ປະເທດສິງກະໂປ, ວັນທີ 17 ພະຈິກ 2023 – ຜູ້ປະກອບການເພື່ອສັງຄົມ ຈໍານວນ 6 ທີມ ຈາກ 5 ປະເທດໄດ້ຮັບຊະນະເລີດໃນໂຄງການຜູ້ປະກອບການໄວໜຸ່ມເພື່ອສັງຄົມ (Young Social Entrepreneurs, YSE) ທົ່ວໂລກ ປະຈໍາປີນີ້ ເຊິ່ງຈັດຕັ້ງຂຶ້ນໂດຍ ມູນນິທິສາກົນສິງກະໂປ (SIF). ທີມດັ່ງກ່າວແມ່ນມີຕົວແທນ 15 ທ່ານ ທີ່ເປັນຊາວໜຸ່ມຈາກປະເທດຈີນ, ອິນເດຍ, ອິນໂດເນເຊຍ, ລາວ ແລະ ສິງກະໂປ.
ທີມດັ່ງກ່າວໄດ້ນໍາສະເໜີແນວຄວາມຄິດທາງທຸລະກິດທີ່ພົ້ນເດັ່ນທີ່ສຸດທີ່ສາມາດແກ້ໄຂສາເຫດທາງດ້ານສັງຄົມ ແລະ ສິ່ງແວດລ້ອມ ລວມທັງການບໍລິການທາງສຸຂະພາບຈິດ, ການອະນຸລັກນ້ໍາ, ການສະໜອງທັກສະ ແລະ ເຕັກໂນໂລຊີສໍາລັບຊຸມຊົນທີ່ຂາດແຄນ ແລະ ການສ້າງຄວາມເຂັ້ມແຂງໃຫ້ແກ່ແມ່ຍິງ.
ໂຄງການ YSE GLOBAL ນີ້ຍັງປະສົບຜົນສໍາເລັດສູງທີ່ສຸດໃນຮອບ 14 ປີ ຂອງການໃຫ້ການສະໜັບສະໜູນທາງດ້ານການໃຫ້ຄໍາປຶກໃນໂຄງການ.
ທີ່ປຶກສາອາສາສະໝັກທັງໝົດ ຈໍານວນ 82 ທ່ານ ໄດ້ໃຊ້ເວລາຫຼາຍກວ່າ 330 ຊົ່ວໂມງ ເຮັດວຽກຮ່ວມກັບທີມທີ່ເຂົ້າຮ່ວມແຂ່ງຂັນໃນປີນີ້, ເຊິ່ງມີຈໍານວນຊົ່ວໂມງເພີ່ມຂຶ້ນເຖິງ 32% ຖ້າປຽບທຽບໃສ່ປີທີ່ຜ່ານມາ.
ການສະໜັບສະໜູນທາງດ້ານການໃຫ້ຄໍາປຶກສາໄດ້ເລີ່ມຕົ້ນໃນກອງປະຊຸມ YSE Global ປະຈໍາປີ 2023 ທີ່ຈັດຂຶ້ນໃນລະຫວ່າງວັນທີ 7 ຫາ 10 ເດືອນມິຖຸນາ. ທີ່ປຶກສາອາສາສະໝັກປະກອບດ້ວຍຊ່ຽວຊານດ້ານທຸລະກິດ ແລະ ຜູ້ປະກອບການເພື່ອສັງຄົມທີ່ມີຊື່ສຽງ ແລະ ພວກເຂົາໄດ້ຊ່ວຍ 46 ທີມເພື່ອເສີມສ້າງພື້ນຖານ ແລະ ຍຸດທະສາດທຸລະກິດຂອງພວກເຂົາ.
