ໄລຍະຜ່ານມາ, ລັດຖະບານ ໄດ້ສຸມຄວາມພະຍາຍາມຢ່າງສຸດຂີດໃສ່ການຕິດຕັ້ງປະຕິບັດແຜນວຽກຈຸດສຸມ ທີ່ກຳນົດໄວ້ໃນແຜນພັດທະນາເສດຖະກິດ-ສັງຄົມ ແນ່ໃສ່ສູ້ຊົນໃຫ້ບັນລຸຄາດໝາຍທີ່ສະພາໄດ້ຮັບຮອງຕາມມະຕິ ເລກທີ 099/ສພຊ ລົງວັນທີ 20/11/2018 ແລະ ມະຕິເລກທີ 01/ສພຊ ລົງວັນທີ 7/6/ 2019 ແຕ່ຫຼາຍບັນ ຫາທີ່ຍັງບໍ່ສາມາດບັນລຸຄາດໝາຍໄດ້ ຍ້ອນວ່າສະພາບແວດລ້ອມທັງສາກົນ ແລະ ພາຍໃນ ໄດ້ສົ່ງຜົນກະທົບທາງ ກົງ ແລະ ທາງອ້ອມຕໍ່ການຄຸ້ມຄອງເສດຖະກິດຂອງປະເທດທີ່ມີຄວາມບອບບາງຢູ່ແລ້ວ ໃຫ້ພົບຄວາມຫຍຸ້ງ ຍາກ ແລະ ທ້າທາຍຫຼາຍຂຶ້ນ ເຮັດໃຫ້ລັດຖະບານຕ້ອງຮີບຮ້ອນແກ້ໄຂ 10 ບັນຫາທີ່ຄົງຄ້າງໃຫ້ສຳເລັດ ເພື່ອຮັບປະກັນໃຫ້ການພັດທະນາເສດຖະກິດ-ສັງຄົມ ດຳເນີນໄປຕາມແຜນ.
ທ່ານ ທອງລຸນ ສີສຸລິດ ນາຍົກລັດຖະມົນຕີ ລາຍງານຕໍ່ກອງປະຊຸມສະໄໝສາມັນເທື່ອ ທີ 8 ຂອງສະພາແຫ່ງ ຊາດ ຊຸດທີ VIII ໃນວັນ ທີ 7 ພະຈິກ 2019 ວ່າ: ໃນໄລຍະ 9 ເດືອນ ຜ່ານມາ, ລັດຖະບານ ຍັງຮັກສາໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ເຖິງຈະຍັງມີບາງເຫດການເກີດຂຶ້ນຢູ່ພາຍ ໃນ ແລະ ບໍລິເວນຊາຍແດນບາງຈຸດ, ແຕ່ລັດຖະບານ ກໍໄດ້ແກ້ໄຂຢ່າງຮອບຄອບຮັດກຸມ; ສືບຕໍ່ການຄຸ້ມຄອງບໍລິຫານລັດຢ່າງຮັດກຸມ, ປະຕິບັດກົດໝາຍຢ່າງເຄັ່ງຄັດ, ຈໍາກັດການຄ້າ-ຂາຍເຖື່ອນ, ປາບປາມຢາເສບຕິດ; ການຂະຫຍາຍຕົວຂອງເສດຖະກິດ ບັນລຸໄດ້ 6,4% ( ຄາດຄະເນໝົດປີ ), ເຊິ່ງຫຼຸດຄາດໝາຍທີ່ສະພາຮັບຮອງ, ແຕ່ກໍຍັງເປັນຕົວເລກການຂະຫຍາຍຕົວໃນລະດັບດີຕໍ່ເນື່ອງ ທີ່ສໍາຄັນການຂະຫຍາຍຕົວດັ່ງກ່າວແມ່ນການຂະຫຍາຍຕົວທີ່ຂ້ອນຂ້າງມີຄຸນນະພາບກວ່າເກົ່າ; ການດຸ່ນດ່ຽງລາຍຮັບ-ລາຍຈ່າຍພາຍໃນມີທ່າຕັ້ງໜ້າ ອັດຕາ ສ່ວນຂາດດຸນງົບປະມານຕໍ່ GDP ຫຼຸດລົງຈາກປະມານ 6% ໃນໄລຍະປີ 2015-2016 ມາເປັນປະມານ 4% ໃນປີ 2018, ລາຍຮັບຈາກພາຍໃນ ເພີ່ມຂຶ້ນຈາກ ປະມານ 21.000 ຕື້ກີບ ໃນປີ 2016 ມາເປັນປະມານ 26.200 ຕື້ກີບ ໃນ ປີ 2019.
