ກົມໃຫຍ່ຕຳຫຼວດ ກະຊວງ ປກສ ໄດ້ຈັດຕັ້ງພິທີປາຖະກະຖາ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ( 20 ມັງກອນ 1949-20 ມັງກອນ 2019 ) ພ້ອມທັງເຜີຍແຜ່ 2 ມະຕິຂອງ ຄະນະບໍລິຫານງານສູນກາງພັກ ( ຄບສພ ) ເພື່ອເຮັດໃຫ້ບັນດາພະນັກງານຫຼັກແຫຼ່ງທີ່ເຂົ້າຮ່ວມ ໄດ້ຮັບຮູ້ມູນເຊື້ອຕໍ່ສູ້ອັນພິລະອາດຫານ, ເຕີບໃຫຍ່ຂະຫຍາຍຕົວຂອງກອງທັບ, ພ້ອມທັງໄດ້ເຊື່ອມຊຶມເນື້ອໃນມະຕິຂອງ ຄບສພ ແລ້ວນຳໄປຈັດຕັ້ງຜັນຂະຫຍາຍໃຫ້ເກີດດອກອອກຜົນ ໃນວັນທີ 28 ມັງກອນ 2019, ເປັນປະທານໂດຍ ພົຈວ ປອ ທອງເຫຼັກ ມັງໜໍ່ເມກ ຄະນະພັກກະຊວງ ເລຂາຄະນະພັກ ຫົວໜ້າກົມໃຫຍ່ຕຳຫຼວດ, ໂດຍແມ່ນບັນດາສະຫາຍໃນຄະນະພັກກົມໃຫຍ່ຕຳຫຼວດ ໄດ້ຜັດປ່ຽນກັນເຜີຍແຜ່ແຕ່ລະເອກະສານ.
ພົຈວ ປອ ທອງສະຫວັນ ວົງສະຫວັດ ຮອງເລຂາຄະນະພັກ ຮອງຫົວໜ້າກົມໃຫຍ່ຕຳຫຼວດ ໄດ້ປາຖະກະຖາ ວັນສ້າງຕັ້ງກອງທັບ ໃຫ້ຮູ້ວ່າ:
ກອງທັບປະຊາຊົນລາວໄດ້ຮັບການສ້າງຕັ້ງຂຶ້ນ ໃນວັນທີ 20 ມັງກອນ 1949 ນັບແຕ່ສ້າງຕັ້ງກອງທັບປະຊາຊົນລາວ ແມ່ນມີມູນເຊື້ອຈົງຮັກພັກດີຕໍ່ພັກ, ຕໍ່ປະຊາຊົນ, ຕໍ່ອຸດົມການສັງຄົມນິຍົມ, ມີນໍ້າໃຈຕໍ່ສູ້ພິລະອາດຫານ, ກ້າແກ່ນ, ໜຽວແໜ້ນ, ມີໄຫວພິບ, ມີນ້ຳໃຈດຸໝັ່ນຂະຫຍັນພຽນ, ອອກແຮງງານເພີ່ມພູນຜະລິດຜົນ ແລະ ປະຢັດມັດທະຍັດ, ຍາມໃດກໍຢຶດໝັ້ນການພົວພັນ, ສາມັກຄີແບບກາຍອິນຊີອັນແໜ້ນແຟ້ນກັບປະຊາຊົນບັນດາເຜົ່າ, ມີມູນເຊື້ອສາມັກຄີກັບກອງທັບປະເທດສັງຄົມນິຍົມອ້າຍນ້ອງ ແລະ ບັນດາປະເທດເພື່ອນມິດທີ່ກ້າວໜ້າໃນໂລກ.
ໂດຍສະເພາະແມ່ນ ຄວາມສາມັກຄີຮ່ວມສຳພັນສູ້ຮົບແບບພິເສດກັບກອງ ທັບປະຊາຊົນຫວຽດນາມອ້າຍນ້ອງ ແລະ ສາມັກຄີຮ່ວມມືຮອບດ້ານກັບກອງທັບປົດປ່ອຍປະຊາຊົນຈີນ, ກອງທັບປະຊາຊົນລາວເວລາໃດກໍຮັກສາມູນເຊື້ອອັນດີງາມຄືພາຍໃນມີ ປະຊາທິປະໄຕ ແລະ ມີລະບຽບວິໄນເຂັ້ມງວດ, ສຳລັບມະຕິຂອງຄະນະບໍລິຫານງານສູນກາງພັກ ເລກທີ 056/ຄບສພ, ວັນທີ 19 ທັນວາ 2018 ວ່າດ້ວຍ ການປັບປຸງຮາກຖານການເມືອງຂອງ ລະບອບປະຊາທິປະໄຕປະຊາຊົນ ໃຫ້ເຂັ້ມແຂງ ແລະ ໜັກແໜ້ນ.