ທີມທັງໝົດ 15 ທີມ ຈາກກອງປະຊຸມທີ່ຈັດຂຶ້ນໃນເດືອນມິຖຸນາ ປະສົບຜົນສໍາເລັດໃນການຖືກຄັດເລືອກໃຫ້ເຂົ້າໄປໃນຮອບຕໍ່ໄປຂອງໂຄງການ ແລະ ໄດ້ຮັບການຊ່ວຍເຫຼືອຈາກທີ່ປຶກສາອາສາສະໝັກເຖິງ 3 ທ່ານ ຕັ້ງແຕ່ເດືອນກໍລະກົດ ຫາ ເດືອນຕຸລາ. ທີ່ປຶກສາອາສາສະໝັກປະກອບມີທີ່ປຶກສາທຸລະກິດຊັ້ນນໍາຈາກບໍລິສັດ McKinsey & Company, Temasek International, Bain & Company ແລະ ຊ່ຽວຊານໃນອຸດສາຫະກໍາຕ່າງໆ.
ໃນໄລຍະ 4 ເດືອນນີ້, ທີ່ປຶກສາອາສາສະໝັກມີບົດບາດສຳຄັນໃນການຊີ້ນຳບັນດາຜູ້ເຂົ້າຮ່ວມການແຂ່ງຂັນໃນການດຳເນີນທຸລະກິດເພື່ອສັງຄົມ. ພວກເຂົາຍັງໄດ້ຊ່ວຍກະກຽມທີມສໍາລັບກິດຈະກໍາທີ່ມີຊື່ວ່າ ການນໍາສະເໜີເພື່ອການປ່ຽນແປງ, ເຊິ່ງໄດ້ຖືກກໍານົດຂຶ້ນໃນເດືອນພະຈິກ ແລະ ຍັງຖືເປັນເຫດການສຸດທ້າຍສໍາລັບໂຄງການ YSE GLOBAL. ໃນງານດັ່ງກ່າວນີ້, ທີມຕ່າງໆໄດ້ນໍາສະເໜີແຜນທຸລະກິດທີ່ໄດ້ຮັບການປັບປຸງຂອງຕົນໃຫ້ແກ່ຄະນະກຳມະການຕັດສິນເພື່ອຍາດເອົາການສະໜອງທຶນ.
ທ່ານນາງ ມາດີຢາ ອາດີນາ (Mahdiyyah Ardhina), ສະມາຊິກຂອງ ຣູມາ ບຣີເກັດ (Rumah Briket) ແລະ ຜູ້ເຂົ້າຮ່ວມ YSE ປະຈໍາປີ 2023 ຈາກປະເທດອິນໂດເນເຊຍກ່າວວ່າ: “ໂຄງການ YSE GLOBAL ເປັນຫຼັກສູດທີ່ເຂັ້ມງວດສໍາລັບທີມຂອງພວກເຮົາຍ້ອນວ່າພວກເຮົາຍັງໃໝ່ໃນທຸລະກິດຂອງພວກເຮົາ. ພວກເຮົາຂໍຂອບໃຈທີ່ປຶກສາທຸກທ່ານສໍາລັບປະສົບການ ແລະ ການໃຫ້ຂໍ້ມູນຂອງພວກເຂົາ. ພວກເຂົາເປັນບຸກຄົນທີ່ມີຄຸນຄ່າສໍາລັບພວກເຮົາໃນຫຼາຍເດືອນທີ່ຜ່ານມານີ້. ພວກເຂົາໄດ້ໃຫ້ຄວາມຮູ້ທີ່ສໍາຄັນໂດຍອີງໃສ່ປະສົບການດ້ານວິຊາຊີບໃນຫຼາຍປີ ແລະ ໃຫ້ທັດສະນະໃໝ່ໆກ່ຽວກັບແຜນທຸລະກິດຂອງພວກເຮົາ.” ຣູມາ ບຣີເກັດ ໄດ້ສ້າງແນວທາງການແກ້ໄຂສິ່ງເສດເຫຼືອໃຫ້ເປັນສູນ ທີ່ປ່ຽນສິ່ງເສດເຫຼືອອິນຊີ ແລະ ສິ່ງເສດເຫຼືອທີ່ບໍ່ແມ່ນອິນຊີ ແລະ ແປຮູບປ່ຽນໃຫ້ເປັນຖ່ານອັດກ້ອນ ແລະ ດິນຈີ່ປູທາງຍ່າງ.
