ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານຢາເສບຕິດ ພະແນກຕຳຫຼວດ ປກສ ເມືອງຊຽງຮ່ອນ ແຂວງໄຊຍະບູລີ ສົມທົບ ກັບ ປກສ ບ້ານ ເຂົ້າກວດຄົ້ນເຮືອນ 2 ເປົ້າໝາຍ ຄ້າຂາຍຢາບ້າຢູ່ບ້ານປົ່ງແປ້ນ ເມືອງຊຽງຮ່ອນ ພົບເຫັນຢາບ້າເກືອບ 4.000 ເມັດ ໃນວັນທີ 14 ມິຖຸນາ 2019.
ຜູ້ຖືກຫາທັງ 2 ຄົນ ຊື່: ທ້າວ ເຜິ້ງເຮີ່ ອາຍຸ 59 ປີ ຢຶດຢາບ້າ ຈຳ ນວນ 3.808 ເມັດ ແລະ ທ້າວ ຈາຢີເຮີ ອາຍຸ 61 ປີ ພ້ອມຢາບ້າ 20 ເມັດ ທັງ 2 ຄົນຢູ່ບ້ານປົ່ງແປ້ນ ເມືອງຊຽງຮ່ອນ ແຂວງໄຊຍະບູລີ.
ເຈົ້າໜ້າທີ່ ປກສ ເມືອງຊຽງຮ່ອນ ໃຫ້ຮູ້ວ່າ: ຜູ້ຖືກຫາທັງ 2 ຄົນ ເປັນເປົ້າໝາຍຕິດຕາມຂອງເຈົ້າໜ້າທີ່ມາໄລຍະໜຶ່ງແລ້ວ ເນື່ອງຈາກພວກກ່ຽວໄດ້ເອົາຢາເສບຕິດປະເພດຢາບ້າຂາຍໃຫ້ກັບໄວລຸ້ນພາຍໃນບ້ານ ແລະ ບ້ານໃກ້ຄຽງ ຈົນເຮັດໃຫ້ມີສະພາບຄວາມບໍ່ຫງົບພາຍໃນບ້ານ ເປັນຕົ້ນມີໄວລຸ້ນຂີ່ລົດຈັກທ່ຽວເຂົ້າ-ອອກພາຍ ໃນບ້ານສ້າງສຽງເນືອງນັນໃຫ້ກັບປະຊາຊົນໃນເວລາຫຼັບນອນ. ຜ່ານການຕິດຕາມກວດກາຮອດວັນ ທີ 14 ມິຖຸນາ ຈຶ່ງຮູ້ວ່າ ພວກກ່ຽວທັງ 2 ພາກັນໄປຊື້ຢາບ້າຈໍານວນຫຼາຍມາໄວ້ຂາຍ ຈຶ່ງຈັດກໍາລັງຕໍາຫຼວດວິຊາສະເພາະສົມທົບ ກັບ ປກສ ບ້ານເຂົ້າຈັບຕົວ ພ້ອມທັງກວດຄົ້ນເຮືອນພວກກ່ຽວທັງ 2 ຄົນ ພົບເຫັນຢາບ້າຈໍານວນດັ່ງກ່າວຊຸກເຊື່ອງຢູ່ເຮືອນຂອງພວກກ່ຽວ.
ຜ່ານການສອບສວນຜູ້ຖືກຫາທັງ 2 ຄົນ ຮັບສາລະພາບວ່າ: ຢາບ້າທັງໝົດທີ່ເຈົ້າໜ້າທີ່ຢຶດໄດ້ນັ້ນ, ເປັນຂອງພວກຕົນເອງແທ້; ເຊິ່ງໄດ້ຊື້ມາຈາກຜູ້ຂາຍຢູ່ບ້ານຈຽງຕອງ ເມືອງປາກທາ ແຂວງບໍ່ແກ້ວ ເພື່ອໄວ້ຂາຍຍ່ອຍໃຫ້ໄວລຸ້ນທີ່ມີການເຄື່ອນໄຫວມົ້ວສຸມເສບຢາບ້າ, ແຕ່ກໍຖືກເຈົ້າໜ້າທີ່ຕໍາຫຼວດຈັບຕົວໄດ້.
