ແມ່ຍິງ ກະຊວງ ປກສ ປາຖະກະຖາມູນເຊື້ອ ວັນແມ່ຍິງສາກົນ

0
3138

ສະຫະພັນແມ່ຍິງ ກະຊວງ ປກສ ໄດ້ຈັດຕັ້ງປາຖະກະຖາມູນເຊື້ອ ວັນແມ່ຍິງສາກົນ ຄົບຮອບ 109 ປີ ( 8 ມີນາ 1910-8 ມີນາ 2019 ) ໃນວັນທີ 5 ມີນານີ້, ໃຫ້ກຽດເຂົ້າຮ່ວມໂດຍ ພົຕ ປອ ສົມຫວັງ ທຳມະສິດ ຮອງລັດຖະມົນຕີ ກະຊວງ ປກສ ພ້ອມດ້ວຍຄະນະພັກ-ຄະນະບັນຊາ, ຄະນະບໍລິຫານງານ ສະຫະພັນແມ່ຍິງ ກະຊວງ ປກສ, ຄະນະສະຫະພັນແມ່ຍິງ, ຄະນະໜ່ວຍແມ່ຍິງ, ກົມກອງອ້ອມຂ້າງ ກະຊວງ ປກສ, ອະດີດພະນັກງານອາວຸໂສບຳນານ ແລະ ຄອບຄົວການນຳ ປກສ ເຂົ້າຮ່ວມ.

ພັອ ນາງ ວັດຊະລີ ສິດທິລືໄຊ ຄະນະບໍລິຫານງານສູນກາງ ສະຫະພັນແມ່ຍິງລາວ ປະທານສະຫະພັນແມ່ຍິງ ກະຊວງ ປກສ
ພັອ ນາງ ວັດຊະລີ ສິດທິລືໄຊ ຄະນະບໍລິຫານງານສູນກາງ ສະຫະພັນແມ່ຍິງລາວ ປະທານສະຫະພັນແມ່ຍິງ ກະຊວງ ປກສ ໃຫ້ຮູ້ວ່າ:

ວັນແມ່ຍິງສາກົນ ໄດ້ເກີດຂຶ້ນໃນທ່າມກາງສະພາບເສດຖະກິດຂອງ ພວກສັກດີນາ ແລະ ນາຍທຶນຂະຫຍາຍຕົວ ເມື່ອໂຮງຈັກ-ໂຮງງານອຸດສາຫະກຳຂອງ ນາຍທຶນ ຂະຫຍາຍຕົວ, ມັນໄດ້ສ້າງຄວາມຮັ່ງມີໃຫ້ແກ່ພວກນາຍທຶນ, ແຕ່ຊໍ້າພັດເພີ່ມຄວາມທຸກຍາກລຳບາກ ໃຫ້ແກ່ຊາວຜູ້ອອກແຮງງານ ໂດຍສະເພາະ ກຳມະກອນແມ່ຍິງ ຢູ່ພາຍໃຕ້ລະບອບສັກດີນາ, ນາຍທຶນ, ແມ່ຍິງຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກງານຊົ່ວໂມງ ແຕ່ໄດ້ຮັບຄ່າຈ້າງແຮງງານດ້ວຍລາຄາຖືກ, ເຮັດວຽກບໍ່ມີການຮັບປະກັນ, ບໍ່ມີລະບອບປົກປັກຮັກສາສຸຂະພາບຂອງແມ່ຍິງ ແລະ ເດັກນ້ອຍ.

ຈາກສະພາບຄວາມຫຍຸ້ງຍາກ ແລະ ຖືກກົດຂີ່ຂູດຮີດແນວນັ້ນ, ໃນວັນທີ 8 ມີນາ 1908  ແມ່ຍິງຈຳນວນ 15.000 ຄົນ ໄດ້ເດີນຂະບວນຢູ່ເມືອງນິວຢອກ ເພື່ອທວງໃຫ້ນາຍທຶນຫຼຸດຜ່ອນຊົ່ວໂມງເຮັດວຽກ, ຢຸດເຊົາການຂູດຮີດແຮງງານເດັກ ແລະ ທວງໃຫ້ແມ່ຍິງ ມີສິດໃນການອອກສຽງເລືອກຕັ້ງ ແລະ ການຮັບສະໝັກເລືອກຕັ້ງ; ການເດີນຂະບວນຄັ້ງນັ້ນ ແມ່ນຢູ່ພາຍໃຕ້ຄຳຂວັນ “ ເຂົ້າຈີ່ ແລະ ດອກກຸຫຼາບ ” ໂດຍ ເຂົ້າຈີ່ ໝາຍເຖິງ: ເສດຖະກິດດີຂຶ້ນ, ດອກກຸຫຼາບ ໝາຍເຖິງ: ຄຸນນະພາບຊີວິດດີຂຶ້ນ.

ມາເຖິງປີ 1910, ຂະບວນການຕໍ່ສູ້ຂອງແມ່ຍິງ ໄດ້ແຜ່ຂະຫຍາຍກວ້າງອອກໄປສູ່ປະເທດນາຍທຶນ ຢູ່ທະວີບເອີລົບ ແລະ ໃນປີນີ້ເອງ, ກອງປະຊຸມສາກົນ ກ່ຽວກັບ ບັນຫາແມ່ຍິງຄັ້ງທຳອິດ ໄດ້ຈັດຂຶ້ນຢູ່ໂກເປນຮາກ ນະຄອນຫຼວງຂອງປະເທດເດນມາກ, ມີຜູ້ແທນ 100 ກວ່າຄົນ ຈາກ 17 ປະເທດເຂົ້າຮ່ວມ; ໂດຍກອງປະຊຸມດັ່ງກ່າວ ໄດ້ຮັບຮອງ ແລະ ຕົກລົງເອົາ ວັນທີ 8 ມີນາ ຂອງທຸກປີ ເປັນ ວັນແມ່ຍິງສາກົນ.

ໂອກາດທີ່ມີຄວາມໝາຍສຳຄັນຄັ້ງນີ້, ສະຫະພັນແມ່ຍິງ ກະຊວງ ປກສ ຍັງໄດ້ເຜີຍແຜ່ບັນດາເອກະສານທີ່ກ່ຽວຂ້ອງກັບ ວັນແມ່ຍິງສາກົນ 8 ມີນາ ເພື່ອໃຫ້ບັນດາຄະນະແມ່ຍິງທີ່ເຂົ້າຮ່ວມ ໄດ້ຮັບຮູ້ເຖິງເນື້ອໃນທີ່ກຳນົດໃນເອກະສານ ແລ້ວນຳໄປເຜີຍແຜ່ໃຫ້ສະມາຊິກຂອງຕົນຮັບຮູ້ຢ່າງທົ່ວເຖິງ.

ໃນນີ້ ມີ: ເອກະສານບັນດາອົງການຈັດຕັ້ງ, ສົນທິສັນຍາ, ຖະແຫຼງການ ແລະ ກອງປະຊຸມຕ່າງໆກ່ຽວກັບແມ່ຍິງ ໃນລະດັບສາກົນ, ພາກພື້ນ ແລະ ອາຊຽນ, ນະໂຍບາຍ ແລະ ກົນໄກສົ່ງເສີມຄວາມກ້າວໜ້າຂອງແມ່ຍິງ ໃນ ສປປ ລາວ, ວຽກງານພົວພັນ ແລະ ຮ່ວມມືກັບຕ່າງປະເທດ ປີ 2018.