ກົມພົວພັນຕ່າງປະເທດ ຫ້ອງວ່າການ ກະຊວງ ປກສ ໄດ້ເປີດຊຸດຝຶກອົບຮົມວຽກງານພົວພັນຕ່າງປະເທດ ຄັ້ງທີ VI ໃຫ້ແກ່ກໍາລັງປ້ອງກັນຄວາມສະຫງົບ ໃນລະຫວ່າງວັນທີ 22-25 ມີນາ 2022, ໂດຍມີ ພັອ ອານຸເດດ ຄູນຄໍາ ຮອງຫົວໜ້າຫ້ອງວ່າການ ກະຊວງ ປກສ ພ້ອມດ້ວຍ ພັອ ກີ້ ຈັນທະວົງສາ ຫົວໜ້າກົມພົວພັນຕ່າງປະເທດ, ມີຕາງໜ້າກົມກໍ່ສ້າງກໍາລັງ ກົມໃຫຍ່ການເມືອງ, ແຂກຮັບເຊີນ, ວິທະຍາກອນ ແລະ ນັກສໍາມະນາກອນ ຈາກ ປກສ ແຂວງ ທົ່ວປະເທດ ເຂົ້າຮ່ວມ.
+ ພັອ ກີ້ ຈັນທະວົງສາ ກ່າວວ່າ:
ການເປີດຊຸດຝຶກອົບຮົມຄັ້ງນີ້ ເພື່ອເປັນການຍົກລະດັບຄວາມຮູ້ຂອງນາຍຕໍາຫຼວດ ໃຫ້ທັນກັບສະພາບການໃນປັດຈຸບັນ ເຊິ່ງຊຸດຝຶກອົບຮົມຄັ້ງນີ້ ມີນັກສໍາມະນາກອນທັງໝົດ 33 ສະຫາຍ ຍິງ 8 ສະຫາຍ ທີ່ມາຈາກ ປກສ ແຂວງ ທົ່ວປະເທດ; ໃນນີ້, ນັກສໍາມະນາກອນ ຈະໄດ້ຮຽນຮູ້ກ່ຽວກັບວຽກງານພິທີການ ແລະ ປະສານງານ, ວຽກງານພິທີການທູດ, ວຽກງານຮ່ວມມືສອງຝ່າຍ. ນອກນີ້, ຍັງຈະໄດ້ສົນທະນາແລກປ່ຽນບົດຮຽນກ່ຽວກັບ ການຈັດຕັ້ງປະຕິບັດຕົວຈິງ ໃນໄລຍະຜ່ານມາ.
ໃນພິທີ, ພັອ ອານຸເດດ ຄູນຄໍາ ໄດ້ສະເໜີໃຫ້ນັກວິທະຍາກອນ ເອົາໃຈໃສ່ກະກຽມບົດຮຽນທີ່ຈະນໍາມາສິດສອນໃຫ້ດີ ໂດຍເລືອກເຟັ້ນເອົາບົດຮຽນສໍາຄັນ ແລະ ຈໍາເປັນສໍາລັບວຽກງານປ້ອງກັນຄວາມສະຫງົບ, ສະເໜີຖ່າຍທອດຄວາມຮູ້ໃຫ້ນັກສໍາມະນາກອນຢ່າງທົ່ວເຖິງ, ໃຫ້ໂອກາດນັກສໍາມະນາກອນໄດ້ປະກອບສ່ວນເຂົ້າໃນການຮຽນ-ການສອນ ເພື່ອຮັບປະກັນບັນຍາກາດອັນດີໃນການຝຶກອົບຮົມ; ພ້ອມນີ້ ກໍໃຫ້ນັກສໍາມະນາກອນຖືເອົາໂອກາດນີ້ຍາດແຍ່ງເອົາຄວາມຮູ້, ບົດຮຽນ ແລະ ປະສົບການຈາກວິທະຍາກອນ ແລະ ນັກສໍາມະນາກອນດ້ວຍກັນ ແລະ ການເຮັດວຽກຮ່ວມກັນໃນຕໍ່ໜ້າ.