ທ່ານ ດຣ. ໂຍກ ປີນ ທີ (Yoke Pean Thye), ຜູ້ຮ່ວມກໍ່ຕັ້ງຂອງ WISE, ເຊິ່ງເປັນອົງການທີ່ບໍ່ຫວັງຜົນກຳໄລທີ່ເຮັດວຽກເພື່ອກ້າວໄປສູ່ ອາຊີຕາເວັນອອກສຽງໃຕ້ ທີ່ມີຄວາມຍືນຍົງ ແລະ ມີຄວາມສະເໝີພາບ, ແລະ ເປັນທີ່ປຶກສາອາສາສະໝັກໃຫ້ແກ່ ຣູມາ ບຣີເກັດ, ໄດ້ກ່າວວ່າ: “ສິ່ງນີ້ເປັນກຽດໃຫ້ແກ່ຂ້າພະເຈົ້າທີ່ໄດ້ສະໜັບສະໜູນທີມງານ. ຂ້າພະເຈົ້າຂໍສະແດງຄວາມຮູ້ບຸນຄຸນສໍາລັບໂອກາດທີ່ຈະໄດ້ມອບກັບຄືນ ແລະ ຊ່ວຍ ຣູມາ ບຣີເກັດ ເພື່ອທົບທວນ ແລະ ປັບປຸງຮູບແບບທຸລະກິດຂອງພວກເຂົາ ພາຍຫຼັງທີ່ຂ້າພະເຈົ້າໄດ້ຮັບຜົນປະໂຫຍດຈາກກອງປະຊຸມລະດັບພາກພື້ນຂອງ YSE ໃນຫຼາຍປີກ່ອນ. ຂ້າພະເຈົ້າມີຄວາມປຶ້ມປິຕິ ແລະ ໄດ້ແຮງບັນດານໃຈຈາກເຈດຈໍານົງໃນການແກ້ໄຂວິກິດການຄຸ້ມຄອງສິ່ງເສດເຫຼືອຢູ່ປະເທດອິນໂດເນເຊຍ, ການອຸທິດຕົນໃຫ້ແກ່ທຸລະກິດເພື່ອສັງຄົມຂອງພວກເຂົາ ແລະ ການສ້າງຜົນປະໂຫຍດຕໍ່ຊຸມຊົນ, ລວມທັງ ແຮງຈູງໃຈທີ່ຈະຮຽນຮູ້ ແລະ ທ້າທາຍຕົວພວກເຂົາເອງ.”
ທ່ານ ດຣ. ໂຍກ ປີນ ທີ ຍັງໄດ້ຊຸກຍູ້ໃຫ້ປະຊາຊົນລົງທະບຽນເປັນທີ່ປຶກສາອາສາສະໝັກໃຫ້ຫຼາຍຂຶ້ນຕື່ມ ສໍາລັບໂຄງການ YSE GLOBAL. ທ່ານຍັງໄດ້ກ່າວວ່າ: “ມັນເປັນເສັ້ນທາງທີ່ມີຄວາມໝາຍສໍາລັບຜູ້ທີ່ມີຄວາມກະຕືລືລົ້ນທີ່ຈະແບ່ງປັນປະສົບການຂອງພວກເຂົາກັບໄວໜຸ່ມ ຜູ້ທີ່ກຳລັງຊອກຫາເສັ້ນທາງເດີນທີ່ມີຜົນກະທົບຕໍ່ສັງຄົມຂອງພວກເຂົາ.”
ທ່ານ ລຽນ ວີ ແຈວ (Lian Wee Cheow), ຮອງປະທານ ມູນນິທິ SIF ແລະ ເປັນຫົວໜ້າຄະນະກໍາມະການຂອງໂຄງການ YSE GLOBAL ປະຈໍາປີ 2023 ໄດ້ກ່າວວ່າ: “ການໃຫ້ຄໍາປຶກສາແມ່ນສ່ວນປະກອບສໍາຄັນຂອງໂຄງການ YSE GLOBAL. ທີ່ປຶກສາອາສາສະໝັກ YSE ຂອງພວກເຮົາ, ຜູ້ທີ່ເປັນຜູ້ນໍາໃນອຸດສາຫະກໍາທີ່ມີປະສົບການອັນໃຫຍ່ຫຼວງ, ໄດ້ໃຫ້ຄໍາໝັ້ນທີ່ຈະໃຫ້ເວລາຂອງພວກເຂົາທີ່ຈະແບ່ງປັນຄວາມຊໍານິຊໍານານ ແລະ ເຄືອຂ່າຍຂອງພວກເຂົາໃຫ້ກັບບັນດາຜູ້ສ້າງການປ່ຽນແປງທີ່ເຕັມໄປດ້ວຍແຮງບັນດານໃຈພວກເຮົາ. ສິ່ງນີ້ໄດ້ເປີດກ້ວາງມູມມອງຂອງຜູ້ເຂົ້າຮ່ວມໄວໜຸ່ມຂອງພວກເຮົາທີ່ຢູ່ໃນຈຸດເລີ່ມຕົ້ນທີ່ສໍາຄັນຂອງການເດີນທາງຂອງພວກເຂົາໃນຖານະຜູ້ປະກອບການເພື່ອສັງຄົມ.”
