ປັດຈຸບັນ, ແຂວງຫຼວງນໍ້າທາ ສາມາດເກັບກໍາຂໍ້ມູນບັນດາເປົ້າໝາຍ ທີ່ມີການພົວພັນກັບຢາເສບຕິດດ້ວຍຮູບການ ແລະ ໄດ້ສ້າງບົດບັນທຶກນໍາສ່ວນບຸກຄົນໃນແຕ່ລະຄອບຄົວ ແລະ ຂັ້ນບ້ານ ສໍາເລັດ 333 ບ້ານ ກວມເອົາ 94,60%, ສ່ວນບັນດາສໍານັກງານ-ອົງການຂອງລັດ ອ້ອມຂ້າງແຂວງ-ເມືອງ ສໍາເລັດ 204 ພາກສ່ວນ ກວມເອົາ 94,44% ເພື່ອຈັດຕັ້ງປະຕິບັດ ວາລະແຫ່ງຊາດ ແກ້ໄຂບັນຫາຢາເສບຕິດ ໃຫ້ບັນລຸຕາມຄາດໝາຍທີ່ວາງໄວ້.
ທ່ານ ຄໍາໄຫຼ ສີປະເສີດ ເຈົ້າແຂວງຫຼວງນໍ້າທາ ປະທານປ້ອງກັນຊາດ-ປ້ອງກັນຄວາມສະຫງົບ ຫົວໜ້າຄະນະຊີ້ນໍາການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດຂັ້ນແຂວງ ໃຫ້ສຳພາດຕໍ່ສື່ມວນຊົນ ປກສ ເມື່ອບໍ່ດົນມານີ້ ວ່າ:
ຕະຫຼອດໄລຍະຜ່ານມາ, ແຂວງຫຼວງນໍ້າທາ ໄດ້ເອົາໃຈໃສ່ຈັດຕັ້ງປະຕິບັດ ວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ຢ່າງເປັນຂະບວນກວ້າງຂວາງ ເປັນຕົ້ນແມ່ນໄດ້ລົງກັບກໍາຂໍ້ມູນນໍາບັນດາເປົ້າໝາຍທີ່ພົວພັນຢາເສບຕິດ ໂດຍແນໃສ່ສ້າງບົດບັນທຶກນໍາສ່ວນບຸກຄົນ, ຄອບຄົວ, ບ້ານ, ສໍານັກງານ-ອົງການຕ່າງໆຂອງລັດ ຄື:
ທົ່ວແຂວງມີ 353 ບ້ານ, 39.273 ຄົວເຮືອນ, 40.372 ຄອບຄົວ, ມີພົນລະເມືອງທັງໝົດ 202.380 ຄົນ; ເຊິ່ງມາຮອດປັດຈຸບັນ ໄດ້ສ້າງບົດບັນທຶກນໍາຂັ້ນບ້ານສໍາເລັດ 333 ບ້ານ ກວມ 94,60% ຂອງຈຳນວນບ້ານທັງໝົດ, ມີ 36.237 ຄອບຄົວ.
ພ້ອມນັ້ນ, ຍັງສາມາດສ້າງບົດບັນທຶກນຳພະແນກການ, ກົມກອງ, ທະຫານ, ຕຳຫຼວດ, ຂົງເຂດການສຶກສາ ແລະ ບັນດາລັດວິສາຫະກິດ ອ້ອມຂ້າງແຂວງ-ບັນດາເມືອງ ສຳເລັດແລ້ວ 204 ພາກສ່ວນ ກວມ 94,44%, ມີພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາກຸ່ມເປົ້າໝາຍ ເຂົ້າຮ່ວມທັງໝົດ 7.175 ຄົນ ຍິງ 1.965 ຄົນ ແລະ ສ້າງບົດບັນທຶກນໍາຄົນຕ່າງປະເທດ ທີ່ດໍາລົງຊີວິດໃນແຂວງ ໄດ້ 51 ຄົນ ຍິງ 20 ຄົນ.
ຄຽງຄູ່ກັນນັ້ນ, ຍັງໄດ້ສຸມໃສ່ສ້າງຄວາມຮັບຮູ້ໃນທົ່ວສັງຄົມ ໂດຍສະເພາະແມ່ນການເຜີຍແຜ່ເຊື່ອມຊຶມ ແລະ ຜັນຂະຫຍາຍວາລະດັ່ງກ່າວ ນັບທັງບັນດານິຕິກໍາຕ່າງໆທີ່ກ່ຽວຂ້ອງ ຜ່ານສື່ມວນຊົນຂອງແຂວງ, ຂອງເມືອງ ແລະ ວິທະຍຸໂທລະໂຄ່ງຂອງແຕ່ລະບ້ານ ຢ່າງເປັນປົກກະຕິຕໍ່ເນື່ອງ. ນອກນັ້ນ, ຍັງໄດ້ປະສານສົມທົບກັບພາກສ່ວນທີ່ກ່ຽວຂ້ອງຂອງ ກະຊວງ ປກສ ໃນການຕິດປ້າຍຄໍາຂວັນ ເພື່ອໂຄສະນາ ແລະ ປຸກລະດົມໃຫ້ພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າພາຍໃນແຂວງ ໄດ້ຮັບຮູ້-ເຂົ້າໃຈຕໍ່ຜົນຮ້າຍໄພອັນຕະລາຍຂອງຢາເສບຕິດ ເພື່ອພ້ອມກັນສະກັດກັ້ນ ແລະ ຕ້ານບັນຫາດັ່ງກ່າວໃຫ້ນັບມື້ຫຼຸດລົງເລື້ອຍໆ.
advertisement
Get $500 FREE Google Ads Credits 25%
DISCOUNT ON ANY PACKAGE, FOREVER! USE: BLACKFRIDAY25 TODAY!
