ຄະນະຮັບຜິດຊອບ ການຄົ້ນຄວ້າແນວຄິດ ໄກສອນ ພົມວິຫານ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ສະຫຼຸບວຽກງານ 6 ເດືອນ ຕົ້ນປີ ແລະ ວາງທິດທາງແຜນການ 6 ເດືອນ ທ້າຍປີ 2020 ໃນວັນທີ 4 ມິຖຸນາ ຜ່ານມາ, ເປັນປະທານໂດຍ ທ່ານ ປອ ຄໍາພັນ ພົມມະທັດ ຫົວໜ້າຄະນະອົບຮົມສູນກາງພັກ ທັງເປັນ ຫົວໜ້າຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ ແລະ ມີຄະນະຮັບຜິດຊອບແຕ່ລະຂົງເຂດ ເຂົ້າຮ່ວມ.
ທ່ານ ປອ ດາວສະຫວັນ ເຄືອມີໄຊ ຮັກສາການ ຫົວໜ້າສູນຄົ້ນຄວ້າແນວຄິດ ໄກສອນ ພົມວິຫານ ທັງເປັນ ຫົວໜ້າຄະນະຮັບຜິດຊອບ ການຄົ້ນຄວ້າແນວຄິດ ໄກສອນ ພົມວິຫານ ກ່າວວ່າ: ຄະນະຮັບຜິດຊອບ ໄດ້ຊີ້ນໍາ, ຊຸກຍູ້ການຄົ້ນຄວ້າ ໃນຫົວຂໍ້ວິທະຍາສາດທີ່ຮັບຮອງໃນ 5 ຂົງເຂດ ດັ່ງນີ້:
- ແນວຄິດ ໄກສອນ ພົມວິຫານ ຂົງເຂດວຽກງານພັກ, ພະນັກງານ, ແນວໂຮມ ແລະ ອົງການຈັດຕັ້ງມະຫາຊົນ ປະກອບມີ 7 ຫົວຂໍ້ຍ່ອຍ, ປັດຈຸບັນແມ່ນ ຂຽນສໍາເລັດແລ້ວ 100%
- ແນວຄິດ ໄກສອນ ພົມວິຫານ ຕໍ່ກັບການປ່ຽນແປງໃໝ່ທາງດ້ານເສດຖະກິດ ມີ 8 ຫົວຂໍ້ຍ່ອຍ, ຂຽນສໍາເລັດແລ້ວ 100%
- ແນວຄິດ ໄກສອນ ພົມວິຫານ ຕໍ່ກັບຂົງເຂດວຽກງານວັດທະນະທໍາ-ສັງຄົມ
- ແນວຄິດ ໄກສອນ ພົມວິຫານ ຕໍ່ກັບຂົງເຂດອໍານາດລັດ
- ແນວຄິດ ໄກສອນ ພົມວິຫານ ຕໍ່ກັບຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ຂົງເຂດວຽກງານການຕ່າງປະເທດ
ສໍາເລັດການຈັດແບ່ງຄວາມຮັບຜິດຊອບ ໃນການຄົ້ນຄວ້າຫົວຂໍ້: ຄຸນສົມບັດສິນທໍາປະຕິວັດອັນສູງສົ່ງຂອງ ປະທານ ໄກສອນ ພົມວິຫານ ໂດຍມີ 7 ຫົວຂໍ້ຍ່ອຍ ແລະ ໄດ້ແບ່ງໃຫ້ 7 ພາກສ່ວນຮັບຜິດຊອບ, ສໍາເລັດການຄົ້ນຄວ້າຮັບຮອງຫົວຂໍ້ຄົ້ນຄວ້າ ຫຼັງປີ 2020 ເຊິ່ງປະກອບມີ 8 ຫົວຂໍ້ວິທະຍາສາດ ໃນນັ້ນມີຫົວຂໍ້ລົງເລິກ 5 ຫົວຂໍ້:
ຫົວຂໍ້ກ່ຽວກັບ ຊີວິດ ແລະ ພາລະກິດ ປະທານ ໄກສອນ ພົມວິຫານ ຈໍານວນ 3 ຫົວຂໍ້, ຄົ້ນຄວ້າຮັບຮອງເອົາໂຄງຮ່າງບົດນິພົນຄົບຊຸດ, ຄາດຄະເນຈະສ້າງນິພົນຄົບຊຸດ ໄກສອນ ພົມວິຫານ ຈໍານວນ 13 ເຫຼັ້ມ, ການເກັບກໍາເອກະສານທີ່ເປັນບົດຂຽນ, ບົດໂອ້ລົມ, ບົດປາໄສຂອງ ປະທານ ໄກສອນ ພົມວິຫານ ໄດ້ຈໍານວນ 500 ກວ່າລາຍການ, ລວມມີ 14.096 ໜ້າ, ເກັບກໍາປື້ມຂຽນທີ່ພົວພັນເຖິງ ປະທານ ໄກສອນ ພົມວິຫານ ໄດ້ຈໍານວນໜຶ່ງ.
ທິດທາງໃນ 6 ເດືອນຕໍ່ໜ້າ, ຄະນະຮັບຜິດຊອບ ຈະສຸມໃສ່ບາງບັນຫາດັ່ງນີ້: ກະກຽມຈັດສໍາມະນາວິທະຍາສາດ ລະດັບຊາດ ຈໍານວນ 6 ກອງປະຊຸມ, ສໍາມະນາໃນ 6 ຫົວຂໍ້ ທີ່ຖືກຮັບຮອງ ເພື່ອປະກອບສ່ວນສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 45 ປີ, ວັນເກີດປະທານ ໄກສອນ ພົມວິຫານ ຄົບຮອບ 100 ປີ.
ນອກຈາກນັ້ນ, ຍັງຈະໄດ້ຄົ້ນຄວ້າແບ່ງຄວາມຮັບຜິດຊອບ ໃນການຄົ້ນຄວ້າຫົວຂໍ້ລົງເລິກ ແລະ ຫົວຂໍ້: ຊີວິດ ແລະ ພາລະກິດປະຕິວັດຂອງ ປະທານ ໄກສອນ ພົມວິຫານ, ສືບຕໍ່ລົງເລິກເກັບກໍາຂໍ້ມູນ, ເອກະສານທີ່ພົວພັນກັບ ປະທານ ໄກສອນ ພົມວິຫານ ຢູ່ບັນດາກະຊວງ, ອົງການ ແລະ ທ້ອງຖິ່ນ ພ້ອມທັງກະກຽມຈັດພິມສະບັບຮ່າງນິພົນຄົບຊຸດ, ກະກຽມພິມຈໍາໜ່າຍຜະລິດຕະພັນຈໍານວນໜຶ່ງ ເພື່ອສະເຫຼີມສະຫຼອງ ວັນເກີດປະທານ ໄກສອນ ພົມວິຫານ ຄົບຮອບ 100 ປີ.
