ຄວາມຄືບໜ້າ ການຈັດສັນ ຄວາມບໍ່ເປັນລະບຽບຮຽບຮ້ອຍ ຕາມເສັ້ນທາງສາຍຫຼັກ 4 ເມືອງ ໃນນະຄອນຫຼວງວຽງຈັນ, ຄະນະຮັບຜິດຊອບຈັດສັນ ໄດ້ສຸມໃສ່ຈັດຕັ້ງປະຕິບັດ ຢ່າງເຂັ້ມງວດ, ເຊິ່ງໃນນັ້ນ ໄດ້ມີການລົງມ້າງ ເທີບເງີບ, ປ້າຍໂຄສະນາ ແລະ ສິ່ງກີດຂວາງ ຕາມເສັ້ນທາງສາຍຫຼັກ ເພື່ອ ຄວາມເປັນລະບຽບຮຽບຮ້ອຍ ແລະ ແກ້ໄຂ ການສັນຈອນແອອັດ ແລະ ສ່ວນຫຼາຍ ແມ່ນສໍາເລັດໄປແລ້ວ; ແຕ່ ໜຶ່ງໃນເມືອງ ທີ່ປະຕິບັດບໍ່ໄດ້ຕາມແຜນ ຫຼື ຫຼ້າຊ້າກວ່າໝູ່ ແມ່ນ ເມືອງໄຊທານີ ຍ້ອນປະຊາຊົນ ບໍ່ໃຫ້ການຮ່ວມມື ເຮັດໃຫ້ວຽກງານຊັກຊ້າ ແລະ ອີກດ້ານໜຶ່ງ, ເຈົ້າໜ້າທີ່ ບໍ່ມີຄວາມເຂັ້ມງວດເທົ່າທີ່ຄວນ ຍັງເຮັດແບບແປະໆບາງໆ ເຮັດໃຫ້ວຽກງານບໍ່ໍສໍາເລັດ ຕາມແຜນການທີ່ກໍານົດໄວ້.
ການຈັດສັນ ຄວາມບໍ່ເປັນລະບຽບຮຽບຮ້ອຍ ຕາມສາຍທາງສາຍຫຼັກ ແມ່ນອີງໃສ່ ຂໍ້ຕົກລົງຂອງ ເຈົ້າຄອງນະຄອນຫຼວງວຽງຈັນ ສະບັບເລກທີ 1184/ວນວ ລົງວັນທີ 20 ທັນວາ 2017 ວ່າດ້ວຍ ການຈັດສັນ ຄວາມບໍ່ເປັນລະບຽບຮຽບຮ້ອຍ ໃນຕົວເມືອງ ແລະ ຊານເມືອງ ແລະ ແຈ້ງການຂອງ ເຈົ້າເມືອງໆໄຊທານີ ສະບັບເລກທີ 018/ຈມ.ຊທນ ລົງວັນທີ 11 ກຸມພາ 2019 ວ່າດ້ວຍ ການໃຫ້ມ້າງ, ຮື້ຖອນ, ເທີບເງີບ, ຕູບ, ເຕັ້ນ, ຮົ້ວ, ປ້າຍໂຄສະນາ ແລະ ສິ່ງປຸກສ້າງ ທີ່ກວມເອົາ ເຂດສະຫງວນຂອງທາງ ( ດິນລັດ ).
ຈາກນັ້ນ, ຈຶ່ງຈັດຕັ້ງ ຄະນະຮັບຜິດຊອບ ໂຄສະນາເຜີຍແຜ່ໃຫ້ ປະຊາຊົນຕາມບ້ານເປົ້າໝາຍ ໄດ້ຮັບຮູ້ ແລະ ທົ່ວເຖິງ, ພ້ອມທັງ ເກັບກໍາບັນດາເປົ້າໝາຍ ແລ້ວເຮັດບົດບັນທຶກ – ສັນຍາກັນຄັກແນ່ ໂດຍເລີ່ມແຕ່ ເດືອນກຸມພາ ຈົນເຖິງ ປັດຈຸບັນ.
ສຳຫຼັບ ການຈັດສັນ ຄວາມບໍ່ເປັນລະບຽບຮຽບຮ້ອຍ ໃນເມືອງໄຊທານີ ແມ່ນໄດ້ສຸມໃສ່ 4 ເສັ້ນທາງ ຄື:
- ເສັ້ນທາງດົງໂດກ – ຕານມີໄຊ;
- ຖະໜົນ ໄກສອນພົມວິຫານ;
- ຖະໜົນ 13 ໃຕ້;
- ຖະໜົນ ເລກທີ 10 ( ທາງທ່າງ່ອນ ).
+ ສໍາລັບ ເສັ້ນທາງດົງໂດກ – ຕານມີໄຊ
ເລີ່ມແຕ່ ສີ່ແຍກໄຟອຳນາດ 450 ປີ ຫາ ສີ່ແຍກໄຟອຳນາດ ຕາມມີໄຊ ແມ່ນກວມເອົາ 5 ບ້ານ ຄື: ບ້ານຊ້າງຄູ້, ດົງໂດກ, ຄໍາຮຸ່ງ, ບ້ານຕານມີໄຊ ແລະ ບ້ານສະພັງເມິກ.