ນອກນີ້, ລັດຖະບານຍັງໄດ້ສືບຕໍ່ແກ້ໄຂບັນຫາໜີ້ສິນໂຄງການລົງທຶນຂອງລັດຢ່າງຕັ້ງໜ້າ, ເຊິ່ງຮອດປັດຈຸບັນ ຊໍາລະໄດ້ 22.147 ຕື້ກີບ ເທົ່າກັບ 50,8% ຂອງແຜນການປີ; ແກ້ໄຂບັນຫາການຜະລິດໄຟຟ້າ ທີ່ບໍ່ມີຕະຫຼາດ ຮອງຮັບທີ່ຜ່ານມາ ໂດຍໄດ້ເຈລະຈາຊື້-ຂາຍ ແລະ ບັນລຸຂໍ້ຕົກລົງ ເພື່ອຂາຍໄຟຟ້າໃຫ້ປະເທດເພື່ອນບ້ານ; ດໍາເນີນ ແລະ ສໍາເລັດການກວດກາໂຄງການເຊົ່າ ແລະ ສໍາປະທານທີ່ດິນລັດ ທີ່ບໍ່ມີການເຄື່ອນໄຫວນໍາໃຊ້ທີ່ຖືກ ຕ້ອງ; ຈັດຕັ້ງປະຕິບັດຄໍາສັ່ງ ເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ຢ່າງເຄັ່ງຄັດ ແລະ ສາມາດກວດເຫັນການບຸກລຸກເນື້ອທີ່ປ່າໄມ້ ທັງໝົດ 6.421,73 ເຮັກຕາ, ພາຍຫຼັງລັດຖະບານໄດ້ອອກຄໍາສັ່ງສະບັບດັ່ງກ່າວ ຈົນຮອດເດືອນມິຖຸນາ 2019 ຄະນະຮັບຜິດຊອບການປະມູນຂາຍໄມ້ຢຶດທົ່ວປະເທດ ໄດ້ຮັບໄມ້ຢຶດລວມທັງໝົດ ຈໍານວນ 98.023,42 ແມັດ ກ້ອນ ແລະ 531,44 ໂຕນ.
ເຖິງຢ່າງໃດກໍຕາມ, ລັດຖະບານ ຍັງມີຂໍ້ຄົງຄ້າງຫຼາຍດ້ານທີ່ຕ້ອງໄດ້ຮີບຮ້ອນແກ້ໄຂ ໃນປີ 2020, ເຊິ່ງປະກອບມີ ຄື:
- ການຂະຫຍາຍຕົວຂອງເສດຖະກິດ ຫຼື GDPໃນປີ 2019 ບັນລຸພຽງ ປະມານ 6,4% ຕາມຄາດໝາຍແມ່ນ 6,7% ແລະ ສະເລ່ຍຫົວຄົນ ບັນລຸ 2.677 ໂດລາສະຫະລັດ, ເຊິ່ງສາເຫດສໍາຄັນສ່ວນໜຶ່ງ ແມ່ນຍ້ອນເກີດໄພພິບັດທໍາມະຊາດ, ພະຍາດລະບາດ ແລະ ໄພແຫ້ງແລ້ງ; ແຕ່ພ້ອມກັນນັ້ນ, ຂະແໜງການ ຜະລິດທີ່ເປັນພື້ນຖານໃນການສ້າງຖານລາຍຮັບທີ່ຍືນຍົງ ກໍຍັງບໍ່ທັນຫຼາກຫຼາຍ ແລະ ຍັງບໍ່ປະກອບສ່ວນຢ່າງແຂງແຮງເຂົ້າໃນການພັດທະນາ ຈຶ່ງເຮັດໃຫ້ການເຕີບໂຕຂອງເສດຖະກິດຢູ່ໃນຈັງຫວະທີ່ຊ້າລົງກວ່າປີຜ່ານມາ.
