ອົງການອຸຕຸນິຍົມ ຂອງ ອົງການສະຫະປະຊາຊາດ ໄດ້ເຕືອນວ່າ: ປາກົດການເອວນິນໂຢ ຈະເກີດຂຶ້ນໃນອີກບໍ່ເທົ່າໃດເດືອນຂ້າງໜ້ານີ້, ຈຶ່ງຮຽກຮ້ອງປະຊາຊົນຂອງໂລກ ກະກຽມຮັບມືກັບສະພາບອາກາດທີ່ຈະຮ້ອນຂຶ້ນຫຼາຍກວ່າເກົ່າ.
ສຳນັກຂ່າວຕ່າງປະເທດ ລາຍງານຈາກນະຄອນເຊີແນວ ປະເທດສະວິດສ໌ ໃນວັນທີ 3 ພຶດສະພາ ວ່າ:
ອົງການອຸຕຸນິຍົມວິທະຍາໂລກ (WMO) ເຊິ່ງເປັນໜຶ່ງໃນອົງການສະເພາະຂອງ ອົງການສະຫະປະຊາຊາດ (ສປຊ) ໄດ້ເຜີຍແຜ່ບົດລາຍງານການຄາດຄະເນທ່າອ່ຽງທີ່ໂລກຈະປະເຊີນກັບ ປາກົດການເອວນິນໂຢ ໃນເດືອນກໍລະກົດນີ້ ຢູ່ທີ່ປະມານ 60% ແລະ ຄາດວ່າຄວາມເປັນໄປໄດ້ຈະເກີດເອວນິນໂຢ ໃນເດືອນກັນຍາ ມີປະມານ 70%-80%; ເຊິ່ງປາກົດການດັ່ງກ່າວ ຈະສ້າງຄວາມປ່ຽນແປງຄັ້ງສຳຄັນຕໍ່ຮູບແບບສະພາບອາກາດ ໃນທົ່ວໂລກ.
ໂລກໄດ້ປະສົບກັບ ປາກົດການເອວນິນໂຢ ຄັ້ງຫຼ້າສຸດ ໃນລະຫວ່າງປີ 2018 ຫາ 2019, ອີງຕາມບັນທຶກຢ່າງເປັນທາງການຂອງ WMO; ໃນຂະນະທີ່ ຕັ້ງແຕ່ປີ 2020 ຈົນເຖິງຕົ້ນປີນີ້, ໂລກປະເຊີນກັບ ປາກົດການລານິນຢາ (ອຸນຫະພູມໜ້ານ້ຳທະເລ ບໍລິເວນເສັ້ນສູນສູດ ໃນມະຫາສະໝຸດປາຊີຟິກກາງ ແລະ ຕາເວັນອອກ ມີຄ່າຕ່ຳກວ່າປົກກະຕິ).
ແນວໃດກໍຕາມ, ໃນໄລຍະ 8 ປີທີ່ຜ່ານມາ ແມ່ນປີທີ່ອຸນຫະພູມສະເລ່ຍຂອງໂລກຮ້ອນຂຶ້ນ ແລະ ມີການທໍາລາຍສະຖິຕິຢ່າງຕໍ່ເນື່ອງ ເຖິງວ່າຢູ່ໃນທ່າມກາງປາກົດການລານິນຢາ; ເຊິ່ງມີການສຳຫຼວດ ແລະ ປະເມີນວ່າ ຖ້າບໍ່ມີປາກົດການດັ່ງກ່າວ (ລານິນຢາ) ເກີດຂຶ້ນ, ອຸນຫະພູມຂອງໂລກອາດຈະຮ້ອນຂຶ້ນອີກ ໃນຕະຫຼອດໄລຍະເວລາດັ່ງກ່າວ.
ລາຍງານຂອງ WMO ໃຫ້ຮູ້ຕື່ມວ່າ:
ເຖິງວ່າໃນປັດຈຸບັນ ຍັງບໍ່ທັນສະຫຼຸບສະເພາະໄດ້ກ່ຽວກັບຄວາມຮຸນແຮງ ແລະ ໄລຍະເວລາຂອງປາກົດການເອວນິນໂຢຮອບໃໝ່ທີ່ຈະມາເຖິງ, ແຕ່ທຸກຂະແໜງການໃນໂລກ ຕ້ອງຮ່ວມມືກັນເພື່ອກະກຽມຮັບມືກັບອຸນຫະພູມທີ່ຈະເພີ່ມຂຶ້ນ.
ເຊິ່ງເອວນິນໂຢທີ່ເກີດຂຶ້ນ ໃນລະຫວ່າງ 2018-2019 ແມ່ນເບົາບາງຫຼາຍ ຕາມການວິເຄາະຂອງ WMO, ແຕ່ເອວນິນໂຢທີ່ເກີດຂຶ້ນ ໃນລະຫວ່າງປີ 2014-2016 ແມ່ນຄັ້ງທີ່ຮ້າຍແຮງທີ່ສຸດໃນໂລກ, ເຮັດໃຫ້ປີ 2016 ເປັນປີທີ່ຮ້ອນທີ່ສຸດໃນໂລກ, ແຕ່ຄວາມເສຍຫາຍຫຼັກຂອງສິ່ງແວດລ້ອມທີ່ເກີດຈາກມະນຸດ ຍັງເປັນປັດໄຈສໍາຄັນ.
ທັງນີ້, WMO ລະບຸວ່າ: ຜົນກະທົບຂອງປາກົດການເອວນິນໂຢໃນປີນີ້ ຈະບໍ່ເກີດຂຶ້ນໃນທັນທີ, ເຊິ່ງໝາຍຄວາມວ່າ ມັນຈະເລີ່ມຕົ້ນມີຜົນກະທົບຫຼາຍຢ່າງທີ່ຊັດເຈນ ນັບຕັ້ງແຕ່ປີ 2024 ເປັນຕົ້ນໄປ.