ທ່ານ ລຽນ ວີ ແຈວ ຍັງໄດ້ກ່າວຕື່ມວ່າ: “ນັບຕັ້ງແຕ່ປີ 2010, ໂຄງການ YSE GLOBAL ໄດ້ສະໜັບສະໜູນເຄືອຂ່າຍທີ່ກໍາລັງເຕີບໃຫຍ່ຂະຫຍາຍຕົວ, ເຊິ່ງໃນປັດຈຸບັນປະກອບມີຊາວໜຸ່ມຫຼາຍກວ່າ 1,400 ຄົນຈາກ 43 ປະເທດ, ເຊິ່ງເປັນຕົວແທນຂອງວິສາຫະກິດເພື່ອສັງຄົມ ເຖິງ 674 ແຫ່ງ. ໂດຍການໃຫ້ຄໍາແນະນໍາ, ກອງປະຊຸມການສ້າງຄວາມອາດສາມາດ ແລະ ໂອກາດໃນການຮຽນຮູ້ໃນພາກພື້ນ, ໂຄງການ YSE ສະໜັບສະໜູນກຸ່ມທີ່ກໍາລັງຈະເປັນຜູ້ປະກອບການເພື່ອສັງຄົມເພື່ອເລີ່ມຕົ້ນການເດີນທາງຂອງພວກເຂົາ.”
6 ໃນ 15 ທີມທີ່ໄດ້ຖືກຄັດເລືອກ ໄດ້ຮັບການປະກາດເປັນຜູ້ຊະນະເລີດໃນເວລາທີ່ພວກເຂົາເຂົ້າຮ່ວມ ການນໍາສະເໜີເພື່ອການປ່ຽນແປງ ອອນລາຍ ໃນວັນທີ 17 ພະຈິກ. ພວກເຂົາໄດ້ຖືກຄັດເລືອກໂດຍອີງໃສ່ຜົນກະທົບ ແລະ ຂະໜາດຂອງແນວຄວາມຄິດທຸລະກິດຂອງພວກເຂົາ, ລວມທັງ ລະດັບຄວາມມຸ່ງໝັ້ນຂອງພວກເຂົາ. ທີມທີ່ຖືກຄັດເລືອກລວມມີ (ຕາມລໍາດັບຕົວອັກສອນພາສາອັງກິດ):
- ອານຸບູຕີ ຊາມິຕີ (Anubhuti Samiti) (ປະເທດອິນເດຍ)
- ໄຊນາ ຮາວ (China House) (ປະເທດຈີນ)
- ໂຮມພາວ (HomePal) (ປະເທດສິງກະໂປ ແລະ ຈີນ)
- ເລີລາວ (LeLao) (ປະເທດລາວ)
- ຣີເສີໂວແອ (ReservoAir) (ປະເທດອິນໂດເນເຊຍ)
- ຣູມາ ບຣີເກັດ (Rumah Briket) (ປະເທດອິນໂດເນເຊຍ)
ແຕ່ລະທີມໄດ້ຮັບລາງວັນເງິນທຶນສູງເຖິງ 20,000 ໂດລາສິງກະໂປ ເພື່ອເປີດຕົວ ຫຼື ຂະຫຍາຍທຸລະກິດເພື່ອສັງຄົມຂອງພວກເຂົາ. ທີ່ປຶກສາອາສາສະໝັກຈະຖືກມອບໝາຍເພື່ອແນະນຳວິທີການນຳໃຊ້ເງິນທຶນ ແລະ ສະໜັບສະໜູນການພັດທະນາຂອງພວກເຂົາໃນອີກ 1 ປີເຄິ່ງ.
