ງານວາງສະແດງສີນຄ້າລະດັບສາກົນ ຫຼື LAO TOP 3 EXPO 2019 ທີ່ລວມ 3 ຂະແໜງການຢູ່ໃນທີ່ດຽວກັນ ປະກອບມີ: ອຸດສາຫະກຳອາຄານ ແລະ ການກໍ່ສ້າງ; ການບົວລະບັດຮັກສານ້ຳ ແລະ ການສະໜອງສິນຄ້າ ແລະ ງານວາສະແດງອາຫານ ແລະ ເຄື່ອງດື່ມ ທີ່ໃຫຍ່ທີ່ສຸດໃນ ສປປ ລາວ ໄດ້ເປີດຂຶ້ນໃນວັນທີ 20 ມິຖຸນາ 2019, ທີ່ຫໍປະຊຸມແຫ່ງຊາດ, ເຊິ່ງມີ 150 ກວ່າບໍລິສັດ ແລະ ຍີ່ຫໍ້ສິນຄ້າຊັ້ນນຳຈາກ 12 ປະເທດ ເຂົ້າຮ່ວມວາງສະແດງ ເພື່ອໃຫ້ພໍ່-ແມ່ປະຊາຊົນພາຍໃນປະເທດ ແລະ ຕ່າງປະເທດ ໄດ້ທ່ຽວຊົມ ແລະ ເລືອກຊື້ໄດ້ຕາມທີ່ໃຈມັກ. ເຂົ້າຮ່ວມມີ ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ, ມີບັນດາຮອງລັດຖະມົນຕີ ພ້ອມດ້ວຍແຂກທີ່ຖືກເຊີນ ທັງພາຍໃນ ແລະ ຕ່າງປະເທດເຂົ້າຮ່ວມ.
ທ່ານ ພອນໄຊ ສຸດທິພົງ ປະທານສະມາຄົມສະຖາປານິກ ແລະ ວິສາວະກຳກໍ່ສ້າງລາວ (ສສວ) ໄດ້ຂຶ້ນລາຍງານກ່ຽວກັບການຈັດງານງານ LAO TOP 3 EXPO 2019 ທີ່ມີ 3 ຂະແໜງການໃນທີ່ດຽວກັນ ປະກອບດ້ວຍ LAOBUILD 2019, ງານວາງສະແດງລະດັບສະກົນທາງດ້ານອຸດສາຫະກຳອາຄານ ແລະ ການກໍ່ສ້າງ, LAOWATER 2019 ງານວາງສະແດງລະດັບສາກົນກ່ຽວກັບນ້ຳ ແລະ ເຕັກໂນໂລຊີການບຳບັດນ້ຳເສຍອັນດັບ 1 ຂອງລາວ ແລະ LAOFOOD 2019 ງານວາງສະແດງລະດັບສາກົນທາງດ້ານອາຫານ ແລະ ເຄື່ອງດື່ມ ທີ່ໃຫຍ່ທີ່ສຸດຂອງລາວ.
ງານວາງສະແດງດັ່ງກ່າວ, ປະກອບມີ 150 ກວ່າບໍລິສັດ ແລະ ຍີ່ຫໍ້ສິນຄ້າຊັ້ນນຳ ຈາກ 12 ປະເທດ ລວມທັງ ຈີນ, ເຢຍລະມັນ, ອິຕາລີ, ຍີ່ປຸ່ນ, ສ. ເກົາຫຼີ, ມາເລເຊຍ, ສິງກະໂປ, ໄທ ແລະ ສະຫະລັດອາເມລິກາ; ເຊິ່ງຈະມີການສະແດງສິນຄ້າ ແລະ ເຕັກໂນໂລຊີໃໝ່ ທາງດ້ານອຸດສາຫະກຳອາຄານ ແລະ ການກໍ່ສ້າງ, ການບົວລະບັດນໍ້າ, ໄຟຟ້າ, ເຄື່ອງປັບອາກາດ ແລະ ອາຫານ-ເຄື່ອງດື່ມ.
ໃນໄລຍະສາມວັນ (20-22 ມິຖຸນາ) ບັນດາທ່ານທີ່ມາຮ່ວມງານ ຈະຄົ້ນພົບການສະໜອງໃໝ່ໆ, ຄົ້ນຫາຄູ່ຮ່ວມທຸລະກິດ, ແບ່ງປັນປະສົບການ ແລະ ໄດ້ຮັບຮູ້ກ່ຽວກັບເຕັກໂນໂລຊີທີ່ເປັນທີ່ຮູ້ຈັກໃນປັດຈຸບັນ ໃນງານຈະມີການຈັດກອງປະຊຸມປະຈຳປີ 2019 ຂອງສະມາຄົມສະຖາປະນິກ ແລະ ວິສະວະກອນກໍ່ສ້າງລາວ (ສສວ) ຊຶ່ງຈະມີນັກສະຖາປານິກ ແລະ ວິສະວະກອນກໍ່ສ້າງຫຼາຍຮ້ອຍຄົນເຂົ້າຮ່ວມ. ນອກຈາກນັ້ນ ການສຳມະນາງານ LAO TOP 3 ຈະໄດ້ມີການປາໄສກ່ຽວກັບສິ່ງທ້າທາຍ ແລະ ການແກ້ໄຂບັນຫາ ທາງດ້ານອຸດສາຫະກຳອາຄານ ແລະ ການກໍ່ສ້າງ ແລະ ການຜະລິດ ແລະ ບຳບັດນ້ຳ.
ພາຍໃນງານຍັງໄດ້ມີການມອບລາງວັນການກໍ່ສ້າງ ແລະ ອະສັງຫາດີເດັ່ນໃນລາວ 2019 ໃຫ້ຈຳນວນ 10 ໂຄງການ.
