ກອງບັນຊາການ ປກສ ແຂວງສະຫວັນນະເຂດ ເປີດຝຶກອົບຮົມ ວຽກງານກໍ່ສ້າງຮາກຖານການເມືອງ ໃນອາທິດຜ່ານມາ, ເປັນປະທານໂດຍ ພັອ ຄຳພົນ ສີຫາປັນຍາ ເລຂາຄະນະພັກ ຫົວໜ້າກອງບັນຊາການ ປກສ ແຂວງສະຫວັນນະເຂດ, ມີ ຄະນະຫ້ອງອ້ອມຂ້າງ, ກອງພັນເຄື່ອນທີ່, ໂຮງຮຽນ ປກສ ຊັ້ນກາງ ເລກ 2, ປກສ ເມືອງ-ນະຄອນ, ແຂກຮັບເຊີນ ແລະ ພະນັກງານກໍ່ສ້າງຮາກຖານ ເຂົ້າຮ່ວມ.
ພັອ ຄຳພົນ ສີຫາປັນຍາ ກ່າວເປີດກອງປະຊຸມ ວ່າ:
ການຝຶກອົບຮົມຄັ້ງນີ້ ຈະເຮັດໃຫ້ຜູ້ເຂົ້າຮ່ວມ ໄດ້ຮັບຮູ້ ແລະ ເຊື່ອມຊຶມ ເພື່ອຍົກສູງຄວາມຮູ້, ສະຕິຄວາມຕື່ນຕົວເປັນເຈົ້າການຄວາມຮັບຜິດຊອບຂອງຄະນະພັກ, ອຳນາດການປົກຄອງທຸກຂັ້ນ, ຂະແໜ່ງການຢູ່ທ້ອງຖິ່ນ ແລະ ປະຊາຊົນບັນດາເຜົ່າ ໃນວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ເພີ່ມທະວີຂະບວນການປຸກລະດົມຂົນຂວາຍປະຊາຊົນ, ສ້າງສະຕິຊາດ ແລະ ເຄົາລົບລະບຽບກົດໝາຍໃຫ້ບັນດາຊັ້ນຄົນຕ່າງໆ, ເພື່ອນຳເອົາເນື້ອໃນມະຕິກອງປະຊຸມໃຫຍ່ ຄັ້ງທີ X ສູນກາງພັກ ແລະ ຄັ້ງທີ VIII ຂອງອົງຄະນະພັກແຂວງ ແລະ ຈັດຕັ້ງຜັນຂະຫຍາຍເນື້ອໃນກອງປະຊຸມໃຫຍ່ ຄັ້ງທີ II ຂອງຄະນະພັກກອງບັນຊາການ ປກສ ແຂວງ, ຫັນເອົາກຳລັງປ້ອງກັນຄວາມສະຫງົບແຂວງ ແລະ ເມືອງ ລົງສູ່ຮາກຖານ ເພື່ອເຜີຍແຜ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດ ເວົ້າລວມ, ເວົ້າສະເພາະ ແນວທາງປ້ອງກັນຊາດ-ປ້ອງກັນຄວາມສະຫງົບ.
ໃນພິທີ, ຄະນະກອງບັນຊາການ ໄດ້ຜັດປ່ຽນກັນຜ່ານບັນດາເນື້ອໃນເອກະສານທີ່ສໍາຄັນຄື: ເອກະສານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ, ດຳລັດ 348/ລບ ວ່າດ້ວຍ ມາດຕະຖານພົ້ນທຸກ ແລະ ມາດຕະຖານພັດທະນາ, ຄຳສັ່ງ 1526/ປກສ ວ່າດ້ວຍ ການເພີ່ມທະວີວຽກງານກໍ່ສ້າງຮາກຖານການເມືອງ ໃນກຳລັງປ້ອງກັນຄວາມສະຫງົບ ແລະ ແຜນການລົງກໍ່ສ້າງຮາກຖານການເມືອງ ຕິດພັນກັບ ການແກ້ໄຂຄວາມບໍ່ສະຫງົບ ຢູ່ໃນບັນດາເມືອງ ປະຈຳປີ 2019.