ທ່ານ ອີຣິກ ຈວາ (Eric Chua), ເລຂາທິການລັດຖະສະພາອາວຸໂສ, ກະຊວງວັດທະນະທຳ, ຊຸມຊົນ ແລະ ຊາວໜຸ່ມ ແລະ ກະຊວງພັດທະນາສັງຄົມ ແລະ ຄອບຄົວ ຂອງປະເທດສິງກະໂປ, ໄດ້ເປັນແຂກຜູ້ມີກຽດ ທີ່ເຂົ້າຮ່ວມງານໃນຄັ້ງນີ້. ໃນບົດກ່າວ, ທ່ານ ອີຣິກ ຈວາ ໄດ້ຊົມເຊີຍຄວາມຕັ້ງໃຈຂອງບັນດາທີມຕ່າງໆທີ່ແກ້ໄຂບັນຫາທີ່ຫຍຸ້ງຍາກດ້ວຍຄວາມຄິດສ້າງສັນ ແລະ ຄວາມຢືດຢຸ່ນ.
ທ່ານໄດ້ກ່າວວ່າ: “ທີມເຫຼົ່ານີ້ໄດ້ສຸມເຫື່ອແຮງໃສ່ສາເຫດຕ່າງໆທາງສັງຄົມທີ່ພວກເຂົາສົນໃຈຢ່າງເລິກເຊິ່ງ. ພວກເຂົາໄດ້ນໍາສະເໜີແນວຄວາມຄິດທີ່ໜ້າສົນໃຈຫຼາຍ – ຈາກການເຂົ້າເຖິງການບໍລິການສຸຂະພາບຈິດ, ການຈັດຕັ້ງປະຕິບັດແບບຍືນຍົງ, ຄວາມສະເໝີພາບດ້ານການສຶກສາ ແລະການສະໜັບສະໜູນຊຸມຊົນທີ່ມີຄວາມສ່ຽງ. ຫຼາຍຄົນໄດ້ເວົ້າຢ່າງກະຕືລືລົ້ນຕໍ່ກັບການສ້າງການປ່ຽນແປງທີ່ມີຄວາມໝາຍໃນສັງຄົມ. ຂ້າພະເຈົ້າປະທັບໃຈຕໍ່ກັບຄວາມກະຕືລືລົ້ນຂອງພວກເຂົາໃນຄວາມຕ້ອງການທີ່ຈະຮັບໃຊ້ຄົນອື່ນ ແລະ ການອຸທິດຕົນຂອງພວກເຂົາໃນການແນມເບິ່ງໄກກວ່າຄວາມຕ້ອງການໃນປັດຈຸບັນ ເພື່ອປະດິດສ້າງວິທີການແກ້ໄຂສໍາລັບຊຸມຊົນໂດຍລວມ. ນີ້ບໍ່ແມ່ນການເຮັດວຽກທີ່ງ່າຍດາຍເລີຍ.”
ທ່ານ ໄລ ໂຮຍ ບິງ (Lai Hoi Bing), ຜູ້ຮ່ວມກໍ່ຕັ້ງຂອງ ໂຮມພາວ (Homepal) ຈາກປະເທດສິງກະໂປ, ໄດ້ກ່າວວ່າ: “ໂຄງການ YSE GLOBAL ເປັນໂຄງການທີ່ໃຫ້ປະສົບການທີ່ດີ ແລະ ມີຄຸນຄ່າ ທີ່ບໍ່ເຄີຍມີມາກ່ອນ. ຄລີນິກທຸລະກິດ ແລະ ກອງປະຊຸມເຝິກອົບຮົມຕ່າງໆໄດ້ໃຫ້ທັກສະ ແລະ ຄວາມຮູ້ທີ່ກ່ຽວຂ້ອງ ແກ່ທີມຂອງຂ້າພະເຈົ້າ ເຊັ່ນ: ການນຳໃຊ້ເຄື່ອງມືອອກແບບຮູບແບບທຸລະກິດເພື່ອສັງຄົມເພື່ອປັບປ່ຽນຍຸດທະສາດການຕະຫຼາດ ແລະ ການຄິດໄລ່ຜົນກະທົບທາງສັງຄົມຂອງພວກເຮົາ.
