ານມາ, ກົມຄົ້ນຄວ້າວິທະຍາສາດ ແລະ ປະຫວັດສາດ ( ກົມ 512 ) ໄດ້ຈັດຕັ້ງການບໍລິຈາກເລືອດ ໂດຍແມ່ນສະຖາບັນເລືອດແຫ່ງຊາດ ທີ່ລົງມາຮັບບໍລິຈາກເລືອດ; ເຊິ່ງບັນດາພະນັກງານພາຍໃນກົມກໍມີນໍ້າໃຈຊ່ວຍເຫຼືອເຂົ້າຮ່ວມບໍລິຈາກເລືອດ ແບບບໍ່ຫວັງສິ່ງຕອບແທນ ຢ່າງເປັນຂະບວນຟົດຟື້ນ, ມີພະນັກງານຮ່ວມບໍລິຈາກເລືອດ ຈຳນວນ 18 ສະຫາຍ ໄດ້ເລືອດທີ່ສາມາດນໍາໃຊ້ໄດ້ 18 ຖົງ.
ພິທີຮັບບໍລິຈາກເລືອດໃນຄັ້ງນີ້, ມີ ພັທ ທັດສະພອນ ວົງພະຈັນ ຮອງຫົວໜ້າກົມ 512, ທ່ານ ນາງ ຈີລະພາ ແກ້ວຄຳຜຸຍ ຮອງຫົວໜ້າສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ, ພັທ ບຸນແກ້ວ ບຸນມາວົງຄຳ ຜູ້ປະສານງານຈາກກົມເສນາຮັກ ກົມໃຫຍ່ພະລາທິການ ກະຊວງ ປກສ, ພ້ອມດ້ວຍພະນັກງານທີ່ກ່ຽວຂ້ອງຈາກສະຖາບັນເລືອດແຫ່ງຊາດ ແລະ ພະນັກງານພາຍໃນກົມ 512 ເຂົ້່າຮ່ວມ.
ພັທ ທັດສະພອນ ວົງພະຈັນ ກ່າວວ່າ: ການຈັດຕັ້ງຮັບບໍລິຈາກເລືອດໃນຄັ້ງນີ້ ແມ່ນເພື່ອເປັນການຊ່ວຍເຫຼືອເພື່ອນມະນຸດດ້ວຍກັນ ໂດຍສະເພາະແມ່ນຊ່ວຍເຫຼືອຄົນເຈັບທີ່ຕ້ອງການໃສ່ເລືອດຢູ່ຕາມໂຮງໝໍໃນຂອບເຂດທົ່ວປະເທດ ເພື່ອກອບກູ້ເອົາຊີວິດ ແລະ ເຮັດໃຫ້ສາມາດກັບຄືນມາດຳລົງຊີວິດຮ່ວມກັນໃນສັງຄົມໄດ້ຢ່າງເປັນປົກກະຕິ ເພາະວ່າເລືອດບໍ່ສາມາດເອົາມາຈາກບ່ອນອື່ນໄດ້ ແລະ ບໍ່ມີໂຮງງານໃດທີ່ສາມາດຜະລິດເລືອດໄດ້ ມີແຕ່ບໍລິຈາກຄົນຕໍ່ຄົນເທົ່ານັ້ນ; ເຊິ່ງໄລຍະຜ່ານມາທາງກົມ 512 ກໍໄດ້ເຂົ້າຮ່ວມຂະບວນການບໍລິຈາກເລືອດທີ່ກະຊວງຈັດຂຶ້ນຫຼາຍຄັ້ງ ໂດຍໃນແຕ່ລະຄັ້ງພະນັກງານກໍມີຄວາມກະຕືລືລົ້ນໃນການຮ່ວມບໍລິຈາກເລືອດແບບບໍ່ຫວັງສິ່ງຕອບແທນເປັນຢ່າງດີ.
ໂອກາດນີ້, ທ່ານ ນາງ ຈີລະພາ ແກ້ວຄຳຜຸຍ ໃຫ້ຮູ້ວ່າ: ເງື່ອນໄຂສຳລັບຜູ້ບໍລິຈາກເລືອດ: ເພດຊາຍອາຍຸ 17-65 ປີ, ເພດຍິງ ອາຍຸ 17-60 ປີ, ນ້ຳໜັກ 45 ກິໂລກຼາມ ຂຶ້ນໄປ. ເຊິ່ງການບໍລິຈາກເລືອດ ສາມາດຊ່ວຍຫຼຸດຜ່ອນຄວາມສ່ຽງຈາກພະຍາດຫົວໃຈ, ຫຼຸດຜ່ອນຄວາມສ່ຽງຈາກພະຍາດມະເຮັງ, ຫຼຸດລະດັບຄໍເລສເຕຼຣໍ, ສົ່ງເສີມການສ້າງຈຸລັງໃໝ່ ແລະ ໄດ້ກະຕຸ້ນການເຮັດວຽກຂອງແອ້ກະດູກ.