ພັອ ຄໍາຮຸ່ງ ແສງປະເສີດ ປະທານກວດກາພັກ ຮອງຫົວໜ້າກົມໃຫຍ່ຕຳຫຼວດ ເຜີຍແຜ່ໂດຍຍົກໃຫ້ເຫັນບາງເນື້ອໃນທີ່ກຳນົດໃນມະຕິ ວ່າ:
ບັນດາການຈັດຕັ້ງໄດ້ເອົາໃຈໃສ່ປັບປຸງການຈັດຕັ້ງຂອງຕົນໃນບັນດາຮາກຖານສຳນັກງານ-ອົງການ, ກົມກອງກຳລັງປະກອບອາວຸດ, ສະຖາບັນການສຶກສາ, ໂຮງຮຽນ, ໂຮງໝໍ ແລະ ລັດວິສາຫະກິດ ໂດຍສະເພາະຮາກຖານການເມືອງໃນກຳລັງປະກອບອາວຸດ, ຄະນະພັກ-ຄະນະບັນຊາຂັ້ນຕ່າງໆໄດ້ເອົາໃຈໃສ່ກໍ່ສ້າງ, ປັບປຸງຮາກຖານການເມືອງ ດ້ວຍການຍູ້ແຮງຂະບວນການສ້າງກົມກອງແຂງ-ໜ່ວຍພັກຮູ້ນຳພາຮອບດ້ານ, ຫັນກຳລັງລົງກໍ່ສ້າງຮາກຖານການເມືອງ ເພື່ອສ້າງບ້ານປ້ອມໝັ້ນ ແລະ ກຸ່ມບ້ານສູ້ຮົບຕິດລຽນ, ສະເພາະຢູ່ໃນຈຸດຫຼ່ໍແຫຼມຕ່າງໆໃນຂອບເຂດທົ່ວປະເທດ ເຊິ່ງໄດ້ກາຍເປັນປັດໄຈສຳຄັນໃຫ້ແກ່ການຮັກສາຄວາມໝັ້ນຄົງຂອງຊາດ, ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມປອດໄພໃນສັງຄົມ.
ພັອ ປອ ເພັງສະຫັວນ ທິບພະວົງໄຊ ຄະນະປະຈຳພັກ ຮອງຫົວໜ້າກົມໃຫຍ່ຕຳຫຼວດ ເຜີຍແຜ່ມະຕິຂອງຄະນະບໍລິຫານງານສູນກາງພັກ ເລກທີ 057/ຄບສພ, ວັນທີ 19 ທັນວາ 2018 ວ່າດ້ວຍ ເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການ ເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກທີ່ໄດ້ກຳນົດວ່າ:
ເພື່ອຮັບປະກັນໃຫ້ການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນ ໄດ້ຮັບການຈັດຕັ້ງປະຕິບັດຢ່າງຖືກຕ້ອງ ບັນຫາສຳຄັນແມ່ນການເພີ່ມທະວີຄວາມຮັບຜິດຊອບ ແລະ ປັບປຸງແບບແຜນເຮັດວຽກຂອງສູນກາງພັກ ແລະ ຄະນະພັກຂັ້ນຕ່າງໆ ເຊິ່ງຕ້ອງເລີ່ມຈາກການແກ້ໄຂບັນຫາທີ່ຕົ້ນເຫດ ແລະ ຮັບປະກັນການຜັນຂະຫຍາຍຢ່າງຕໍ່ເນື່ອງຈາກນະໂຍບາຍ ແລະ ການເຄື່ອນໄຫວປະຕິບັດຕົວຈິງ, ເຮັດໃຫ້ຄະ ນະພັກທຸກຂັ້ນ, ການຈັດຕັ້ງລັດທຸກຂົງເຂດການເປັນອົງກອນແຫ່ງການປະຕິວັດ, ການບຸກເບີກ ແລະ ປະດິດສ້າງທີ່ແທ້ຈິງ.
ຂ່າວໃຫ້ຮູ້ຕື່ມວ່າ:
ວັນທີ 25 ມັງກອນ 2019 ຫ້ອງການປົກ ຄອງບ້ານຮ່ອງໄກ່ແກ້ວ ເມືອງຈັນທະບູລີ ນະຄອນຫຼວງວຽງຈັນ ໄດ້ປາຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ, ປາຖະກະຖາໂດຍ ພົຈວ ແກ່ນ ສີມະນີວົງ ອະດີດຮອງຫົວໜ້າກົມໃຫຍ່ການເມືອງກອງທັບກະຊວງປ້ອງກັນປະເທດ.
