ພິທີເຊັນບົດບັນທຶກຄວາມເຂົ້າໃຈ ລະຫວ່າງ ກະຊວງສຶກສາທິການ ແລະ ກິລາ ຕາງໜ້າໂດຍ ພະແນກສຶກສາທິການ ແລະ ກິລາ ແຂວງຊຽງຂວາງ ແລະ ມູນນິທິໂລນບັບຟາໂລ ໃນອາທິດຜ່ານມາ, ຢູ່ພະແນກສຶກສາທິການ ແລະ ກິລາ ແຂວງຊຽງຂວາງ ກ່ຽວກັບ ໂຄງການສ້າງໂອກາດໃຫ້ແກ່ຊາວໜຸ່ມ ໂດຍຜ່ານການຈັດການຮຽນ-ການສອນພາສາອັງກິດ.
ທ່ານ ຄຳໝັ້ນ ແສງທຸມມີ ອຳນວຍການສູນພາສາອັງກິດໂລນບັບຟາໂລ ໄດ້ລາຍງານແຜນການຈັດຕັ້ງປະຕິບັດຂອງໂຄງການໃຫ້ຮູ້ວ່າ:
ໂຄງການດັ່ງກ່າວ ໄດ້ຮັບທຶນຊ່ວຍເຫຼືອຫຼັກ ໂດຍມູນນິທິໂລນບັບຟາໂລ, ທຶນສຳຮອງໂດຍສະຖານເອກອັກຄະລັດຖະທູດ ແຫ່ງ ສະຫະລັດອາເມລິກາ ປະຈຳ ສປປ ລາວ, ເອກອັກຄະລັດຖະທູດ ແຫ່ງ ລາຊະອານາຈັກອັງກິດ ປະຈຳ ສປປ ລາວ, ໂຮງຮຽນນາໆຊາດປັນຍາທິບ, ອົງການທ່ອງທ່ຽວນາກາຮັດ, ອົງການທ່ອງທ່ຽວເອັກສ໌ໂອ (XO), ອົງການເກັບກູ້ລະເບີດແມັກ ສປປ ລາວ ແລະ ອົງການອື່ນໆ; ເຊິ່ງໄດ້ເລີ່ມຈັດຕັ້ງໂຄງການ ແຕ່ເດືອນກຸມພາ 2019 ເຖິງ ເດືອນກຸມພາ 2021 ແລະ ຈະນຳໃຊ້ງົບປະມານທັງໝົດ 266.150 ໂດລາສະຫະລັດ.
ຈຸດປະສົງ, ກໍເພື່ອຍົກລະດັບທັກສະພາສາອັງກິດທົ່ວໄປ ໃຫ້ກັບຊາວໜຸ່ມໃນເຂດຕົວເມືອງ, ຊ່ວຍຍົກລະດັບຫຼັກວິທີການສອນພາສາອັງກິດ ໃຫ້ຄູສອນທີ່ສອນໃນມູນນິທິ ແລະ ຄູຝຶກສອນ, ຊ່ວຍສອນພາສາອັງກິດໃຫ້ພາກເອກະຊົນ ໂດຍການສ້າງຄວາມອາດສາມາດ, ຮັບປະກັນໃຫ້ນັກຮຽນຍິງ ມີໂອກາດເຂົ້າເຖິງການສຶກສາ ແລະ ສັງຄົມ ເທົ່າທຽມກັບນັກຮຽນຊາຍ, ຊຸກຍູ້ໃຫ້ນັກຮຽນເຂົ້າຮ່ວມກິດຈະກຳກິລາ ເພື່ອເປັນການສົ່ງເສີມການມີສຸຂະພາບ ເພື່ອຕ້ານບັນຫາຢາເສບຕິດ ແລະ ພຶດຕິກຳຕໍ່ສັງຄົມ, ກະຕຸກຊຸກຍູ້ນັກຮຽນເຂົ້າຮ່ວມເຮັດກິດຈະກຳທີ່ເປັນແນວຄິດສ້າງສັນ ເພື່ອສົ່ງເສີມໃຫ້ການປະພຶດຕົວດີໃນສັງຄົມ ແລະ ຊຸມຊົນ, ຊ່ວຍນັກຮຽນກຽມພ້ອມເຂົ້າຮຽນໂຮງຮຽນວິຊາຊີບ, ວິທະຍາໄລ ຫຼື ມະຫາວິທະຍາໄລ, ພັດທະນາພື້ນຖານທາງດ້ານທຸລະກິດ ແລະ ທັກສະຄວາມເປັນຜູ້ນຳໃຫ້ແກ່ນັກຮຽນ.
ທ່ານ ບົວລີ ພັນນາວົງ ຫົວໜ້າພະແນກສຶກສາທິການ ແລະ ກິລາ ແຂວງ ກໍໄດ້ມີຄຳຄິດເຫັນ ເຊິ່ງທ່ານໄດ້ເນັ້ນໃຫ້ສົ່ງລາຍງານການຈັດຕັ້ງປະຕິບັດຢ່າງເຂັ້ມງວດ, ບັນດາເປົ້າໝາຍຫຼັກ ແມ່ນເໝາະສົມກັບການພັດທະນາຊັບພະຍາກອນມະນຸດ, ສ້າງໂອກາດໃຫ້ຜູ້ດ້ອຍໂອກາດໄດ້ພັດທະນາ, ເຂັ້ມງວດຕໍ່ລະບຽບກົດໝາຍ.
ພິທີເຊັນບົດບັນທຶກຄວາມເຂົ້າໃຈຄັ້ງນີ້, ມີຕາງໜ້າກະຊວງສຶກສາທິການ ແລະ ກິລາ ໂດຍ ທ່ານ ບົວລີ ພັນນາວົງ ຫົວໜ້າພະແນກສຶກສາທິການ ແລະ ກິລາແຂວງ ແລະ ທ່ານ ມາກ ສະເຕດແມນ (Mark Steadman) ຫົວໜ້າມູນິທິໂລນບັບຟາໂລ ປະຈຳ ສປປ ລາວ.