ພວກເຮົາຫວັງວ່າຈະນຳໃຊ້ການຮຽນຮູ້ໃໝ່ເຫຼົ່ານີ້ເພື່ອຊຸກຍູ້ທຸລະກິດເພື່ອສັງຄົມຂອງພວກເຮົາໄປສູ່ລະດັບຕໍ່ໄປ. ພວກເຮົາຫວັງວ່າຈະຂະຫຍາຍທຸລະກິດເພື່ອສັງຄົມຂອງພວກເຮົາດ້ວຍການຊ່ວຍເຫຼືອລ້ານີ້.” ໂຮມພາວ ເປັນທຸລະກິດເພື່ອສັງຄົມຈາກປະເທດສິງກະໂປ ແລະ ປະເທດຈີນ ທີ່ສະໜັບສະໜູນຜູ້ສູງອາຍຸໂດຍຜ່ານການພັດທະນາລະບົບອິນເຕີເນັດ (IoT) ໂດຍການນໍາໃຊ້ແນວທາງການແກ້ໄຂທີ່ມີການຕິດຕາມເຮືອນທີ່ຮັກສາຄວາມເປັນສ່ວນຕົວ ແລະ ຄວາມປອດໄພ.
ທ່ານ ນາງ ມະນີທິບ ວົງພະຈັນ, ຜູ້ຮ່ວມກໍ່ຕັ້ງ ເລີລາວ (LeLao) ຈາກປະເທດລາວ, ໄດ້ຮັບແຮງບັນດານໃຈຈາກທີມງານ YSE GLOBAL ອື່ນໆ. ນາງໄດ້ກ່າວວ່າ: “ໂຄງການໄດ້ແນະນຳຂ້າພະເຈົ້າໃຫ້ຮູ້ຈັກກັບເຄືອຂ່າຍຂອງໝູ່ເພື່ອນທີ່ມີແນວຄວາມຄິດແບບດຽວກັນໃນທົ່ວໂລກ ຜູ້ທີ່ກໍາລັງເຮັດວຽກທີ່ໜ້າສົນໃຈເພື່ອສ້າງຄວາມແຕກຕ່າງໃນທາງທີ່ດີຕໍ່ສັງຄົມ. ພາກສ່ວນທີ່ຂ້າພະເຈົ້າມັກທີ່ສຸດຂອງໂຄງການແມ່ນເວລາທີ່ພວກເຮົາໄດ້ແລກປ່ຽນຄວາມຄິດ ແລະ ຮຽນຮູ້ຂໍ້ມູນໃໝ່ໆກ່ຽວກັບຊຸມຊົນຂອງພວກເຮົາ.
ຂ້າພະເຈົ້າຮູ້ສຶກໂດດດ່ຽວໜ້ອຍລົງ ແລະ ໄດ້ຮັບແຮງບັນດານໃຈເພີ່ມຂຶ້ນເພື່ອສືບຕໍ່ເຮັດວຽກຂອງພວກເຮົາໃນການເສີມສ້າງຄວາມເຂັ້ມແຂງໃຫ້ກັບຊຸມຊົນທີ່ມີຄວາມສ່ຽງ ໂດຍຜ່ານແຟຊັ່ນແບບນິເວດ.” ພະນັກງານຂອງ ເລີລາວ ສ້າງຜະລິດຕະພັນແຟຊັນທີ່ມີລາຄາສົມເຫດສົມຜົນ ແລະ ຍືນຍົງທີ່ນຳເອົາສິ່ງເສດເຫຼືອຈາກຜ້າມາໃຊ້ຄືນ ແລະ ຜະລິດຕະພັນດັ່ງກ່າວໄດ້ຖືກອອກແບບເພື່ອສະແດງເຖິງມໍລະດົກວັດທະນະທຳຂອງລາວທີ່ອຸດົມສົມບູນ.
