ຄະນະກໍາມະການຕ້ານການຄ້າມະນຸດລະດັບຊາດ ຈັດກອງປະຊຸມສະຫຼຸບການເຄື່ອນໄຫວວຽກງານຕ້ານການຄ້າມະນຸດ ປະຈໍາປີ 2018 ແລະ ວາງທິດທາງແຜນ ການປະຈໍາປີ 2019, ຂຶ້ນໃນວັນທີ 4 ກຸມພານີ້, ເປັນປະທານໂດຍ ທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການຕ້ານການຄ້າມະນຸດລະດັບຊາດ, ມີຮອງປະທານ, ລັດຖະມົນຕີ ກະຊວງ ປກສ, ໄອຍະການ, ສານປະຊາຊົນ, ສະມາຊິກກອງເລຂາຄະນະກໍາມະການ ຕ້ານການຄ້າມະນຸດລະດັບຊາດ ເຂົ້າຮ່ວມ.
ພັອ ປອ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່ຕໍາຫຼວດ, ຫົວໜ້າກອງເລຂາຄະນະກໍາມະການຕ້ານການຄ້າມະນຸດລະດັບຊາດ ກ່າວວ່າ:
ປີ 2018 ຜ່ານມາ ຄະນະກໍາມະການຕ້ານການຄ້າມະນຸດລະດັບຊາດ ໄດ້ຊີ້ນໍາສະມາຊິກກອງເລຂາທີ່ຂຶ້ນກັບບັນດາກະຊວງ, ອົງການຈັດຕັ້ງສັງຄົມ, ນັບແຕ່ສູນກາງລົງຮອດທ້ອງຖິ່ນ ແລະ ຂະແໜງການຕ່າງໆເອົາໃຈໃສ່ຈັດຕັ້ງແຜນງານແຫ່ງຊາດ ກ່ຽວກັບວຽກງານຕ້ານການຄ້າມະນຸດໃນຂົງເຂດວຽກງານຂອງຕົນ ແລະ ໄດ້ຮັບຜົນສໍາເລັດ ເຊັ່ນ: ໄດ້ສຸມໃສ່ສ້າງ ແລະ ປັບປຸງນິຕິກໍາຕ່າງໆໃນການເຄື່ອນໄຫວວຽກງານ ຕ້ານການຄ້າມະນຸດ.
ເປັນຕົ້ນ ໄດ້ປັບປຸງດໍາລັດ, ສ້າງນິຕິກໍາຕ່າງໆ ເພື່ອເຮັດໃຫ້ການເຄື່ອນໄຫວວຽກງານຕ້ານການຄ້າມະນຸດ ມີປະສິດທິພາບ ແລະ ປະສິດທິຜົນ, ໄດ້ຈັດຕັ້ງຄະນະກໍາມາທິການຕ້ານການຄ້າມະນຸດລະດັບຊາດ, ລົງຊຸກຍູ້ຕິດຕາມການຈັດຕັ້ງຜັນຂະຫຍາຍ ດໍາລັດ 245/ນຍ ໃນຂອບເຂດທົ່ວປະເທດ, ພ້ອມທັງແບ່ງຄວາມຮັບຜິດຊອບຢູ່ແຕ່ລະກະຊວງ, ອົງການ, ນະຄອນຫຼວງ ແລະ ບັນດາແຂວງທົ່ວປະເທດ ໃນການສຸມໃສ່ເຄື່ອນໄຫວ 3 ວຽກໃຫຍ່ ຄື: ປຶກສາຫາລື, ຄົ້ນຄວ້າ, ວາງແຜນການຈັດຕັ້ງກິດຈະກໍາ ແລະ ແຜນງານຕ່າງໆໃຫ້ມີຄວາມສອດຄ່ອງ, ຖືກຕ້ອງ ແລະ ທັນເວລາ.
ຄຽງຄູ່ກັນນັ້ນ, ຍັງໄດ້ຈັດຕັ້ງການໂຄສະນາປູກຈິດສໍານຶກເພື່ອສ້າງຄວາມເຂັ້ມແຂງໃຫ້ພະນັກງານທາງພາກລັດ ໃນຂະແໜງການຕ່າງໆ ນັບແຕ່ສູນກາງລົງຮອດທ້ອງຖິ່ນ ຕະຫຼອດຮອດພໍ່-ແມ່ປະຊາຊົນ, ນັກຮຽນ, ນັກສຶກສາ, ຊາວໜຸ່ມ-ເຍົາວະຊົນ ເພື່ອໃຫ້ຮັບຮູ້, ເຂົ້າໃຈຕໍ່ຜົນຮ້າຍ ແລະ ໄພອັນຕະລາຍຈາກການຄ້າມະນຸດ ແລະ ມີສ່ວນຮ່ວມໃນວຽກງານຕ້ານການຄ້າມະນຸດທົ່ວສັງຄົມ.
ນອກນັ້ນ, ຍັງໄດ້ສ້າງລະຄອນ, ບົດເພງ ແລະ ສື່ສິ່ງພິມຕ່າງໆທີ່ມີເນື້ອຫາກ່ຽວກັບການຄ້າມະນຸດ ຜ່ານໂທລະ ພາບ ແລະ ວິທະຍຸ. ສໍາລັບທິດທາງແຜນການເຄື່ອນ ໄຫວວຽກງານປະຈໍາປີ 2019, ຄະນະກໍາມະການຕ້ານການຄ້າມະນຸດລະດັບຊາດ, ແຂວງ, ນະຄອນຫຼວງ ແລະ ເມືອງ ຈະສືບຕໍ່ເຮັດວຽກງານໂຄສະນາໃຫ້ພະນັກງານ ແລະ ທົ່ວສັງຄົມທຸກຊັ້ນຄົນ ເຊັ່ນ: ເຜີຍແຜ່ກົດໝາຍ, ສົນທິສັນຍາສາກົນ, ນິຕິກໍາລຸ່ມກົດໝາຍ, ສະປອດໂຄສະນາ, ເລື່ອງສັ້ນ, ວິດີໂອທີ່ພົວພັນເຖິງວຽກງານຕ້ານການຄ້າມະນຸດ.
