ກອງບັນຊາການ ປກສ ເມືອງບຸນໃຕ້ ແຂວງຜົ້ງສາລີ ໄດ້ສະຫຼຸບຖອດຖອນບົດຮຽນປະເມີນຜົນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄລຍະທີ 2 ໃນທ້າຍອາທິດຜ່ານມາ, ມີ ພັອ ຄຳຈັນ ແສງລາວົງ ຫົວໜ້າກອງບັນຊາການ ປກສ ແຂວງຜົ້ງສາລີ ແລະ ທ່ານ ຄໍາຫຼ້າ ດວງມະໄລ ຮອງເຈົ້າເມືອງບຸນໃຕ້, ມີຄະນະພັກ-ຄະນະບັນຊາ ປກສ ເມືອງ ແລະ ພາກສ່ວນກ່ຽວຂ້ອງ ຕະຫຼອດຮອດພະນັກງານທີ່ກ່ຽວຂ້ອງ ເຂົ້າຮ່ວມ.
![](https://www.lsecuritynews.com/wp-content/uploads/2022/12/5-2.jpg)
ພັທ ອຸດອນ ສຸວົງໄຊ ຫົວໜ້າກອງບັນຊາການ ປກສ ເມືອງບຸນໃຕ້ ໄດ້ຜ່ານບົດສະຫຼຸບການຈັດຕັ້ງປະຕິບັດວາລະແຫ່ງຊາດ ແກ້ໄຂບັນຫາຢາເສບຕິດໄລຍະທີ 2 ປະຈຳເດືອນຕຸລາ-ພະຈິກ ປີ 2022 ແລະ ທິດທາງແຜນການ ປະຈຳເດືອນທັນວາ ປີ 2022 ວ່າ: ຜ່ານການລົງເຄື່ອນໄຫວເຜີຍແຜ່ບັນດາເອກະສານກ່ຽວຂ້ອງກັບວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນ 7 ກຸ່ມ, ມີ 64 ບ້ານ, ລົງສ້າງສັນຍາ 4 ໃບ ໃນ 7 ກຸ່ມບ້ານ ເປົ້າ ໝາຍຄ້າ-ຂາຍເສບຕິດ ປະເພດຢາບ້າ 78 ເປົ້າໝາຍ, ຢາຝິ່ນ 10 ເປົ້າໝາຍ ແລະ ເປົ້າໝາຍຂີ້ລັກ-ງັດແງະໄດ້ 7 ເປົ້າໝາຍ. ໃນນີ້, ສາມາດມ້າງຄະດີຢາເສບຕິດໄດ້ 7 ເລື່ອງ, ຢຶດຂອງກາງໄດ້ ຈໍານວນ 1.700 ເມັດ ພ້ອມລົດຈັກ 6 ຄັນ, ສ້າງບົດບັນທຶກຢຸດເຊົາການພົວພັນສິ່ງເສບຕິດປະເພດຕ່າງໆໄດ້ 795 ຄົນ. ໃນນີ້, ຜູ້ຕິດຢາບ້າ ຈໍານວນ 684 ຄົນ ຍິງ 12 ຄົນ ຜູ້ຕິດຝິ່ນ 424 ຄົນ ຍິງ 21 ຄົນ ແລະ ເອົາໄປບໍາບັດປິ່ນປົວ 26 ຄົນ, ສາມາດທ້ອນໂຮມອາວຸດລ່າເນື້ອປະເພດ ປືນແກັບ ໄດ້ 263 ກະບອກ.
![](https://www.lsecuritynews.com/wp-content/uploads/2022/12/4-4.jpg)
ພັອ ຄຳຈັນ ແສງລາວົງ ສະແດງ ຄວາມຍ້ອງຍໍຊົມເຊີຍຕໍ່ກອງບັນຊາການ ປກສ ເມືອງບຸນໃຕ້ ທີ່ເອົາໃຈໃສ່ຈັດຕັ້ງ ເຄື່ອນໄຫວຈົນສາມາດຍາດໄດ້ຜົນງານ ໃນຫຼາຍດ້ານ ພ້ອມທັງຮຽກຮ້ອງມາຍັງແຕ່ລະພາກສ່ວນ ໃຫ້ສືບຕໍ່ເຊື່ອມຊຶມ ກຳແໜ້ນແນວທາງນະໂຍບາຍຂອງພັກ-ລະບຽບກົດໝາຍຂອງລັດ ເປັນຕົ້ນແມ່ນບັນດານິຕິກຳຂອງສູນກາງ, ຂອງກະຊວງ ແລະ ຂອງແຂວງກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ໜັກແໜ້ນ ແລະ ເລິກເຊິ່ງ, ກຳແໜ້ນພາລະບົດບາດ, ສິດ-ໜ້າທີ່ຂອງຕົນ, ເປັນເຈົ້າການປະສານສົມທົບໃນການແກ້ໄຂບັນຫາຢາເສບຕິດດ້ວຍຄວາມຮັບຜິດຊອບສູງ, ພ້ອມທັງປະຕິບັດຕາມ 4 ເນື້ອໃນ 4 ຄາດໝາຍຢ່າງເຂັ້ມງວດ ເພື່ອເປັນບ່ອນອີງໃນການຈັດຕັ້ງປະຕິບັດຢ່າງຖືກຕ້ອງ ແລະ ສອດຄ່ອງກັບສະພາບຄວາມເປັນຈິງ ເພື່ອຮັບປະກັນຜົນສຳເລັດ ແລະ ຄວາມສະຫງົບປອດໄພ.