ເມື່ອເຈົ້າໜ້າທີ່ ໄດ້ຕີລາຄາຄວາມຮຸນແຮງຂອງຄະດີທ່ີເກີດຂຶ້ນ, ພັທ ຫງວຽນ ດຶກມິ້ງ ຮອງຫົວໜ້າຕຳຫຼວດກຸ່ມ ໄດ້ຊີ້ນຳກຳລັງຕຳຫຼວດອາຍາ ເລັ່ງໃຫ້ຜູ້ເສຍຫາຍໄປກວດສຸຂະພາບດ່ວນ, ພ້ອມທັງເກັບກຳຮ່ອງຮອຍຫຼັກຖານ, ພ້ອມດຽວກັນນັ້ນ ກໍເລັ່ງຕິດຕາມຈັບກຸມຕົວຜູ້ກໍ່ເຫດ ໂດຍທັນທີ.
ເຖິງເວລາ 17:00 ໂມງ ຂອງວັນດຽວກັນ, ຫ້ອງການຕຳຫຼວດ ເຂດເກົ່າເຢີຍ ໄດ້ເຂົ້າຈັບຕົວ ທ້າວ ກວ້າງ ໃນຂະນະທີ່ຜູ້ກ່ຽວກຳລັງກຽມເຄື່ອງໂຕນໜີໄປ ແຂວງດົ່ງນາຍ; ເຈົ້າໜ້າທີ່ ໄດ້ເຂົ້າກວດຄົ້ນສະຖານທີ່ພັກເຊົາຂອງຜູ້ກ່ຽວ ສາມາດກວດພົບສຳເນົາເອກະສານສະເໜີເຂົ້າເຮັດວຽກ ຂອງຜູ້ຍິງອີກຈຳນວນຫຼາຍສະບັບ ແລະ ຈຳນວນເອກະສານດັ່ງກ່າວນີ້ ຈະແມ່ນຂອງບັນດາເຫຍື່ອທີ່ຖືກລໍ້ລວງຂອງຜູ້ກ່ຽວ ຫຼື ບໍ່ນັ້ນ, ທາງເຈົ້າໜ້າທີ່ຕຳຫຼວດ ກຳລັງສືບສວນ-ສອບສວນເປີດກວ້າງຕໍ່ໄປ ເພື່ອຄົ້ນຫາຕົ້ນປາຍສາເຫດ.
ຕາມການເປີດເຜີຍຂອງ ພັທ ຫງວຽນ ດຶກມິ້ງ ທ່ານໃຫ້ຮູ້ຕື່ມວ່າ:
ຈາກເຫດການທີ່ເກີດຂຶ້ນ ດັ່ງທີ່ກ່າວມາຂ້າງເທິງ, ມັນໄດ້ເປັນບົດຮຽນອັນລ້ຳຄ່າໃຫ້ກັບສັງຄົມ ໂດຍສະເພາະແມ່ນ ບັນດາຍິງສາວທີ່ຍັງໜຸ່ມນ້ອຍ ຫຼັງຈາກທີ່ຮຽນຈົບວິຊາສະເພາະແລ້ວ ຕ້ອງການເຂົ້າເຮັດວຽກຕາມບັນດາບໍລິສັດ, ໂຮງຈັກໂຮງງານ ຫຼື ຕາມສາຂາທຸລະກິດຕ່າງໆ ເພາະວ່າຍັງມີບຸກຄົນທີ່ມີແນວຄິດສວຍໃຊ້ ຄວາມຕ້ອງການຢາກເຂົ້າເຮັດວຽກຂອງບັນດາຍິງສາວ ເປັນເຄື່ອງມືລະບາຍອາລົມ ເພື່ອແລກກັບຄວາມຕ້ອງການໃນໜ້າທີ່ວຽກງານນັ້ນ ແລະ ນອກນີ້, ຍັງມີເປົ້າໝາຍທີ່ໃຊ້ເລ່ລ່ຽມຕົວະຍົວະຫຼອກລວງເອົາຊັບສິນ-ເງິນຄຳ ນຳອີກ.
ເຊິ່ງກ່ອນໜ້ານີ້, ກໍເກີດເຫດການໃນລັກສະນະແບບນີ້ຂຶ້ນ ທີ່ເຂດບາດິ່ງ, ເຈົ້າໜ້າທີ່ຕຳຫຼວດ ເຂດບາດິ່ງ ໄດ້ເຂົ້າຈັບກຸມຕົວ ທ້າວ ບຸ່ຍຢຸຍຢວນ ອາຍຸ 24 ປີ ເຊິ່ງເປັນຄົນຄົ້ນຄິດສ້າງຕັ້ງ ບໍລິສັດ ອານທິ້ງ, ໂດຍເຊົ່າຫ້ອງທີ່ຖະໜົນເບືອຍ ເພື່ອຫຼອກລວງບັນດາຍິງສາວ ດ້ວຍວິທີຮັບພະນັກງານບັນຊີ-ການເງິນ.
ເມື່ອມີບັນດາຍິງສາວ ມາສະໝັກວຽກນຳຜູ້ກ່ຽວທີ່ຫ້ອງການ, ຜູ້ກ່ຽວແມ່ນຈະຮັບທັນທີ ແລ້ວຮຽກຮ້ອງໃຫ້ໄປເຮັດວຽກນຳ. ຈາກນັ້ນ, ແມ່ນໃຊ້ເລ່ລ່ຽມຕົວະເອົາຍິງສາວນັ້ນ ເຂົ້າເຮືອນພັກ ເພື່ອລວນລາມ ແລະ ຂົ່ມຂືນ.
