ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ພົທ ຈໍ ສະເວ ລັດຖະມົນຕີກະຊວງພາຍໃນ ແຫ່ງ ສສ ມຽນມາ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມຮ່ວມມືສອງຝ່າຍ ຄັ້ງທີ 7 ວ່າດ້ວຍການຮ່ວມ ມືວຽກງານປ້ອງກັນຄວາມສະຫງົບ ລະຫວ່າງ ກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງພາຍໃນ ສສ ມຽນມາ ລະຫວ່າງວັນທີ 18-22 ມີນາ 2018 ໂດຍມີ ພົຕ ສົມແກ້ວ ສີລາວົງ ລັດຖະມົນຕີກະຊວງ ປກສ ລາວ ນຳພາເຂົ້າຢ້ຽມຂໍ່ານັບ.
ທ່ານລັດຖະມົນຕີກະຊວງພາຍໃນ ສສ ມຽນມາ ກ່າວສະແດງຄວາມດີໃຈເປັນຢ່າງຍິ່ງທີ່ທ່ານປະທານສະພາແຫ່ງຊາດ ສປປ ລາວ ໄດ້ໃຫ້ກຽດຕ້ອນຮັບຢ່າງອົບອຸ່ນ ພ້ອມທັງລາຍງານວຽກງານຮ່ວມກັບ ກະຊວງ ປກສ ລາວ ເປັນຕົ້ນແມ່ນວຽກງານການຮ່ວມມືດ້ານການຮັກສາຄວາມສະຫງົບ ແລະ ສະຖຽນລະພາບຂອງສອງປະເທດ, ການຮ່ວມມືແລກປ່ຽນຂໍ້ມູນຂ່າວສານ, ການສົ່ງເສີມກົນໄກຂອງຫ້ອງການປະສານງານຊາຍແດນ, ຮ່ວມມືສະກັດກັ້ນ ແລະ ຕ້ານຢາເສບຕິດ, ການຄ້າມະນຸດ, ການຮ່ວມມືສະກັດກັ້ນອາຊະຍາກຳຂ້າມຊາຍແດນ, ການຄວບຄຸມຄົນເຂົ້າ-ອອກເມືອງຜິດກົດໝາຍ ແລະ ທາງດ້ານອື່ນໆ ແມ່ນຈະເຮັດໃຫ້ເປັນໄປຕາມແຜນການທີ່ໄດ້ຮ່ວມກັນລົງນາມບົດບັນທຶກຮ່ວມມືສອງຝ່າຍກໍຄື ກະຊວງ ປກສ ລາວ ແລະ ກະຊວງພາຍໃນ ສສ ມຽນມາ ໃຫ້ມີຄວາມສະຫງົບ ແລະ ເປັນລະບຽບຮຽບຮ້ອຍ ທັງຮັບປະກັນໃຫ້ ປະຊາຊົນສອງປະເທດລາວ-ມຽນມາ ມີຄວາມສະດວກໃນການໄປມາຄ້າ-ຂາຍຮ່ວມກັນຢ່າງມີປະສິດທິພາບກວ່າເກົ່າ.
ໂອກາດດຽວກັນ, ທ່ານປະທານສະພາແຫ່ງຊາດ ສປປ ລາວ ໄດ້ສະແດງຄວາມຊົມເຊີຍຕໍ່ຜົນສຳເລັດກອງປະຊຸມການຮ່ວມມືສອງຝ່າຍ ຄັ້ງທີ 7 ພ້ອມທັງຕີລາຄາສູງຕໍ່ໝາກຜົນຂອງການຮ່ວມມື ແລະ ກົນໄກການຮ່ວມມືທີ ໄດ້ຈັດຕັ້ງປະຕິບັດຜ່ານມາ, ເພື່ອສະກັດກັ້ນ ແລະ ຕ້ານອາຊະຍາກຳຕ່າງໆທີ່ເກີດຂຶ້ນລຽບຕາມຊາຍແດນຂອງສອງປະເທດ. ນອກນັ້ນ, ກໍເປັນການເສີມຂະຫຍາຍ ແລະ ຮັດແໜ້ນສາຍພົວພັນຮ່ວມມືມິດຕະພາບ ແລະ ການຮ່ວມມືລະຫວ່າງສອງປະເທດ, ປະຊາຊົນສອງຊາດລາວ-ມຽນມາ ເວົ້າລວມ, ເວົ້າສະເພາະ ກະຊວງປ້ອງກັນຄວາມສະຫງົບ ລາວ ແລະ ກະຊວງພາຍໃນ ສສ ມຽນມາ ໃຫ້ໝັ້ນຄົງທະນົງແກ່ນໄປເລື້ອຍໆ.
