ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ໄດ້ເຂົ້າຈັບຕົວ ທ້າວ ທຸງໄຊ ອາ ຍຸ 26 ປີ ກໍາມະກອນ ຢູ່ບ້ານເມືອງເກົ່າ ເມືອງວຽງຄຳ ແຂວງວຽງຈັນ ພ້ອມຢາບ້າ 800 ກ່າວເມັດ; ໃນຂະນະທີ່ກຳລັງ ອອກຈາກເຮືອນເອົາຢາບ້າໄປສົ່ງໃຫ້ກຸ່ມສັ່ງຊື້.
ເຈົ້າໜ້າທີ່ ປກສ ແຂວງວຽງຈັນ ໃຫ້ຮູ້ວ່າ: ໄດ້ຈັດກໍາລັງຕິດຕາມການເຄື່ອນໄຫວຂອງ ທ້າວ ທຸງໄຊ ຕາມການລາຍ ງານຂອງແຫຼງຂ່າວວ່າຜູ້ກ່ຽວແມ່ນລັກລອບຊື້ຂາຍຢາບ້າ. ຜ່ານການຕິດຕາມມາຮອດວັນທີ 21 ກໍລະກົດ 2018 ເຫັນມີຂໍ້ມູນໜັກແໜ້ນ ຈຶ່ງນໍາກໍາລັງປະສານສົມທົບກັບອໍານາດການປົກຄອງບ້ານ ເຂົ້າຈັບຕົວໄດ້ຢູ່ເຮືອນຂອງຜູ້ກ່ຽວ ພ້ອມຂອງກາງຢາບ້າ ຈໍານວນ 812 ເມັດ ທີ່ຊຸກເຊື່ອງໄວ້ໃນຖົງໂສ້ງ ໃນຂະນະທີ່ກໍາລັງເອົາຢາບ້າໄປຂາຍ.
ທ້າວ ທຸງໄຊ ໄດ້ໃຫ້ການຕໍ່ເຈົ້າໜ້າທີ່ໃນເບື້ອງຕົ້ນວ່າ: ໃນວັນທີ 7 ກໍລະ ກົດ 2018, ຜູ້ກ່ຽວໄດ້ໄປຊື້ຢາບ້ານໍາຜູ້ຮ່ວມຂະບວນການຈໍານວນ 6 ຖົງ ເທົ່າກັນ 1.200 ເມັດ. ຈາກນັ້ນ, ຜູ້ກ່ຽວກໍໄປຂາຍໃຫ້ກັບຜູ້ຮ່ວມຂະບວນການ 3 ຖົງ, ຍັງເຫຼືອ 4 ຖົງ ເທົ່າກັບ 800 ເມັດ.
ມາວັນທີ 12 ກໍລະກົດ 2018, ຜູ້ກ່ຽວກຳລັງຈະເອົາຢາບ້າທີ່ຍັງເຫຼືອໄປຂາຍໃຫ້ກັບຜູ້ຮ່ວມຂະບວນການນຳກັນອີກ ກໍເລີຍຖືກເຈົ້າໜ້າທີ່ເຂົ້າປິດລ້ອມ ແລະ ກວດຄົ້ນຕົວຂອງຜູ້ກ່ຽວພົບເຫັນຢາບ້າຈຳນວນ 812 ເມັດ.
