ພະນັກງານ-ນັກຮົບ ປກສ ແຂວງວຽງຈັນ ໄດ້ພ້ອມພຽງກັນເຂົ້າຮ່ວມຂະບວນການບໍລິຈາກເລືອດ ໃນວັນທີ 26 ກໍລະກົດ 2018 ເພື່ອເປັນການປະກອບສ່ວນເຂົ້າໃນການຊ່ວຍເຫຼືອສັງຄົມ ໂດຍສະເພາະແມ່ນບັນຫາການຂາດ ແຄນເລືອດສຳລັບຜູ້ປ່ວຍຢູ່ບັນດາໂຮງໝໍ, ສຸກສາລາຕ່າງໆໃນຂອບເຂດທົ່ວປະເທດ ເວົ້າສະເພາະແຂວງວຽງຈັນ; ເຂົ້າຮ່ວມພິທີໃນຄັ້ງນີ້ໂດຍ ພັທ ຈະເລີນ ເລີດມຸງຄຸນ ຮອງຫົວໜ້າກອງບັນຊາການ ປກສ ແຂວງ, ມີ ທ່ານ ບຸນນຳ ວົງທະຈັກ ຮອງຫົວໜ້າອົງການກາແດງແຂວງວຽງຈັນ, ມີພະນັກງານ-ນັກຮົບບັນດາຫ້ອງ, ກອງພັນ, ຄ້າຍຄຸມຂັງ-ດັດສ້າງເຂົ້າຮ່ວມບໍລິຈາກເລືອດ.
ທ່ານ ບຸນນຳ ວົງທະຈັກ ໄດ້ເລົ່າປະຫວັດຄວາມເປັນມາຂອງສູນເລືອດແຂວງວຽງຈັນ ແລະ ຄວາມໝາຍຄວາມສຳຄັນຂອງເລືອດ, ເລືອດມີຄວາມສຳຄັນສຳລັບມະນຸດເຮົາ ເພາະເລືອດແມ່ນບໍ່ສາມາດຜະລິດໄດ້. ສະນັ້ນ, ທາງອົງການກາແດງລາວ ຈຶ່ງຕັ້ງສູນບໍລິຈາກເລືອດເພື່ອສັງຄົມ ໃນປີຜ່ານມາອົງການກາແດງແຂວງພວກເຮົາ ສາມາດເຄື່ອນໄຫວຮັບບໍລິຈາກເລືອດທັງສູນໃນ ແລະ ສູນນອກ ໄດ້ 2.975 ຖົງ ສາມາດຈ່າຍເລືອດໃຫ້ ຄົນເຈັບຈຳນວນ 715 ຖົງ ຈໍານວນທີ່ ເຫຼືອແມ່ນສົ່ງສູນເລືອດແຫ່ງຊາດ ແລະ ບັນດາໂຮງໝໍອື່ນໆ ແລະ ແຜນການປີ 2018 ວາງຕົວເລກຄາດໝາຍ 2.400 ຖົງ; ໃນນີ້, ມີພະນັກງານ-ນັກຮົບກອງບັນຊາການ ປກສ ແຂວງ ຮ່ວມສະໝັກ ໃຈບໍລິຈາກ 13 ຄົນ ຍິງ 2 ຄົນ.
ຕອນທ້າຍພິທີ, ທ່ານຮອງຫົວໜ້າອົງການກາແດງແຂວງ ໄດ້ກ່າວຄຳຂອບໃຈທາງຄະນະພັກ, ຄະນະບັນຊາທີ່ເຫັນໄດ້ຄວາມສຳຄັນຂອງພິທີໃນຄັ້ງນີ້ ພິເສດແມ່ນໄດ້ກ່າວຄຳຂອບໃຈນຳພະນັກງານ-ນັກຮົບຜູ້ທີ່ສະໝັກໃຈບໍລິຈາກເລືອດໃນຄັ້ງນີ້ຕື່ມອີກ.