- ສະມັດຕະພາບຂອງການຜະລິດຍັງບໍ່ທັນສູງ, ຍັງມີລັກສະນະທໍາມະຊາດ ເຮັດໃຫ້ການຜະລິດກະສິກໍາ ຕິດພັນກັບອຸດສາຫະກໍາປຸງແຕ່ງບໍ່ທັນຂະຫຍາຍຕົວດີ ແລະ ບໍ່ສາມາດແຂ່ງຂັນກັບສິນຄ້ານໍາເຂົ້າ ແລະ ສິນຄ້າຂອງປະເທດເພື່ອນບ້ານ ທັງເຮັດໃຫ້ເງິນຕາໄຫຼອອກຕ່າງປະເທດ ທີ່ບໍ່ສາມາດຄຸ້ມຄອງໄດ້.
- ການປັບປຸງລັດວິສາຫະກິດ ເປັນວຽກງານທີ່ລັດຖະບານໃຫ້ຄວາມສໍາຄັນ ທັງໄດ້ກໍາ ນົດເປົ້າໝາຍບໍລິ ສັດ ທີ່ຈະປັບປຸງຊັດເຈນ ແຕ່ໃນພາກປະຕິບັດ ຍັງມີຄວາມຄືບໜ້າຊ້າຍ້ອນມີບັນຫາສະສົມຊໍາເຮື້ອມາດົນ ແຕ່ຊອກຫາຊ່ອງທາງແກ້ໄຂນັ້ນຍັງບໍ່ຕໍ່ເນື່ອງ, ຊັກຊ້າແກ່ຍາວ ແລະ ບາງບໍລິສັດ ກໍາລັງຈົມເລິກເຂົ້າ ສູ່ວິກິດໄດ້.
- ການແກ້ໄຂບັນຫາສະພາບແວດລ້ອມ, ຂັ້ນຂອດ ແລະ ຄວາມໂປ່ງໃສໃນການລົງທຶນ ແລະ ດໍາເນີນທຸ ລະກິດຍັງບໍ່ທັນບຸກທະລຸແທ້, ເຖິງແມ່ນວ່າທະນາຄານໂລກ ຕີລາຄາວ່າ ພວກເຮົາໄດ້ມີຄວາມພະຍາ ຍາມ ແລະ ໄດ້ປັບປຸງດີຂຶ້ນຫຼາຍດ້ານທາງດ້ານນິຕິກໍາ ແຕ່ໃນພຶດຕິກໍາຍັງບໍ່ທັນໄປຕາມໆກັນຍັງ ມີຫຼາຍຕົວຊີ້ວັດຍັງບໍ່ສາມາດແຂ່ງຂັນໄດ້ກັບປະເທດອື່ນໆ ຈຶ່ງພາໃຫ້ອັນດັບຕົວຊີ້ວັດຄວາມຍາກງ່າຍໃນການດໍາເນີນທຸລະກິດ ສໍາລັບປີ 2020 ຍັງຄົງທີ່.
- ການປັບປຸງ ແລະ ສົ່ງເສີມການທ່ອງທ່ຽວ ຖືເປັນບຸລິມະສິດທີ່ສໍາຄັນຂອງລັດຖະບານ ທັງໃນປີຜ່ານມາ ແລະ ປີນີ້, ທັງເປັນຂະແໜງເສດຖະກິດ ທີ່ປະເທດເຮົາມີທ່າແຮງບົ່ມຊ້ອນຫຼາຍ, ສາມາດຊຸກຍູ້ການຜະ ລິດ ແລະ ບໍລິການ ເພື່ອສົ່ງອອກກັບທີ່ ແລະ ເປັນກໍາລັງ ແຮງສໍາຄັນ ໃນການກະຕຸ້ນເສດຖະກິດ, ແຕ່ ໃນຕົວຈິງການທ່ອງທ່ຽວຢູ່ປະເທດເຮົາ ໃນປີນີ້ ກໍຍັງບໍ່ທັນຄຶກຄັກ ແລະ ອາດບໍ່ບັນລຸຕາມຄາດໝາຍຈໍານວນນັກທ່ອງທ່ຽວທີ່ວາງໄວ້.
