ປະກາດແຕ່ງຕັ້ງ ຫົວໜ້າອໍານວຍການ ລບຄ ຜູ້ໃໝ່

ລັດວິສາຫະກິດ ບໍລິການຄວາມປອດໄພ (ລບຄ) ກະຊວງ ປກສ ໄດ້ຈັດພິທີປະກາດແຕ່ງຕັ້ງ ຫົວໜ້າອຳນວຍການ ລບຄ ຜູ້ໃໝ່ ໃນວັນທີ 14 ກຸມພາ 2020, ເຂົ້າຮ່ວມໂດຍ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງ ປກສ ແລະ ພັອ ບຸນຮຸ່ງ ມະຫາໄຊ ອະດີດຜູ້ອຳນວຍການ ລັດວິສາຫະກິດ ບໍລິການຄວາມປອດໄພ, ໂດຍມີບັນດາຄະນະພັກ-ຄະນະອຳນວຍ, ຫົວໜ້າພະແນກ-ຮອງພະແນກ ແລະ ພະນັກງານບັນຊາ ຈັດສົ່ງ-ສາຍກວດ ເຂົ້າຮ່ວມ.

ພັທ ຄຳພອນ ແສງສາລິຈັນ ຮອງຫົວໜ້າກົມຈັດຕັ້ງພະນັກງານ ກົມໃຫຍ່ການເມືອງ ປ້ອງກັນຄວາມສະຫງົບ ໄດ້ຜ່ານຂໍ້ຕົກລົງຂອງ ກະຊວງປ້ອງກັນຄວາມສະຫງົບ ວ່າດ້ວຍ ການແຕ່ງຕັ້ງ ຫົວໜ້າອຳນວຍການ ລັດວິສາຫະກິດ ບໍລິການຄວາມປອດໄພ ເຊິ່ງໃນນີ້ໄດ້ແຕ່ງຕັ້ງ:

• ພັທ ວົງຄຳ ມັງຄະເສີມ ເປັນ ຫົວໜ້າອຳນວຍການ ລັດວິສາຫະກິດ ບໍລິການຄວາມປອດໄພ (ຜູ້ໃໝ່).

ທັງນີ້, ກໍເພື່ອເປັນການປັບປຸງ ກົງຈັກການຈັດຕັ້ງຂອງ ລັດວິສາຫະກິດ ບໍລິການຄວາມປອດໄພ ໃຫ້ມີຄວາມສອດຄ່ອງກັບການຊີ້ນຳ, ບັນຊາໃນການເຄື່ອນໄຫວດຳເນີນທຸລະກິດ ໃຫ້ມີຄວາມເຂັ້ມແຂງ ທາງດ້ານການຈັດຕັ້ງ, ສາມາດຕອບສະໜອງກັບ ຄວາມຮຽກຮ້ອງຕ້ອງການຂອງໜ້າທີ່ວຽກງານ, ສອດຄ່ອງກັບສະພາບຕົວຈິງ ເພື່ອເຮັດສໍາເລັດໜ້າທີ່ພັກ-ລັດ ແລະ ການຈັດຕັ້ງຂັ້ນເທິງມອບໝາຍໃຫ້.

ໃນໂອກາດນີ້, ພົຕ ກົງທອງ ພົງວິຈິດ ໄດ້ເນັ້ນໃຫ້ ຜູ້ໄດ້ຮັບໜ້າທີ່ໃໝ່ ຈົ່ງຍົກສູງບົດບາດການຊີ້ນຳ-ນຳພາ, ປັບປຸງແບບແຜນການນໍາພາ ແລະ ແບ່ງຄວາມຮັບຜິດຊອບຕາມໜ້າທີ່ຂອງແຕ່ລະບຸກຄົນ, ພ້ອມທັງເອົາໃຈໃສ່ສຶກສາອົບຮົມ ການເມືອງ-ແນວຄິດຂອງພະນັກງານ ພາຍໃນ ລບຄ ໃຫ້ມີຄວາມໜັກແໜ້ນເຂັ້ມແຂງ, ມີຄວາມສາມັກຄີແໜ້ນແຟ້ນ, ມີຄວາມບຸກບືນຫ້າວຫັນ ໃນການປະຕິບັດໜ້າທີ່ວຽກງານ ທີ່ໄດ້ຮັບມອບໝາຍໃຫ້ດີຂຶ້ນກວ່າເກົ່າ ແລະ ເອົາໃຈໃສ່ຢ່າງຕັ້ງໜ້າໃນການຊີ້ນຳ-ນຳພາພະນັກງານ ຈັດຕັ້ງປະຕິບັດວຽກງານວິຊາສະເພາະ ຕາມໜ້າທີ່ຮັບຜິດຊອບໃຫ້ສຳເລັດ, ເຮັດໃຫ້ວຽກງານບໍລິການຄວາມປອດໄພ ມີຄວາມເຕີບໃຫຍ່ເຂັ້ມແຂງ, ເຮັດໃຫ້ລູກຄ້າຜູ້ທີ່ໃຊ້ບໍລິການມີຄວາມເຊື່ອໝັ້ນ ແລະ ມີຄວາມເພິ່ງພໍໃຈນຳໃຊ້ບໍລິການຂອງພວກເຮົານັບມື້ນັບຫຼາຍຂຶ້ນເລື້ອຍໆ.