ກະຊວງ ປກສ ແຫ່ງ ສປປ ລາວ ຮັບເຄື່ອງຊ່ວຍເຫຼືອຈາກ ອົງການແລກປ່ຽນວັດທະນະທຳ-ສິລະປະ ສາທາລະນະລັດ ເກົາຫຼີ (ສ.ເກົາຫຼີ), ກ່າວມອບໂດຍ ທ່ານ ນາງ ຢູ ຫັນ-ຊຸກ (Mrs.Yoo Hyun-Sook) ປະທານອົງການແລກປ່ຽນວັດທະນະທໍາ-ສິລະປະ ສ.ເກົາຫຼີ ແລະ ຕາງໜ້າຮັບໂດຍ ພົຈວ ສີສະຫວາດ ແກ້ວມາລາວົງ ຫົວໜ້າຫ້ອງວ່າການ ກະຊວງ ປກສ ໃນວັນທີ 9 ພະຈິກ ຜ່ານມານີ້ ທີ່ ກະຊວງ ປກສ, ໂດຍມີ ພົຕ ສິນທະວົງ ໄຊຍະກອນ ຮອງລັດຖະມົນຕີກະຊວງ ປກສ ແລະ ທ່ານ ຊິນ ຊັງ ຊຸນ ເອກອັກຄະລັດຖະທູດ ຜູ້ມີອຳນາດເຕັມ ແຫ່ງ ສ.ເກົາຫຼີ ປະຈຳ ສປປ ລາວ ພ້ອມດ້ວຍຄະນະທັງສອງຝ່າຍ ເຂົ້າຮ່ວມເປັນສັກຂີພະຍານ.
ທ່ານ ນາງ ຢູ ຫັນ-ຊຸກ ກ່າວວ່າ: ເຄື່ອງທີ່ໄດ້ຮັບປະກອບມີ ເສື້ອກັນໜາວ ແລະ ເກີບ ລວມມູນຄ່າທັງໝົດ 400.000 ໂດລາ
ເພື່ອປະກອບສ່ວນເຮັດໃຫ້ກຳລັງ ປກສ ມີຄວາມໜັກແໜ້ນ, ເຂັ້ມເເຂງໃນການເຄື່ອນໄຫວເຮັດໜ້າທີ່ວຽກງານວິຊາສະເພາະ ໃຫ້ມີປະສິດທິພາບ ແລະ ໃນຕໍ່ໜ້າ, ພ້ອມດຽວກັນນີ້ ທາງອົງການແລກປ່ຽນວັດທະນະທໍາ-ສິລະປະ ສ.ເກົາຫຼີ ຍັງຈະສືບຕໍ່ໃຫ້ການຊ່ວຍເຫຼືອປະຊາຊົນລາວທີ່ຍັງຂາດເຄື່ອງນຸ່ງຫົ່ມ ໃນຂອບເຂດທົ່ວປະເທດນຳອີກດ້ວຍ.
ທ່ານ ນາງ ຢູ ຫັນ-ຊຸກ
ໂອກາດດຽວກັນ, ພົຈວ ສີສະຫວາດ ແກ້ວມາລາວົງ ໄດ້ມອບໃບກຽດຕິຄຸນ ພ້ອມທັງຕາງໜ້າໃຫ້ ຄະນະນຳກະຊວງ ປກສ ລາວ ສະແດງຄວາມຂອບໃຈເປັນຢ່າງສູງຕໍ່ ທ່ານ ນາງ ຢູຫັນ-ຊຸກ ພ້ອມຄະນະ ທີ່ເຫັນໄດ້ຄວາມສຳຄັນທາງດ້ານວຽກງານປ້ອງກັນຄວາມສະຫງົບ, ເຊິ່ງເຄື່ອງຈຳນວນດັ່ງກ່າວ ແມ່ນຈະນຳໄປແຈກຢາຍໃຫ້ບັນດາກຳລັງ ແລະ ພາກສ່ວນກ່ຽວຂ້ອງທີ່ປະຕິບັດໜ້າທີ່ວຽກງານວິຊາສະເພາະ ກໍຄືບັນດາກຳລັງປ້ອງກັນຢູ່ສະຖານທູດ, ສຳນັກງານ-ອົງການຕ່າງໆ ໃຫ້ຮັບປະກັນຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ.