ກົມໃຫຍ່ສັນຕິບານ ກະຊວງ ປກສ, ປົກຄອງເມືອງໄຊເສດຖາ, ເມືອງໄຊທານີ ແລະ ບ້ານດົງປ່າລານທົ່ງ-ບ້ານໜອງຈັນ ເມືອງໄຊເສດຖາ ນະຄອນຫຼວງວຽງຈັນ ໄດ້ຈັດພິທີປາຖະກະຖາຫວນຄືນມູນເຊື້ອ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 64 ປີ ( 22 ມີນາ 1955-22 ມີນາ 2019 ) ໃນວັນທີ 27 ມີນາ 2019 ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ມີຄວາມຮັບຮູ້ ແລະ ເຂົ້າໃຈກ່ຽວກັບ ຄວາມໝາຍ-ຄວາມສໍາຄັນຂອງວັນດັ່ງກ່າວ; ໃຫ້ກຽດປາຖະກະຖາໂດຍ ພົຈວ ປອ ບົວວັນ ວົງສາວັນທອງ ຮອງເລຂາຄະນະພັກ ຮອງຫົວໜ້າກົມໃຫຍ່ສັນຕິບານ, ພ້ອມທັງມີ ທ່ານ ບຸນປີງ ປັນຍາຈິດ ເລຂາພັກເມືອງ ເຈົ້າເມືອງໆໄຊເສດຖາ, ທ່ານ ວັນເພັງ ອິນທະວົງ ຮອງເລຂາພັກເມືອງ ຮອງເຈົ້າເມືອງໆໄຊທານີ ແລະ ທ່ານ ດວງເດືອນ ວົງນະລາດ ຄະນະພັກຫົວໜ້າຄະນະໂຄສະນາອົບຮົມ ເມືອງໄຊເສດຖາ ເຂົ້າຮ່ວມ.
ໃນພິທີ, ທັງ 4 ພາກສ່ວນ ໄດ້ຍົກໃຫ້ເຫັນໄລຍະການຈັດຕັ້ງປະຕິບັດແນວທາງປ່ຽນແປງໃໝ່ຂອງພັກ ເຊິ່ງສະແດງອອກໃນການພັດທະນາແຕ່ລະດ້ານ ໄດ້ຮັບການຈັດຕັ້ງປະຕິບັດຢ່າງແຂງແຮງ ຄື:
ການພັດທະນາຊົນນະບົດ ແລະ ແກ້ໄຂຄວາມທຸກຍາກ ເປັນບັນຫາສໍາຄັນ, ບັນດາຂະແໜງການນັບແຕ່ຂັ້ນ ສູນກາງລົງຮອດທ້ອງຖິ່ນ ໄດ້ເອົາໃຈໃສ່ຫັນລົງກໍ່ສ້າງຮາກຖານ ໂດຍສຸມໃສ່ສ້າງບ້ານ ແລະ ຈຸດສຸມພັດທະນາຕາມ 4 ເນື້ອໃນ 4 ຄາດໝາຍ ໄປຄຽງຄູ່ກັບ ການເຮັດທົດລອງວຽກງານ 3 ສ້າງ ຢູ່ 51 ເມືອງ, ມີ 109 ບ້ານເປົ້າໝາຍ.
ປັດຈຸບັນ, ທົ່ວປະເທດມີ 148 ເມືອງ, ມີ 8.454 ບ້ານ ແລະ ມີ 1.166.239 ຄອບຄົວ, ອັດຕາສ່ວນຂອງຄວາມທຸກຍາກ ໄດ້ຫຼຸດລົງຢ່າງຕໍ່ເນື່ອງ, ມາຮອດປີ 2017 ຍັງເຫຼືອຄອບຄົວທຸກຍາກ 69.772 ຄອບຄົວ ກວມ 5,98%, ບ້ານທຸກຍາກ ຍັງເຫຼືອ 1.673 ບ້ານ ກວມ 19,55% ແລະ ເມືອງທຸກຍາກ ເຫຼືອ 23 ເມືອງ ກວມ 15,54%.
ສໍາລັບບ້ານພັດທະນາ ໃນທົ່ວປະເທດ ມີ 3.917 ບ້ານ, ມີບ້ານໃຫຍ່ກາຍເປັນຕົວເມືອງນ້ອຍ 31 ບ້ານ ນອນຢູ່ໃນ 107 ເມືອງ ແລະ 16 ແຂວງ; ດ້ານກະສິກຳ: ການຜະລິດເຂົ້າ ໃນປີ 2017 ຜະລິດເຂົ້້າໄດ້ 4,27 ລ້ານໂຕນ ເທົ່າກັບ 98,16% ຂອງແຜນການ, ໃນນັ້ນ ເຂົ້ານາປີ 3,6 ລ້ານໂຕນ, ນາແຊງ 473,700 ໂຕນ, ການປູກຕົ້ນໄມ້ອຸດສາຫະກຳ ແລະ ການຜະລິດພືດຜັກອື່ນໆ ລ້ວນແຕ່ຂະຫຍາຍຕົວຢ່າງແຂງແຮງ ແລະ ການລ້ຽງສັດແບບເປັນຟາມ ໄດ້ມີການເພີ່ມຂຶ້ນຢ່າງໄວວາ.