ຜ່ານການລົງກວດກາ ແມ່ນໄດ້ເຮັດບົດບັນທຶກ ລວມມີ 156 ເປົ້າໝາຍ, ມີ 368 ກໍລະນີ ເຊັ່ນ: ອາຄານກໍ່ 36 ກໍລະນີ, ເທີບເງີບ 120 ກໍລະນີ, ຕູບເຄື່ອນທີ່ 9 ຕູບ, ປ້າຍ 137 ປ້າຍ, ຮົ້ວ – ກໍາແພງ 16 ກໍລະນີ, ວາງສິນຄ້າ – ວັດສະດຸຊະຊາຍ 49 ກໍລະນີ ແລະ ຈອດລົດຊະຊາຍ ມີ 1 ກໍລະນີ.
ທ່ານ ຄໍາຜົງ ແພງສີສົມບູນ ຫົວໜ້າຫ້ອງການໂຍທາທິການ ແລະ ຂົນສົ່ງ ຮອງຫົວໜ້າຄະນະຈັດສັນ ຄວາມບໍ່ໍເປັນລະບຽບຮຽບຮ້ອຍ ເມືອງໄຊທານີ ໃຫ້ສໍາພາດ ໃນວັນທີ 29 ກໍລະກົດ ວ່າ:
ຜ່ານການລົງຈັດຕັ້ງປະຕິບັດຕົວຈິງ, ຄະນະຮັບຜິດຊອບ ສາມາດປະຕິບັດໄດ້ພຽງແຕ່ 39 ກໍລະນີ ແລະ ຍັງອີກ 319 ກໍລະນີ ແມ່ນຍັງບໍ່ສໍາເລັດ, ສາເຫດຍ້ອນ ປະຊາຊົນສ່ວນຫຼາຍ ຍັງບໍ່ເຂົ້າໃຈ ເປັນຕົ້ນແມ່ນ:
ເວລາທີ່ ຄະນະຮັບຜິດຊອບ ລົງກວດກາ ແລະ ເຮັດວຽກຕົວຈິງ ປະຊາຊົນຍັງມີການຕໍ່ວ່າ – ເວົ້າຈາບໍ່ສຸພາບ, ບໍ່ໃຫ້ຄວາມຮ່ວມມື, ສະຕິຕໍ່ລະບຽບກົດໝາຍ ຍັງບໍ່ສູງ ເອົາແຕ່ຜົນປະໂຫຍດເຂົ້າໃສ່ຕົວເອງ ໂດຍບໍ່ຄໍານຶງເຖິງຜົນປະໂຫຍດສ່ວນລວມ.
- ໃນກໍລະນີ, ເຈົ້າໜ້າທີ່ ມີການລົງກວດກາແນະນໍາໃຫ້ມ້າງ ແລະ ຫຍັບຮ້ານຂາຍເຄື່ອງ ເຂົ້າໄປບໍ່ໃຫ້ກວມຫົນທາງ, ບາງຄົນ ກໍຫຍັບເຂົ້າແຕ່ຕອນບອກ, ແຕ່ເມື່ອ ຄະນະກໍາມະການ ລົງກວດກາບ່ອນອື່ນ ແມ່ນຫຍັບອອກຄືນ.
- ການກະທໍາດັ່ງກ່າວ ສະແດງໃຫ້ເຫັນເຖິງຄວາມເຫັນແກ່ໂຕຂອງບຸກຄົນຈໍານວນໜຶ່ງ ເຊິ່ງກະທົບເຖິງຄວາມເປັນລະບຽບຮຽບຮ້ອຍ ແລະ ຄວາມຈົບງາມຕາມເສັ້ນທາງ; ຍິ່ງກວ່ານັ້ນ, ການຈັດຕັ້ງປະຕິບັດໜ້າທີ່ ກໍພົບກັບບັນຫາຫຍຸ້ງຍາກຫຼາຍສົມຄວນ.
ຢ່າງໃດກໍຕາມ, ຕໍ່ກັບ ຜູ້ທີ່ບໍ່ໃຫ້ຄວາມຮ່ວມມື, ທາງ ຄະນະຮັບຜິດຊອບ ກໍໄດ້ສຶກສາອົບຮົມ ພ້ອມທັງແນະນໍາແຈ້ງການໃຫ້ຈະແຈ້ງຂຶ້ນຕື່ມ ແລະ ຖ້າຍັງມີບຸກຄົນໃດ ບໍ່ໃຫ້ການຮ່ວມມື ກໍຈະໃຊ້ມາດຕະການເຂັ້ມງວດ.
ສະນັ້ນ, ປະຊາຊົນຊາວຄ້າ – ຂາຍ ທີ່ປະກອບການຕ່າງໆ ທີ່ກວມເອົາເຂດສະຫງວນທາງ ຈົ່ງໃຫ້ການຮ່ວມມືມີຄວາມຕື່ນຕົວຈິງໃຈ ມ້າງ, ຮື້ຖອນ, ເທີບເງີບ, ຕູບ, ເຕັ້ນ, ໂຕະຕັ່ງ, ຮົ້ວ, ປ້າຍໂຄສະນາ ແລະ ສິ່ງປຸກສ້າງອື່ນໆ ເພື່ອໃຫ້ຄວາມເປັນລະບຽບຮຽບຮ້ອຍ ແລະ ງາມຕາ ແລະ ເປັນການຫຼຸດຜ່ອນ ການເກີດອຸບັດຕິເຫດ, ຄວາມແອອັດຕໍ່ການສັນຈອນ ເນື່ອງຈາກ ປະຊາກອນມີອັດຕາເພີ່ມຂຶ້ນເລື້ອຍໆ ແລະ ຍານພາຫະນະ ກໍເພີ່ມຂຶ້ນ ເຊັ່ນດຽວກັນ.
