ການນໍາພັກ-ລັດ ນໍາໂດຍ ທ່ານ ບຸນຍັງ ວໍລະຈິດ ປະທານປະເທດ ພ້ອມດ້ວຍຄະນະການນໍາຂັ້ນສູງຂອງ ສປປ ລາວ ແລະ ຊາວນະຄອນຫຼວງວຽງຈັນ ແລະ ແຂວງຕ່າງໆ ໄດ້ຮ່ວມພິທີໃສ່ບາດໃນມື້ສຸດທ້າຍຂອງງານບຸນນະມັດສະການພຣະທາດຫຼວງ ໃນຕອນເຊົ້າວັນທີ 22 ພະຈິກ 2018 ກົງກັບມື້ິຂຶ້ນ 15 ຄໍ່າເດືອນ 12 ລາວ ດ້ວຍບັນຍາກາດຄຶກຄື້ນຕາມຮີດຄອງປະເພນີ ແລະ ວັດທະນະທໍາອັນດີງາມຂອງຊາດ.
ພິທີດັ່ງກ່າວໄດ້ ມີຂຶ້ນຢູ່ໃນກົມມະລຽນອ້ອມຮອບພຣະທາດຫຼວງ ລວມໄປເຖິງບໍລິເວນເດີ່ນດ້ານນອກຂອງພຣະທາດຫຼວງ ມີມວນຊົນຈໍານວນຫຼາຍໄດ້ພ້ອມກັນນໍາພາລູກ-ຫຼານມາໃສ່ບາດ, ຖວາຍສັງຄະທານແດ່ພຣະສົງທີ່ມາຈາກເຂດແຂວງຕ່າງໆໃນຂອບເຂດທົ່ວປະເທດ ແລະ ຕ່າງປະເທດຫຼາຍກວ່າ 4.000 ອົງ ທີ່ມາຮ່ວມນະມັດສະການ ແລະ ກາບໄຫວ້ພຣະທາດຫຼວງທີ່ສັກສິດ ເປັນມິ່ງຂວັນຂອງປະຊາຊົນລາວທັງຊາດ.
ເຊິ່ງໜຶ່ງປີມີຄັ້ງໜຶ່ງ ເພື່ອອຸທິດເຖິງດວງວິນຍານຂອງບັນພະບູລຸດ ແລະ ຜົນງານອັນລໍ້າເລີດໃນການອຸທິດເຫື່ອແຮງ ແລະ ສະຕິປັນຍາຂອງຕົນເຂົ້າໃນການສ້າງ ແລະ ປະຕິສັງຂອນອົງພຣະທາດຈົນສໍາເລັດ.
ມາຮອດປັດຈຸບັນ, ພຣະທາດຫຼວງ ໄດ້ກາຍເປັນມິ່ງຂວັນ ແລະ ມໍລະດົກອັນລໍ້າຄ່າທີ່ຊາວລາວທົ່ວທັງປະເທດ ໄດ້ພ້ອມພາກັນສັກກະລະບູຊາ, ກາບໄຫວ້ສືບທອດກັນມາຮອດເທົ່າທຸກວັນນີ້.
ໃນຕອນບ່າຍຂອງວັນດຽວກັນ, ຍັງໄດ້ມີການແຂ່ງຂັນຕີຄີ ອັນເປັນປະເພນີທີ່ເຄີຍປະຕິບັດກັນມາ ລະຫວ່າງ ຝ່າຍປະຊາຊົນ ແລະ ຝ່າຍພະນັກງານ ຢູ່ທີ່ເດີ່ນດ້ານໜ້າ ພຣະທາດຫຼວງ ເພື່ອຮັດແໜ້ນຄວາມສາມັກຄີ ແລະ ທັງເປັນການປະຕິບັດຕາມຮີດ 12 ຄອງ 14 ທີ່ບັນພະບູລຸດລາວໄດ້ກໍານົດໄວ້ໃຫ້ຕິດພັນກັບບຸນນະມັດສະການພຣະທາດຫຼວງ ໃນຕອນຄໍ່າຂອງມື້ດຽວກັນ ກໍມີພິທີສູດປະລິຕະມົງຄຸນ, ວຽນທຽນ ແລະ ຈູດບັ້ງໄຟດອກເພື່ອສັກກະລະບູຊາ ພະທາດຫຼວງ ໃຫ້ມີຄວາມຮຸ່ງເຮືອງສວຍງາມຢູ່ຄູ່ປະຊາຊົນ ແລະ ຊາດລາວຕະຫຼອດຊົ່ວກາລະນານ.
ສຳລັບຜົນຂອງການແຂ່ງຂັນຕີຄີ ຍັງສາມາດທວາຍຊາຕາຂອງບ້ານເມືອງໄດ້ ( ຕາມຄວາມເຊື່ອທີ່ເລົ່າສືບຕໍ່ກັນມາ ), ຫາກປີໃດ ຝ່າຍລັດຖະບານ ຊະນະ ແມ່ນປີນັ້ນຝົນບໍ່ຕົກຖືກຕ້ອງຕາມລະດູ, ຜົນຜະລິດບໍ່ສູງເຂົ້າໝາກປາແພງ, ມີໂຈນຂີ້ລັກງັດແງະຫຼາຍ, ເກີດພະຍາດລະບາດ, ຖ້າປີໃດ ຝ່າຍປະຊາຊົນ ຊະນະ ປີນັ້ນຝົນຟ້າເປັນໃຈ, ຜົນຜະລິດໄດ້ຫຼາຍ, ເຂົ້າປາອາຫານເຫຼືອຢູ່ເຫຼືອກິນ, ປະຊາຊົນຢູ່ເປັນສຸກບ້ານເມືອງສະຫງົບສຸກປອດໄພ; ເຊິ່ງຜົນການແຂ່ງຂັນປີນີ້ ແມ່ນ ຝ່າຍປະຊາຊົນ ເອົາຊະນະ ຝ່າຍພະນັກງານ.