ຄະນະພັກກອງບັນຊາການປ້ອງກັນເຄື່ອນທີ່ ( ປທ ) ກະຊວງ ປກສ ຈະສືບຕໍ່ເພີ່ມທະວີບົດບາດການນໍາພາຂອງ ຄະນະພັກແຕ່ລະຂັ້ນ ໃຫ້ເຂັ້ມງວດ ໂດຍການປັບປຸງແບບແຜນວິທີເຮັດວຽກໃຫ້ເຂົ້າສູ່ລວງເລິກ ແລະ ມີວິທະຍາສາດ, ສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ-ນັກຮົບ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີສະຕິຕໍ່ການຈັດຕັ້ງ ແລະ ມີລະບຽບວິໄນເຂັ້ມງວດ.
ກອງປະຊຸມສະຫຼຸບວຽກງານການຊີ້ນໍາ-ນໍາພາຂອງ ອົງຄະນະພັກ ປທ ປະຈໍາປີ 2018 ແລະ ວາງທິດທາງແຜນການປີ 2019 ໃນວັນທີ 22 ມັງກອນ ຜ່ານມາ, ເປັນປະທານໂດຍ ພົຈວ ຈັນສະແຫວງ ທິບຄູນທອງ ຄະນະພັກກະຊວງ, ເລຂາຄະນະພັກ, ມີຄະນະພັກ-ຄະນະກອງບັນຊາການ, ຄະນະຫ້ອງ, ພະແນກ, ສະມາຊິກພັກ, ພະນັກງານ-ນັກຮົບ ເຂົ້າຮ່ວມ.
ພັອ ໄກສອນ ແກ້ວມະນີ ໄດ້ຜ່ານບົດສະຫຼຸບ ປະຈໍາປີ 2018 ແລະ ທິດທາງແຜນການປີ 2019 ໃຫ້ຮູ້ວ່າ:
ປີນີ້ ຄະນະພັກ ປທ ຈະສືບຕໍ່ເພີ່ມທະວີບົດບາດການນໍາພາຂອງ ຄະນະພັກແຕ່ລະຂັ້ນ ໃຫ້ເຂັ້ມງວດ ໂດຍການປັບປຸງແບບແຜນວິທີເຮັດວຽກ, ກໍ່ສ້າງພັກໃຫ້ມີຄວາມເຕີບໃຫຍ່, ໜັກແໜ້ນເຂັ້ມແຂງ, ຮັບປະກັນທັງປະລິມານ ແລະ ຄຸນນະພາບ, ພ້ອມທັງສືບຕໍ່ກໍ່ສ້າງໜ່ວຍພັກ, ກົມກອງປອດໃສ, ເຂັ້ມແຂງ ແລະ ໜັກແໜ້ນໃຫ້ບັນລຸຕາມຄາດໝາຍທີ່ວາງໄວ້.
ປີ 2018 ຜ່ານມາ, ຄະນະພັກ ປທ ໄດ້ເອົາໃຈໃສ່ປັບປຸງກໍ່ສ້າງພັກຢ່າງເປັນປົກກະຕິຕໍ່ເນື່ອງ ເຮັດໃຫ້ລະບົບພັກ ແລະ ຖັນແຖວພະນັກງານ-ສະມາຊິກພັກ ມີຄວາມເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ
ເປັນຕົ້ນແມ່ນເປີດຮຽນສະໜັບສະໜູນພັກໃຫ້ມະຫາຊົນກ້າວໜ້າ ຈໍານວນ 2 ສະຫາຍ ຍິງ 1 ສະຫາຍ, ຮຽນລະບຽບພັກ 29 ສະຫາຍ ຍິງ 3 ສະຫາຍ, ໄດ້ຂະຫຍາຍມະຫາຊົນຜູ້ທີ່ມີຄວາມກ້າວໜ້າ ເຂົ້າເປັນສະມາຊິກພັກສໍາຮອງໄດ້ 31 ສະຫາຍ ຍິງ 3 ສະຫາຍ, ເລື່ອນສະມາຊິກພັນສໍາຮອງຂຶ້ນສົມບູນໄດ້ 34 ສະຫາຍ ຍິງ 1 ສະຫາຍ.
ໃນພິທີ ພັທ ນາງ ພົມອຸລາ ເລືອງວັນໄຊ ຮັກສາການຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງຂອງ ກົມໃຫຍ່ການເມືອງ ປກສ ເລກທີ 4125/ກມປສ ລົງວັນທີ 31 ທັນວາ 2018 ວ່າດ້ວຍ ການເລື່ອນຊັ້ນໃຫ້ນາຍຕໍາຫຼວດ ກອງບັນຊາການປ້ອງກັນເຄື່ອນທີ່, ໄດ້ຕົກລົງເລື່ອນຊັ້ນ ຮ້ອຍຕີ ຂຶ້ນ ຮ້ອຍໂທ ຈໍານວນ 13 ສະຫາຍ ຍິງ 1 ສະຫາຍ ແລະ ປະດັບຊັ້ນ ຮ້ອຍໂທ ໃຫ້ສະຫາຍ ນາງ ບວນ ສົມມະນີ ພະນັກງານຫ້ອງພະລາທິການ ທີ່ສໍາເລັດການສຶກສາຊັ້ນປະລິນຍາຕີ ການເງິນ-ການບັນຊີ, ເລື່ອນຊັ້ນ ວາທີ ຂຶ້ນ ຮ້ອຍຕີ ຈໍານວນ 2 ສະຫາຍ ປະດັບຊັ້ນໂດຍ ພົຈວ ຈັນສະແຫວງ ທິບຄູນທອງ .