ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຜົ້ງສາລີ ຈັດກອງປະຊຸມທາບທາມບຸກຄະລາກອນບັນຈຸເຂົ້າໃນຫົວໜ້າ ແລະ ຮອງຫົວຫນ້າຂະແໜງຕ່າງໆຂອງພະແນກ ໃນວັນທີ 23 ເມສາຜ່ານມາ, ໂດຍການເປັນປະທານຂອງ ທ່ານ ແພງ ລີລາວົງ ຮອງເຈົ້າແຂວງໆຜົ້ງສາລີ, ມີຫົວໜ້າຄະນະປັບປຸງກົງຈັກການຈັດຕັ້ງຂັ້ນແຂວງ, ມີບັນດາຄະນະປັບປຸງກົງຈັກການຈັດຕັ້ງຂັ້ນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນກອງປະຊຸມ, ທ່ານ ບຸນຈັນ ເຈີເອີ ຫົວໜ້າພະແນກ ຖວທ ແຂວງ ໄດ້ຜ່ານຂໍ້ຕົກລົງ ເລກທີ 682/ຖວທ, ລົງວັນທີ 19 ມິຖຸນາ 2018 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງພະແນກ ແລະ ຜ່ານຂໍ້ກຳນົດມາດຖານ ເງື່ອນໄຂຂອງພະນັກງານນຳພາ-ຄຸ້ມຄອງ ສະບັບເລກທີ 461/ລບ, ລົງວັນ ທີ 9 ຕຸລາ 2012; ເຊິ່ງຜູ້ເຂົ້າຮ່ວມກໍ່ໄດ້ພ້ອມກັນຄົ້ນຄວ້າໃຊ້ສິດຂອງຕົນເອງໃນການທາບທາມບຸກຄະລາກອນ ພະນັກງານ-ລັດຖະກອນບັນຈຸເຂົ້າໃນຫົວໜ້າຂະແໜງ, ຮອງຫົວໜ້າຂະແໜງຕາມມາດຖານເງື່ອນໄຂ ແລະ ລົງຄະແນນສຽງດ້ວຍການປ່ອນບັດ ເພື່ອຄັດເລືອກເອົາບຸກຄົນທີ່ຫ້າວຫັນ, ມີຜົນງານ ໃນຂະບວນການເຮັດວຽກງານ ແລະ ມີຄວາມຮູ້-ຄວາມສາມາດ, ປະກອບສ່ວນນໍາພາ-ຄຸ້ມຄອງ ແລະ ພັດທະນາວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງກ້າວຂຶ້ນເປັນເລື້ອຍໆ.
ປັດຈຸບັນ, ພະແນກ ຖວທ ແຂວງຜົ້ງສາລີ ມີ 7 ຂະແໜງ, 2 ສູນ ແລະ 1 ສະຖານີ ຄື: ຂະແໜງຖະແຫຼງຂ່າວ, ຂະແໜງວັດທະນະທຳ, ທ່ອງທ່ຽວ, ບໍລິຫານ, ຈັດຕັ້ງ-ພະນັກງານ, ກວດກາ, ສະຖິຕິ-ແຜນການ ແລະ ການຮ່ວມມື, ສູນວັດທະນະທຳເດັກ, ສູນຝຶກອົບຮົມສື່ມວນຊົນ, ວັດທະນະທຳ ແລະ ທ່ອງທ່ຽວ ແລະ ສະຖານີວິທິຍຸ-ໂທລະພາບ ແຂວງ ແລະ ລວມມີພັກນັກງານ-ລັດຖະກອນທັງໝົດ 59 ຄົນ ຍິງ 25 ຄົນ.
