ກອງບັນຊາການ ປກສ ແຂວງຈຳປາສັກ ໄດ້ຈັດພິທີວາງສີລາລຶກໂຄງການກໍ່ສ້າງອາຄານບ່ອນເຮັດວຽກຂອງຫ້ອງຕຳຫຼວດ ປກສ ແຂວງຈຳປາສັກ ໃນທ້າຍເດືອນເມສາ 2018; ໂດຍມີ ພົຈວ ສີພັນ ວົງເຮືອງຄຳ ຫົວໜ້າກອງບັນຊາການ ປກສ ແຂວງຈຳປາສັກ, ພ້ອມດ້ວຍຄະນະພັກ-ຄະນະບັນຊາຈາກຫ້ອງຕຳຫຼວດ, ບັນດາພະແນກ ແລະ ພະນັກງານວິຊາສະເພາະທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ພົຈວ ສີພັນ ວົງເຮືອງຄຳ ກ່າວວ່າ: ໂຄງການກໍ່ສ້າງອາຄານບ່ອນເຮັດວຽກຫ້ອງຕຳຫຼວດ ກອງບັນຊາການ ປກສ ແຂວງຈຳປາສັກ ແມ່ນຕັ້ງຢູ່ບ້ານສະພານໄຊ ເມືອງປາກເຊ ແຂວງຈຳປາສັກ ເຊິ່ງມີຂະໜາດ 22×46,2 ແມັດ, ເປັນອາຄານ 2 ຊັ້ນ, ມູນຄ່າກໍ່ສ້າງທັງໝົດ 4.850.000.000 ກີບ ເຊິ່ງແມ່ນທຶນຂອງກອງບັນຊາການ ປກສ ແຂວງ ທັງໝົດ ແລະ ເປັນຜູ້ກໍ່ສ້າງເອງ; ຈຸດເດັ່ນຂອງອາຄານດັ່ງກ່າວ ແມ່ນອອກແບບເປັນຮູບຊົງເອກະລັກຂອງລາວ, ມີທັງໝົດ 26 ຫ້ອງ; ໃນນັ້ນ, ມີຫ້ອງປະຊຸມ 1 ຫ້ອງ, ຫ້ອງຮັບຮອງ 1 ຫ້ອງ, ຫ້ອງເຮັດວຽກ 18 ຫ້ອງ ແລະ ຫ້ອງນ້ຳລວມ 4 ຫ້ອງ.
