ໃນວັນທີ 13 ສິງຫາ 2019, ວິທະຍາຄານຕໍາຫຼວດປະຊາຊົນ ( ວຕປ ) ກະຊວງປ້ອງກັນຄວາມສະຫງົບ ໄດ້ຈັດພິທີ ປ້ອງກັນບົດຈົບຊັ້ນ ນັກສຶກສາປະລິນຍາຕີ ລະບົບຕໍ່ເນື່ອງ ຮຸ່ນທີ 12/2 ສົກປີ 2019 ໂດຍການເຂົ້າຮ່ວມເປັນປະທານຂອງ ພົຈວ ບຸນຊູ ນາມມະຈັກ ອໍານວຍການ ວຕປ, ມີທ່ານ ຮສ ປອ ຫຼ້າວັນ ວົງຄຳສານ ຮອງຫົວໜ້າກົມສຶກ ສາຊັ້ນສູງ ກະຊວງສຶກສາທິການ ແລະ ກິລາ, ມີພາກສ່ວນທີ່ກ່ຽວຂ້ອງ ພ້ອມດ້ວຍນັກສຶກສາ ເຂົ້າຮ່ວມ.
ພັຕ ພອນສີ ວົງດາລາ ຮອງຫົວໜ້າພະແນກຄຸ້ມຄອງການຄົ້ນຄວ້າວິທະຍາສາດ ກ່າວວ່າ: ນັກສຶກສາໃນສົກນີ້ ມີທັງໝົດ 64 ສະຫາຍ ຍິງ 5 ສະຫາຍ; ໃນນັ້ນ, ຂຽນບົດລາຍງານໂຄງການຈົບຊັ້ນ ຈໍານວນ 18 ສະຫາຍ, ມີ 18 ຫົວ ຂໍ້ ໂດຍເລີ່ມຜ່ານບົດລາຍງານແຕ່ວັນທີ 13-16 ສິງຫາ. ສໍາລັບວັນທີ 13 ສິງຫາ ນີ້, ປະກອບມີ 3 ຫົວ ຂໍ້ ຄື: 1/. ຍົກສູງຄຸນນະພາບວຽກງານສະກັດກັ້ນ, ແກ້ໄຂຜູ້ລະເມີດລະບຽບ, ກົດໝາຍການສັນຈອນທາງບົກ ຢູ່ນະຄອນໄກສອນ ພົມວິຫານ ແຂວງສະຫວັນນະເຂດ; 2/. ຍົກສູງຄຸນນະພາບວຽກງານ ປກສ ກຸ່ມບ້ານຢູ່ເມືອງບົວລະພາ ແຂວງຄຳມ່ວນ; 3/. ການດຳເນີນວຽກງານສືບສວນ-ສອບສວນຄະດີອຸບັດຕິເຫດການສັນ ຈອນທາງບົກຢູ່ເມືອງຈັນທະບູລີ ນະຄອນຫຼວງວຽງຈັນ.
ສຳລັບຫົວຂໍ້ທີ່ສະເໜີໂດຍ ຮທ ສົມສະໜານ ເຄນນະວົງ ແມ່ນແນໃສ່ຊອກໃຫ້ເຫັນບັນດາບັນຫາທີ່ເປັນເງື່ອນ ໄຂ, ສາເຫດ-ສະພາບຈຸດພິເສດຕ່າງໆທີ່ພົວພັນເຖິງວຽກງານສະກັດກັ້ນ, ແກ້ໄຂຜູ້ລະເມີດລະບຽບກົດໝາຍສັນຈອນທາງບົກ; ພ້ອມນັ້ນ, ເພື່ອຊອກໃຫ້ໄດ້ຂໍ້ມູນຫຼັກຖານໃນການຢັ້ງຢືນຄວາມບໍລິສຸດ ຫຼື ຄວາມຜິດຂອງ ຜູ້ຖືກຫາ, ຜູ້ລະເມີດລະບຽບກົດໝາຍ, ຊອກໃຫ້ເຫັນບັນດາສາເຫດການກະທໍາຜິດຢ່າງຮີບດ່ວນ, ຄົບຖ້ວນ, ຮອບດ້ານ ແລະ ນໍາເອົາຜູ້ຖືກຫາມາສຶກສາອົບຮົມ, ປັບໃໝ ຫຼື ດໍາເນີນຄະດີຕາມກົດໝາຍຢ່າງຖືກຕ້ອງ ແລະ ຍຸຕິທໍາ ບົນພື້ນຖານກົດໝາຍອາຍາ, ການດໍາເນີນຄະດີອາຍາ, ກົດໝາຍການສັນຈອນທາງບົກ ເພື່ອຮັບປະກັນ ຄວາມສະຫງົບ-ປອດໄພ, ຄວາມເປັນລະບຽບຮຽບຮ້ອຍຂອງສັງຄົມ ເວົ້າລວມ ເວົ້າສະເພາະແມ່ນຢູ່ພື້ນທີ່ນະ ຄອນໄກສອນພົມວິຫານ.
