ໃນວັນທີ 5 ກໍລະກົດ 2023, ທ່ານ ນາງ ປານີ ຢ່າທໍ່ຕູ້ ກຳມະການກົມການເມືອງສູນກາງພັກ ຮອງປະທານປະເທດ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ດ່ານສາກົນສິນຄ້າ ທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫຼວງວຽງຈັນ; ເຊິ່ງໃຫ້ກຽດຕ້ອນຮັບໂດຍ ທ່ານ ອາລຸນແກ້ວ ກິດຕິຄຸນ ປະທານກໍາມະການບໍລິຫານຍຸດທະສາດ ແລະ ການວາງແຜນ ບໍລິສັດ ພີທີແອວໂຮນດິ້ງ ຈໍາກັດ ພ້ອມຄະນະ.
![](https://www.lsecuritynews.com/wp-content/uploads/2023/07/DSC_5009-1024x653.jpg)
ໂອກາດດັ່ງກ່າວນີ້, ທ່ານ ນາງ ປານີ ຢ່າທໍ່ຕູ້ ພ້ອມດ້ວຍຄະນະ ກໍໄດ້ລົງຢ້ຽມຢາມຈຸດເຊື່ອມຕໍ່ຂົວມິດຕະພາບ ລາວ-ໄທ ແຫ່ງທີ 1, ຢ້ຽມຢາມຈຸດຄ່ຽນຖ່າຍສິນຄ້າລະຫວ່າງ ລາງມາດຕະຖານ ແລະ ລາງໜຶ່ງແມັດ; ຫຼັງຈາກນັ້ນ, ທ່ານ ອາລຸນແກ້ວ ກິດຕິຄຸນ ກໍໄດ້ກ່າວຕ້ອນຮັບ ທ່ານ ນາງ ປານີ ຢ່າທໍ່ຕູ້ ພ້ອມຄະນະ ທີ່ໄດ້ລົງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ດ່ານສາກົນສິນຄ້າ ທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫຼວງວຽງຈັນ ໃນຄັ້ງນີ້ ເຊິ່ງໄດ້ສະແດງເຖິງ ຄວາມເອົາໃຈໃສ່ຂອງການນໍາພັກ-ລັດ ຕໍ່ກັບຜູ້ປະກອບການທາງດ້ານການຂົນສົ່ງທາງບົກ ເພື່ອປຶກສາຫາລືບັນຫາຕ່າງໆໃນຂອດການບໍລິການທີ່ຍັງພົບຄວາມຫຍຸ້ງຍາກ ເພື່ອພ້ອມກັນແກ້ໄຂບັນຫາດັ່ງກ່າວໃຫ້ດີຂຶ້ນ ແລະ ຮັບປະກັນໃຫ້ການບໍລິການມີຄວາມສະດວກວ່ອງໄວຂຶ້ນ.
![](https://www.lsecuritynews.com/wp-content/uploads/2023/07/DSC_4989-1024x628.jpg)
ຈາກນັ້ນ, ທ່ານ ສາຄອນ ພິລາງາມ ຜູ້ອໍານວຍການໃຫຍ່ ບໍລິສັດ ທ່າບົກທ່ານາແລ້ງ ຈໍາກັດ ຜູ້ດຽວ ໄດ້ລາຍງານຫຍໍ້ກ່ຽວກັບ ໂຄງການພັດທະນາ ທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫຼວງວຽງຈັນ ວ່າ:
ໂຄງການພັດທະນາ ທ່າບົກທ່ານາແລ້ງ ສ້າງຂຶ້ນເພື່ອຜັນຂະຫຍາຍນະໂຍບາຍຂອງລັດຖະບານ ແຫ່ງ ສປປ ລາວ ໃນການຫັນປ່ຽນປະເທດລາວຈາກ Land Lock ສູ່ປະເທດ Land Link ໃຫ້ເປັນສູນກາງແຫ່ງການເຊື່ອມໂຍງເຊື່ອມຈອດອະນຸພາກພື້ນ ແລະ ສາກົນ, ເຊິ່ງຈຸດທີ່ຕັ້ງຂອງໂຄງການ ຈະເຮັດໜ້າທີ່ເປັນສູນກາງຂອງການຂະຫຍາຍການຄ້າ ລະຫວ່າງ ອາຊຽນ ໄປ ສປ ຈີນ ແລະ ສປ ຈີນ ໄປສູ່ເອີຣົບ, ໂດຍນໍາໃຊ້ໂຄງການເສັ້ນທາງລົດໄຟ ລາວ-ຈີນ.
![](https://www.lsecuritynews.com/wp-content/uploads/2023/07/DSC_4987-1024x537.jpg)
ການພັດທະນາໂຄງການດ່ານສາກົນສິນຄ້າ ທ່າບົກທ່ານາແລ້ງ ມີຄວາມສໍາຄັນຫຼາຍ ເນື່ອງຈາກວ່າໂຄງການດັ່ງກ່າວ ເປັນຍຸດທະສາດໜຶ່ງຂອງໂຄງການພັດທະນາ Laos Logistics Link ເຊິ່ງເປັນຈຸດເຊື່ອມຕໍ່ຫຼັກຂອງບັນດາການຂົນສົ່ງຫຼາຍຮູບແບບ, ທາງລົດ, ທາງລາງ, ທາງເຮືອ ແລະ ເຊື່ອມໂຍງບັນດາຈຸດພັດທະນາຕ່າງໆ ໃນພາກພື້ນສູ່ສາກົນ ໂດຍມີເປົ້າໝາຍຫຼັກເພື່ອຫຼຸດຕົ້ນທຶນໂລຊິດສະຕິກຂອງປະເທດລາວ.
