1 ປີຜ່ານມາ, ຊາວໜຸ່ມກອງຄຸ້ມຄອງພາຫະນະ ແລະ ການຂັບຂີ່ ນະຄອນຫຼວງວຽງຈັນ ສາມາດໃຫ້ບໍລິການດ້ວຍການຂຶ້ນທະບຽນລົດ ໄດ້ເກືອບ 29.000 ຄັນ ແລະ ສາມາດປ່ຽນໃບຂັບຂີ່ປະເພດຕ່າງໆ ໄດ້ເກືອບ 14.000 ໃບ.
ທ່ານ ນາງ ສຸລິນທອນ ສິງທິພານີ ເລຂາໜ່ວຍຊາວໜຸ່ມຮາກຖານ ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫຼວງວຽງຈັນ
ກ່າວໃນກອງປະຊຸມສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງ ໜ່ວຍຊາວໜຸ່ມ ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫຼວງວຽງຈັນ ທີ່ຈັດຂຶ້ນໃນທ້າຍເດືອນມັງກອນ ຜ່ານມາ ວ່າ:
ໄລຍະຜ່ານມາ, ສະມາຊິກຊາວໜຸ່ມກອງຄຸ້ມຄອງພາຫະນະ ແລະ ການຂັບຂີ່ ນະຄອນຫຼວງວຽງຈັນ ສາມາດປະຕິບັດໜ້າທີ່ວຽກງານວິຊາສະເພາະຂອງຕົນຢ່າງມີຄວາມຫ້າວຫັນ ແລະ ມີຄວາມຮັບຜິດຊອບສູງ ເຊິ່ງມັນສະແດງອອກໃນໜ້າທີ່ວຽກງານຕົວຈິງ ເຊັ່ນ: ໃນປີ 2018, ສະມາຊິກຊາວໜຸ່ມ ສາມາດຂຶ້ນທະບຽນລົດ ໄດ້ທັງໝົດ 28.922 ຄັນ;
ໃນນັ້ນ, ເປັນລົດເກົ່າ 17.059 ຄັນ, ຍົກຍ້າຍອອກ 1.029 ຄັນ; ນອກຈາກນີ້, ຍັງສາມາດສອບເສັງໃບຂັບຂີ່ ໄດ້ທັງໝົດ 3.005 ເທື່ອຄົນ, ປ່ຽນໃບຂັບຂີ່ປະເພດຕ່າງໆ ໄດ້ທັງໝົດ 13.899 ໃບ, ພິມໃບຂັບຂີ່ຖາວອນ ໄດ້ທັງໝົດ 16.933 ໃບ ແລະ ຍົກຍ້າຍສໍານວນໄປຕ່າງແຂວງ ຈໍານວນ 64 ຊຸດ.
ໃນຕໍ່ໜ້າ, ໜ່ວຍຊາວໜຸ່ມ ຈະສືບຕໍ່ຊີ້ນໍາ-ນໍາພາສະມາຊິກ ເອົາໃຈໃສ່ບໍລິການຂຶ້ນທະບຽນລົດໃຫ້ແກ່ລູກຄ້າ ດ້ວຍຄວາມຮັບຜິດຊອບສູງ ໂດຍຖືເອົາການບໍລິການຮັບໃຊ້ປະຊາຊົນ ເປັນບັນຫາສໍາຄັນ ເພື່ອຮັບປະກັນໃຫ້ແກ່ການບໍລິການຂອງ ກອງຄຸ້ມຄອງພາຫະນະ ແລະ ການຂັບຂີ່ ມີຄຸນນະພາບດີຂຶ້ນເປັນກ້າວໆ; ນອກນີ້, ຍັງຈະສືບຕໍ່ສິດສອນ ແລະ ສອບເສັງໃບຂັບຂີ່ໃຫ້ແກ່ພໍ່-ແມ່ປະຊາຊົນ ແລະ ປ່ຽນໃບຂັບຂີ່ປະເພດຕ່າງໆທີ່ເຫັນວ່າ ໝົດອາຍຸການໃຊ້ງານ, ຈີກຂາດ ຫຼື ໃບຂັບຂີ່ເສຍ ໃຫ້ທັນຕາມກໍານົດເວລາ.
