ກອງປະຊຸມສະຫຼຸບວຽກງານວິຊາສະເພາະ ປະຈໍາ 6 ເດືອນຕົ້ນປີ ແລະ ວາງທິດທາງແຜນການປະຈໍາ 6 ເດືອນ ທ້າຍປີ 2023 ຂອງກອງບັນຊາການ ປກສ ເມືອງຂວາ ແຂວງຜົ້ງສາລີ ໄດ້ໃຫ້ຮູ້ວ່າ: 6 ເດືອນຜ່ານມາ, ເຈົ້າໜ້າທີ່ ປກສ ເມືອງຂວາ ຍາດໄດ້ຜົນງານຫຼາຍດ້ານ ແລະ ກຽມພ້ອມປະຕິບັດໜ້າທີ່ຕະຫຼອດມາ.
ກອງປະຊຸມດັ່ງກ່າວຈັດຂຶ້ນໃນວັນທີ 17 ກໍລະກົດ 2023, ເປັນປະທານໂດຍ ພັທ ຊຽງພອນ ໄຊທະລາ ຫົວໜ້າກອງບັນຊາການ ປກສ ເມືອງຂວາ, ມີ ພົຈວ ຄຳຈັນ ແສງລະວົງ ຫົວໜ້າກອງບັນຊາການ ປກສ ແຂວງຜົ້ງສາລີ, ມີ ທ່ານ ຄຳໄລ ສຸທິພອນ ຮອງເລຂາພັກເມືອງຮອງ ປະທານປ້ອງກັນຊາດ-ປ້ອງກັນຄວາມສະຫງົບ, ມີບັນດາຄະນະປະຈຳພັກເມືອງ, ກໍາມະການພັກເມືອງ ແລະ ພະນັກງານຫຼັກແຫຼ່ງ ເຂົ້າຮ່ວມ.
ພັທ ບຸນຊູ ໄຊສະຫວັນ ຮອງຫົວໜ້າກອງບັນຊາການ ປກສ ເມືອງຂວາ ກ່າວວ່າ: ຕະຫຼອດໄລຍະ 6 ເດືອນຜ່ານມາ, ໄດ້ຈັດຕັ້ງປະຕິບັດວຽກງານໂດຍມີການວາງແຜນການ, ແຜນງານອັນລະອຽດ; ເຊິ່ງສະແດງອອກໄດ້ເພີ່ມທະວີຂຶ້ນບັນຊີ, ຄຸ້ມຄອງເປົ້າໝາຍກຸ່ມຄົນທີ່ແອບແຝງຢູ່ພາຍໃນເມືອງ. ໃນນີ້, ສາມາດຂຶ້ນບັນຊີຕິດຕາມຄົນຕ່າງປະເທດທີ່ເຮັດທຸລະກິດ ມີຈໍານວນ 92 ຄົນ ຍິງ 30 ຄົນ, ກວດກາການຂຶ້ນທະບຽນ ແລະ ອອກບັດພັກເຊົາຊົ່ວຄາວຂອງຄົນຕ່າງປະເທດ ມີ 53 ຄົນ ຍິງ 16 ຄົນ ແລະ ປະຈໍາການກຽມພ້ອມສູ້ຮົບ ເພື່ອຮັບປະກັນຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງດ້ານສັງຄົມ.
ໃນນີ້, ມີຄະດີເກີດຂຶ້ນ 5 ເລື່ອງ, ມີ 12 ຄົນ, ຄະດີທຳມິດສະຈານ 1 ເລື່ອງ, ມີ 1 ຄົນ ຍິງ 1 ຄົນ, ຄະດີເຮັດໃຫ້ຜູ້ອື່ນເສຍຊີວິດດ້ວຍຄວາມບໍ່ລະມັດລະວັງ 1 ເລື່ອງ ມີ 4 ຄົນ, ຄະດີທຳຮ້າຍຮ່າງກາຍ 2 ເລື່ອງ ມີ 6 ຄົນ ຍິງ 1 ຄົນ, ສໍ້ໂກ້ງຊັບພົນ ລະເມືອງມີ 1 ເລື່ອງ 1 ຄົນ, ຄະດີຢາເສບຕິດ 7 ເລື່ອງ, ມີ 8 ຄົນ ຍິງ 1 ຄົນ ມີຂອງກາງຢາບ້າ 260 ເມັດ ແລະ ເຮໂຣອິນ 3 ກ້ອນນ້ອຍ.
ພົຈວ ຄຳຈັນ ແສງລະວົງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ-ຄະນະບັນຊາ ແລະ ພະນັກງານ-ນັກຮົບ ປກສ ເມືອງຂວາ ຍາດມາໄດ້ຕະຫຼອດໄລຍະທີ່ຜ່ານມາ, ພ້ອມທັງເນັ້ນໜັກຄະນະພັກ-ຄະນະບັນຊາ ເອົາໃຈໃສ່ປັບປຸງກໍາລັງໃຫ້ມີຄວາມໜັກແໜ້ນທາງດ້ານການເມືອງ, ເຂັ້ມແຂງທາງດ້ານການຈັດຕັ້ງ, ມີຄວາມຮູ້-ຄວາມສາມາດ ແລະ ມີຄວາມຊໍານິ-ຊໍານານທາງດ້ານວຽກງານວິຊາສະເພາະ, ຮັບປະກັນດ້ານວຽກງານພະລາທິການກັບທີ່ໃຫ້ແກ່ການເຄື່ອນໄຫວໜ້າທີ່ວິຊາສະເພາະ ແລະ ການລ້ຽງດູກໍາລັງ, ປະຕິບັດຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງ ດ້ວຍຕົນເອງ, ສາມັກຄີເປັນປຶກແຜ່ນ, ພ້ອມກັນຕ້ານ ແລະ ສະກັດກັ້ນພວກອິດທິກໍາລັງປໍລະປັກ ທີ່ຫວັງກໍ່ຄວາມບໍ່ສະຫງົບໃຫ້ນັບມື້ໝົດໄປຈາກສັງຄົມ ແລະ ພ້ອມກັນຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້.