ເພື່ອເປັນການຂົ່ມຂູ່ຜູ້ເສຍຫາຍ ທ້າວ ຢວນ ແມ່ນໃຊ້ໂທລະສັບຖ່າຍຄຼິບວິດີໂອ ໃນຂະນະທີ່ມີຫຍັງກັນໄວ້, ຖ້າຫາກລາຍງານເຈົ້າໜ້າທີ່ ຈະນຳຄຼິບດັ່ງກ່າວອອກເຜີຍແຜ່ເທິງສື່ອອນລາຍ ໃນທັນທີ. ພາຍໃນໄລຍະເວລາບໍ່ເຖິງເຄິ່ງເດືອນ, ທ້າວ ຢວນ ແມ່ນໄດ້ໃຊ້ຮູບການດັ່ງກ່າວຫຼອກລວງຍິງສາວ ໄດ້ເຖິງ 4 ຄົນ.
ນອກຈາກເຫດການນີ້ແລ້ວ, ທີ່ນະຄອນຫາຍຟ່ອງ ເຈົ້າໜ້າທີ່ຕຳຫຼວດ ກໍໄດ້ເຂົ້າຈັບຕົວ ທ້າວ ຟ້າມເຖຫົ່ວ ອາຍຸ 39 ປີ ຢູ່ເມືອງອານເຢືອງ ແຂວງຫາຍຟ່ອງ, ຜູ້ກ່ຽວແມ່ນໃຊ້ຮູບແບບການເຂົ້າອິນເຕີເນັດ ແລ້ວຊອກຫາຂໍ້ມູນຂອງບັນດາຍິງສາວທີ່ຫາກໍຮຽນຈົບວິຊາຊີບ ແລ້ວຕ້ອງການວຽກເຮັດ ຜູ້ກ່ຽວຈະໂທລະສັບຕົວະເອົາຍິງສາວທີ່ຕ້ອງການເຂົ້າເຮັດວຽກນັ້ນມາພົບ ເພື່ອເຮັດການສຳພາດເຂົ້າວຽກ, ເມື່ອຜູ້ຖືກເຄາະຮ້າຍມາເຖິງສະຖານທີ່ນັດໝາຍ ຜູ້ກ່ຽວກໍໃຊ້ກຳລັງກຸມຍິງສາວ, ມັດແຂນ ແລະ ເອົາສະກັອດຕິດປາກ. ຈາກນັ້ນ, ຜູ້ກ່ຽວຈະເຮັດການຄົ້ນເອົາຊັບສິນ ພ້ອມທັງຂົ່ມຂືນ.
ນອກຈາກຮູບການຊອກຂໍ້ມູນຂອງຍິງສາວ ທີ່ຕ້ອງການຊອກວຽກເຮັດແລ້ວ, ເປົ້າໝາຍຍັງໄດ້ລົງຂໍ້ຄວາມເທິງອິນເຕີເນັດເອງ ວ່າ: ຕ້ອງການພະນັກງານ, ໃຫ້ເງິນເດືອນຈຳນວນຫຼາຍ, ຮູບການດັ່ງກ່າວນີ້ ກໍໄດ້ຮັບຄວາມສົນໃຈຈາກບັນດາຍິງສາວ ທີ່ກຳລັງຕ້ອງການມີວຽກເຮັດງານທຳ ແລະ ຍ້ອນເລ່ລ່ຽມຂອງກຸ່ມເຄື່ອນໄຫວດັ່ງກ່າວ ຈຶ່ງເຮັດໃຫ້ບັນດາຍິງສາວຕົກເປັນເຫຍື່ອແບບບໍ່ຮູ້ຕົວ.
ດັ່ງເຫດການທີ່ເກີດຂຶ້ນ ຄື: ເຈົ້າໜ້າທີ່ ໄດ້ຈັບຕົວ ທ້າວ ໂງຢຸຍແຂັງ ອາຍຸ 29 ປີ ຢູ່ຄຸ້ມຊວັນລະ ເຂດເຕິ້ຍໂຮ່ ນະຄອນຫຼວງຮ່າໂນ້ຍ.
ຜ່ານການສອບສວນຂອງ ເຈົ້າໜ້າທີ່ ຜູ້ກ່ຽວສະລະພາບວ່າ:
ໄດ້ລົງຂ່າວຮັບພະນັກງານຄາວເຕີທີ່ເຮືອນພັກ, ໃຫ້ເງິນເດືອນ 4 ລ້ານດົ່ງຕໍ່ເດືອນ, ກິນຢູ່ນຳ, ໂມງເຮັດວຽກແມ່ນມື້ລະ 4 ຊົ່ວໂມງ, ເມື່ອໄດ້ລົງໃນເຟດບຸກສ່ວນຕົວຂອງຕົນເອງ ກໍປະກົດວ່າມີຍິງສາວຫຼາຍຄົນຕິດຕໍ່ມາຫາ ເມື່ອມີການຕິດຕໍ່ໃຫ້ມາທີ່ເຮືອນພັກ ເພື່ອເຮັດການສຳພາດ ແລະ ທົດລອງເຮັດວຽກ ແລະ ສຸດທ້າຍກໍຖືກຜູ້ກ່ຽວໃຊ້ກຳລັງກຸມຂົ່ມຂືນ.
ຕາມການໃຫ້ຄຳແນະນຳຂອງ ເຈົ້າໜ້າທີ່ຕຳຫຼວດ, ບັນດາການຖືກນັດໝາຍໃຫ້ໄປພົບເພື່ອສຳພາດຕາມສະຖານທີ່ຜິດປົກກະຕິເຊັ່ນ ເຮືອນພັກ, ໂຮງແຮມ ຫຼື ຮ້ານກາເຟ… ເຊິ່ງແນ່ນອນແມ່ນຍ້ອນກົນອຸບາຍຂອງຄົນຮ້າຍ ຢ່າງແນ່ນອນ.
