ວັນທີ 3 ສິງຫາ 2018, ຄະນະຮັບຜິດຊອບຊ່ວຍເຫຼືອກູ້ໄພພິບັດນໍ້າຖ້ວມ ທີ່ເມືອງສະໜາມໄຊ ແຂວງອັດຕະປື ໄດ້ຖະແຫຼງສະຖານະການກອບກູ້ຜູ້ປະສົບໄພ ແລະ ສູນຫາຍຈາກໄພພິບັດນໍ້າຖ້ວມ, ເຊິ່ງດຳເນີນການຊອກຫາມາແຕ່ກາງຄືນຂອງວັນທີ 23 ກໍລະກົດ 2018 ມາຮອດມື້ທີ່ 11 ຂອງການຄົ້ນຫາ ສາມາດກອບກູ້ຜູ້ເສຍຊີວິດໄດ້ທັງໝົດ 23 ສົບ, ເປັນຍິງ 6 ສົບ ແລະ ເດັກນ້ອຍ 5 ສົບ.
ພົຈວ ຜາລົມ ລິນທອງ ຮອງຫົວໜ້າກົມໃຫຍ່ການເມືອງກອງທັບ ຫົວໜ້າຊີ້ນຳປະຈຳພາກສະໜາມເກັບກູ້ໄພພິບັດນໍ້າຖ້ວມ ທີ່ເມືອງສະໜາມໄຊ ແຂວງອັດຕະປື ໄດ້ຖະແຫຼງໃຫ້ຮູ້ວ່າ: ຜ່ານການປະຕິບັດການຊອກຄົ້ນຫາຜູ້ສູນຫາຍ ມາຮອດລະຫວ່າງວັນທີ 2-3 ສິງຫາ 2018 ສາມາດຊອກເຫັນຜູ້ເສຍຊີວິດເພີ່ມອີກ 10 ສົບ.
ສ່ວນວັນທີ 4 ສິງຫາ 2018 ແມ່ນຈະສືບຕໍ່ສົມທົບກັບພາກສ່ວນເຈົ້າໜ້າທີ່ທີ່ກ່ຽວຂ້ອງ ແລະ ພໍ່-ແມ່ປະຊາຊົນໄປຊີ້ຈຸດຕ່າງໆທີ່ອາດພົບຜູ້ເສຍຊີວິດ ເພື່ອໃຫ້ມີຄວາມສະດວກໃນການຄົ້ນຫາ. ພ້ອມນັ້ນ, ກໍຈະນຳກຳລັງຊອກຄົ້ນຫາຄືນໃໝ່ ແລະ ຈັດກຳລັງກະຈາຍອອກເປັນວົງກວ້າງ ເນື່ອງຈາກວ່າຜ່ານມາບໍ່ສາມາດຄົ້ນໄດ້ຢ່າງລະອຽດຍ້ອນການເຂົ້າຫາບໍລິເວນທີ່ເກີດເຫດພົບຄວາມຫຍຸ້ງຍາກ ເຊັ່ນ: ມີຂີ້ຕົມຖົມຍັງຢູ່ໃນລະດັບສູງ, ມີໄມ້ໃຫຍ່ກອງກັນເປັນຈຳນວນຫຼາຍຈຸດ, ເຮັດໃຫ້ການຊອກຄົ້ນຫາພົບຄວາມຫຍຸ້ງຍາກ ແລະ ລະດັບນໍ້າເຊຍັງໄຫຼຢ່າງຕໍ່ເນື່ອງ.
ດັ່ງນັ້ນ, ເຈົ້າໜ້າທີ່ຈະສຸມກຳລັງ ພ້ອມທັງນຳເອົາເຄື່ອງຈັກທີ່ທັນສະໄໝ ເພື່ອເຂົ້າໄປຊອກຫາຜູ້ສູນຫາຍຢ່າງສຸດຄວາມສາມາດ ບໍ່ວ່າຈະຢູ່ໃນກໍລະນີເສຍຊີວິດ ຫຼື ມີຊີວິດມາໃຫ້ຄົບຕາມຈຳນວນ.
