ທ່ານ ວະລາດິເມຍ ປູຕິນ ປະທານາທິບໍດີຂອງລັດເຊຍ ກ່າວປາໄສ ແລະ ຖະແຫຼງນະໂຍບາຍປະຈຳປີ ໃນວັນທີ 20 ກຸມພາ ນີ້ວ່າ: ລັດຖະບານລັດເຊຍ ຈະປັບປຸງສະພາບການດຳລົງຊີວິດຂອງປະຊາຊົນໃຫ້ດີຂຶ້ນ ໃນຂະນະທີ່ ທ່ານ ວະລາດີເມຍ ປູຕິນ ກຳລັງມີຄະແນນນິຍົມຫຼຸດລົງ.
ທ່ານ ວະລາດິເມຍ ປູຕິນ ເຊິ່ງໄດ້ຮັບການເລືອກຕັ້ງໃຫ້ດຳລົງຕຳແໜ່ງປະທານາທິບໍດີເປັນສະໄໝທີ່ 4 ໃນປີ 2018 ດ້ວຍຄະແນນສຽງສ່ວນຫຼາຍເຖິງ 76%. ໃນການກ່າວປາໄສປະຈຳປີຕໍ່ສະພາລັດເຊຍ ຄັ້ງນີ້, ທ່ານໄດ້ກ່າວເຖິງນະໂຍບາຍໃໝ່ໆໃນດ້ານຕ່າງໆ ເນື່ອງຈາກວ່າ ສະພາບການດຳລົງຊີວິດຂອງປະຊາຊົນມີບັນຫາຫຼາຍດ້ານ ໂດຍສະເພາະປະຊາົຊນທີ່ອາໄສຢູ່ໃນນະຄອນຫຼວງມົດສະກູ. ທ່ານ ປູຕິນ ກ່າວຢູ່ໃນກອງປະຊຸມ ສະພາ ວ່າ: ລັດຖະບານ ຈະຕ້ອງໄດ້ມີການປັບປຸງປ່ຽນແປງໃຫ້ສະພາບການເປັນຢູ່ຂອງປະຊາຊົນດີຂຶ້ນ ໂດຍພາຍໃນປີນີ້ ຊາວລັດເຊຍ ຈະຮູ້ສຶກໄດ້ເຖິງຄວາມປ່ຽນແປງທີ່ດີຂຶ້ນ, ເຊິ່ງມາດຕະການປັບປຸງຄວາມເປັນຢູ່ນັ້ນ ລວມເຖິງສິດ ແລະ ຜົນປະໂຫຍດຕໍ່ກັບເດັກນ້ອຍທີ່ເກີດໃໝ່ ແລະ ການຫຼຸດພາສີ ສຳລັບຄອບຄົວທີ່ມີຂະໜາດໃຫຍ່ນຳອີກ.
ທ່ານ ປູຕິນ ກ່າວອີກວ່າ: ລັດຖະບານ ໄດ້ດຳເນີນການ ແລະ ຈະດຳເນີນການທຸກຢ່າງເພື່ອເພີ່ມຄວາມເຂັ້ມແຂງໃຫ້ກັບຄຸນຄ່າຂອງຄອບຄົວ ແລະ ລາຍໄດຂອງຄອບຄົວຂອງປະຊາຊົນລັດເຊຍ ຈະຕ້ອງເພີ່ມຂຶ້ນຢ່າງແນ່ນອນ.
