ໃນອາທິດຜ່ານມາ, ຫ້ອງວ່າການປະທານປະເທດ ( ຫປທ ) ໄດ້ຮັບຟັງການປາຖະກະຖາມູນ ເຊື້ອວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ຄົບຮອບ 60 ປີ ( 18 ພຶດສະພາ 1959-18 ພຶດສະພາ 2019 ) ປາຖະກະຖາໂດຍທ່ານ ທອງສະຫວັດ ໄຂຄໍາພິທູນ ພະນັກງານບໍານານ, ອະດີດກໍາມະການສູນກາງພັກ, ອະດີດຫົວໜ້າຫ້ອງວ່າການສູນກາງພັກ ເພື່ອເຮັດໃຫ້ພະນັກງານ-ລັດຖະກອນພາຍໃນຫ້ອງວ່າການປະທານປະເທດ ມີຄວາມຮັບຮູ້ ແລະ ເຂົ້າໃຈກ່ຽວກັບຄວາມໝາຍ-ຄວາມສໍາຄັນ ຂອງວັນດັ່ງກ່າວ.
ທ່ານ ທອງສະຫວັດ ໄຂຄໍາພິທູນ ໄດ້ຍົກໃຫ້ເຫັນວ່າ:
ຕົກມາຮອດຄໍ່າຄືນ ຂອງວັນທີ 18 ພຶດສະພາ 1959 ພາຍໃຕ້ການ ບັນຊາຂອງຄະນະກອງພັນ, ແຕ່ລະກົມກອງ ພ້ອມກັບຄອບຄົວພະນັກງານ-ນັກຮົບທັງໝົດ ໄດ້ ນຳໃຊ້ຄວາມມືດຖອນທັບໄປທາງທິດບ້ານໂຕນ-ນາແຖງ-ໜອງເຕີ້ ແລ້ວເຂົ້າໄປຕາມທິດບ້ານມາຍ ( ທິດຕາເວັນຕົກສຽງໃຕ້ປະມານ 15 ກິໂລແມັດ ) ຢ່າງປິດລັບ. ມາຮອດ 7:00 ໂມງເຊົ້າຂອງມື້ຕໍ່ມາ ພວກສັດຕູເຂົ້າປົດອາວຸດກອງພັນ ທີ 2 ແຕ່ພວກເຂົາຕົກສະເງີ້ ເພາະ ຢູ່ໃນຄ້າຍມີແຕ່ຄວາມມິດງຽບ- ວ່າງເປົ່າ ນັບທັງເຮືອນຫ້ອງແຖວ ຄອບຄົວພະນັກງານທະຫານກໍບໍ່ມີຮອດເງົາຄົນ; ສ່ວນກອງພັນທີ 2 ພາຍຫຼັງທີ່ໄດ້ອອກຈາກທົ່ງໄຫ ຫີນແລ້ວ ກໍໄດ້ເຄື່ອນທັບໄປຕາມທົ່ງຫຍ້າປ່າອັນຕຶບໜາ ເພື່ອໃຫ້ຫວິດຈາກວົງປິດລ້ອມຂອງພວກສັດຕູ ໂດຍມີກອງຮ້ອຍທີ 3 ເຊິ່ງເປັນກອງຮ້ອຍເຂັ້ມແຂງອາດຫານນຳໜ້າ. ນັບເປັນເວລາຂອງການເຄື່ອນທັບ 10 ກວ່າວັນ, ກອງພັນ ທີ 2 ໄດ້ສູ້ຮົບກັບສັດຕູທັງນ້ອຍ ແລະ ໃຫຍ່ 10 ຄັ້ງ ໃນຂະນະທີ່ເຄື່ອນທັບ, ສຸດທ້າຍກອງພັນທີ 2 ພ້ອມກັບ 91 ຄອບຄົວ ໄດ້ຜ່າວົງ ປິດລ້ອມທີ່ແໜ້ນໜາຂອງສັດຕູ ໄປສູ່ເຂດທີ່ໝັ້ນດ້ວຍຄວາມປອດ ໄພ ໂດຍພາຍໃຕ້ການນຳພາອັນຖືກຕ້ອງສະຫຼາດສ່ອງໃສຂອງພັກປະຊາຊົນ ປະຕິວັດລາວ ແລະ ການສະໜັບສະໜູນຊ່ວຍເຫຼືອຢ່າງໝົດຈິດໝົດໃຈຈາກກອງທັບ ແລະ ປະຊາຊົນຫວຽດນາມອ້າຍ-ນ້ອງ.
ການຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ຊຽງຂວາງ ມີຄວາມສຳຄັນ ສ່ອງແສງໃຫ້ເຫັນວ່າ ການນຳພາຂອງພັກຖືກຕ້ອງສະຫຼາດສ່ອງໃສ, ຂະບວນການຕໍ່ສູ້ຂອງພວກເຮົາແມ່ນເປັນທຳ ເຊິ່ງໄດ້ຢັ້ງຢືນໃຫ້ເຫັນຢ່າງຈະແຈ້ງວ່າ: ” ສິນທໍາ ຍາມໃດກໍຊະນະ ອະທຳ “; ການຜ່ານວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ຫຼວງຂອງກຳລັງ ປະກອບອາວຸດເຮົາທີ່ຢູ່ໃຕ້ການນຳພາຂອງພັກ, ເປັນເຫດການປະຫວັດສາດອັນສຳຄັນຂອງຊາດ, ຂອງພັກ, ຂອງກອງທັບເຮົາ ແລະ ເປັນບົດຮຽນອັນລ້ຳຄ່າທີ່ສຸດ ໃຫ້ແກ່ຂະບວນຕໍ່ສູ້ຂອງກອງທັບ ແລະ ປະຊາຊົນເຮົາຍາດເອົາໄຊຊະນະໃນໄລຍະຕໍ່ມາ. ນອກນັ້ນ, ຍັງສະແດງໃຫ້ເຫັນເຖິງຄວາມບໍລິສຸດຜຸດຜ່ອງ, ຄວາມຈົງຮັກພັກດີ, ຄວາມສາມັກຄີເປັນຈິດໜຶ່ງໃຈ ດຽວ, ຄວາມອົດທົນໝັ້ນໜຽວ ບໍ່ຄອນແຄນຕໍ່ການນາບຂູ່, ຫຼອກລວງຂອງສັດຕູ.