- ການເກັບລາຍຮັບຍັງບໍ່ຄົບຖ້ວນ ແລະ ອາດບໍ່ບັນລຸຕາມແຜນການ ຍັງເປັນບັນຫາຕ້ອງແກ້ໄຂຕໍ່ໄປ, ການຄຸ້ມຄອງລາຄາສິນຄ້າຍັງເຮັດບໍ່ທັນໄດ້ດີ, ການຜະລິດສິນຄ້າພາຍໃນຍັງບໍ່ທັນພົ້ນເດັ່ນ, ການລົງທຶນສ່ວນຫຼາຍແມ່ນເນັ້ນໃສ່ແຕ່ການກໍ່ສ້າງພື້ນຖານໂຄງລ່າງ, ການຄຸ້ມຄອງໂຄງການລົງທຶນຂອງລັດ ເຖິງແມ່ນວ່າໄດ້ປະຕິບັດຕາມຂັ້ນຕອນ ແລະ ລະບຽບການ ແຕ່ຍັງບໍ່ເຂັ້ມງວດເທົ່າທີ່ຄວນ, ການ ຊ່ວຍເຫຼືອ-ກູ້ຢືມຈາກຕ່າງປະເທດ ແລະ ການລົງທຶນຂອງພາກເອກະຊົນ ຍັງບໍ່ທັນມີປະສິດທິຜົນເທົ່າທີ່ຄວນ.
- ສະຖຽນລະພາບທາງດ້ານເງິນຕາຍັງບໍ່ທັນໜັກແໜ້ນ ເປັນຕົ້ນສະພາບອັດຕາການແລກປ່ຽນມີການເໜັງຕີງແຮງ, ສ່ວນລະຫວ່າງອັດຕາແລກປ່ຽນຕະຫຼາດ ແລະ ທະນາຄານ ຍັງຫຍັບຫ່າງຈາກກັນຫຼາຍ ແລະ ຍັງບໍ່ທັນຖືກແກ້ໄຂຢ່າງຂາດຕົວ, ເຊິ່ງສາເຫດແມ່ນຍ້ອນພື້ນຖານການຜະລິດພາຍໃນຂອງປະເທດ ບໍ່ເຂັ້ມແຂງ ແລະ ນໍາເຂົ້າຫຼາຍກວ່າສົ່ງອອກ.
- ລະດັບຄັງສໍາຮອງເງິນຕາຕ່າງປະເທດ ຍັງມີຈໍາກັດ ແລະ ໂຄງປະກອບຂອງຄັງສໍາຮອງເງິນຕາຕ່າງປະເທດຍັງບໍ່ທັນຫຼາກຫຼາຍ, ການຂາດດຸນຊໍາລະປົກກະຕິກັບຕ່າງປະເທດ ແລະ ຍອດໜີ້ສິນຕໍ່ຕ່າງປະເທດ ຍັງຢູ່ໃນລະດັບສູງ ໃນຂະນະການນໍາໃຊ້ເງິນຕາຕ່າງປະເທດຢູ່ໃນສັງຄົມຍັງແຜ່ຫຼາຍ ເນື່ອງຈາກສະພາບອັດ ຕາ ແລກປ່ຽນເງິນກີບອ່ອນຄ່າ ແລະ ຄວາມຕ້ອງການເງິນຕາ ເພື່ອຊໍາລະສະສາງ ທັງຢູ່ພາຍໃນ ແລະ ຕ່າງປະເທດຍັງສູງ; ອັດຕາສ່ວນໜີບໍ່ເກີດດອກອອກຜົນ NPL ສູງກວ່າແຜນການທີ່ກໍານົດ ເນື່ອງຈາກບັນ ຫາໜີ້ສິນຄຸມເຄືອທີ່ຕິດພັນກັບໂຄງການລົງທຶນ.
- ການພັດທະນາຊົນນະບົດ ແລະ ການແກ້ໄຂຄວາມທຸກຍາກຂອງປະຊາຊົນ ຍັງບໍ່ທັນເຂົ້າສູ່ລວງເລິກເທົ່າທີ່ຄວນ, ຄວາມແຕກໂຕນຂອງການພັດທະນາລະຫວ່າງຕົວເມືອງ ແລະ ຊົນນະບົດຍັງຫ່າງກັນຢູ່.
- ປະກົດການຫຍໍ້ທໍ້ໃນສັງຄົມ ເປັນຕົ້ນການຫຼິ້ນກິນຟຸມເຟືອຍ, ບັນຫາຢາເສບຕິດ, ການປຸ້ນຈີ້, ຂີ້ລັກງັດແງະ, ອຸບັດຕິເຫດ ແລະ ໄພສັງຄົມອື່ນໆ ເຖິງແມ່ນວ່າໄດ້ເອົາໃຈໃສ່ແກ້ໄຂ ແຕ່ກໍຍັງມີລັກສະນະແຜ່ຫຼາຍ ແລະ ສົ່ງຜົນທາງລົບຕໍ່ສັງຄົມ ໂດຍສະເພາະແມ່ນໄວໜຸ່ມ.