![](https://www.lsecuritynews.com/wp-content/uploads/2023/07/DSC_4991-1024x571.jpg)
ນອກຈາກນີ້, ທ່າບົກທ່ານາແລ້ງ ຍັງເປັນ 1 ໃນ 5 ອົງປະກອບຂອງໂຄງການວຽງຈັນໂລຊິດສະຕິກພາກ, ມີສະຖານີຂົນສົ່ງລະຫວ່າງປະເທດ ຕັ້ງຢູ່ຊາຍແດນຫ່າງຈາກຂົວມິດຕະພາບ ລາວ-ໄທ 800 ແມັດ ປະກອບມີ: ສູນໂລຊິດສະຕິກ, ສູນການຜະລິດເພື່ອສົ່ງອອກ, ສູນປະຕິບັດຮັກສາທາດແຫຼວ, ເຂດການຄ້າ, ເຂດປອດພາສີ ແລະ ສູນກາງການເງິນ; ຈຸດພິເສດຂອງເຂດດັ່ງກ່າວ ແມ່ນຕັ້ງຢູ່ເສັ້ນທາງເຊື່ອມຕໍ່ທີ່ສາມາດຂົນສົ່ງສູງ ເນື່ອງຈາກວ່າຕັ້ງຢູ່ເສັ້ນທາງລົດໄຟ ລາວ-ໄທ ແລະ ເສັ້ນທາງລົດໄຟ ລາວ-ຈີນ, ເປັນຈຸດເຊື່ອມການຂົນສົ່ງທາງລົດໄຟ ໄປຍັງປະເທດອ້ອມຂ້າງ ເຊັ່ນ: ມຽນມາ, ໄທ, ກຳປູເຈຍ, ຫວຽດນາມ ແລະ ມາເລເຊຍ.
![](https://www.lsecuritynews.com/wp-content/uploads/2023/07/DSC_4970-1024x610.jpg)
ຕໍ່ກັບຜົນງານ ແລະ ຜົນສໍາເລັດ ໃນການຈັດຕັ້ງປະຕິບັດວຽກງານໃນໄລະຍະຜ່ານມາ ຂອງດ່ານສາກົນສິນຄ້າ ທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫຼວງວຽງຈັນ, ທ່ານ ນາງ ປານີ ຢ່າທໍ່ຕູ້ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຄວາມພະຍາຍາມຂອງບັນດາຜູ້ປະກອບການ ທີ່ໄດ້ປະຕິບັດຄໍາສັ່ງຕາມການມອບໝາຍຂອງລັດຖະບານ ທີ່ມີສ່ວນຮ່ວມໃນການພັດທະນາທ່າບົກຂອງປະເທດ, ເຊິ່ງປັດຈຸບັນການພັດທະນາໂດຍພື້ນຖານ ແມ່ນສໍາເລັດແລ້ວ ແລະ ໃນອະນາຄົດ ທ່າບົກທ່ານາແລ້ງ ຈະເປັນລັກສະນະກວມລວມທາງດ້ານເຂດອຸດສາຫະກໍາ, ເຂດທ່າບົກ, ຂົນສົ່ງໂລຊິດສະຕິກ, ຂົນສົ່ງສິນຄ້າຜ່ານແດນຕ່າງໆ ທັງມີການບໍລິການອື່ນໆ ໄປພ້ອມ.
![](https://www.lsecuritynews.com/wp-content/uploads/2023/07/DSC_4982-1024x566.jpg)
ທັງນີ້, ຫວັງວ່າຜູ້ປະກອບການ ຈະພັດທະນາເຂດດັ່ງກ່າວ ໃຫ້ກາຍເປັນເຂດທ່າບົກ ຕິດພັນກັບ ອຸດສາຫະກໍາບໍລິການແບບທັນສະໄໝ ໂດຍຕ້ອງໄດ້ມີການປັບປຸງບັນດາອົງການລັດທີ່ຢູ່ດ່ານສາກົນແຫ່ງນີ້ ເພື່ອແກ້ໄຂບັນຫາການບໍລິການຂົນສົ່ງ ແລະ ສະເໜີໃຫ້ທ່າບົກ ເຊື່ອມກັບທາງລົດໄຟ ເພື່ອຂະຫຍາຍທ່າແຮງຂອງທ່າບົກ ທີ່ເປັນດ່ານຂາເຂົ້າ-ຂາອອກສິນຄ້າ ເຮັດໃຫ້ການບໍລິການຄ່ອງຕົວ, ຊ່ວຍໜູນເຊິ່ງກັນແລະກັນ ເຮັດໃຫ້ສິນຄ້າເພີ່ມບໍລິ ມາດຂົນສົ່ງຜ່ານທ່າບົກ ແລະ ທາງລົດໄຟ.
![](https://www.lsecuritynews.com/wp-content/uploads/2023/07/DSC_4957-1024x572.jpg)