ໃນວັນທີ 14 ມິຖຸນາ 2019 ໂຮງງານຜະລິດເຕັ້ນຢຸງແກ້ວ ໄດ້ມອບເຕັ້ນ ຈຳນວນ 13 ຊຸດ ລວມມູນຄ່າ 23.800.000 ກີບ ໃຫ້ມູນນິທິຊ່ວຍເຫຼືອຄົນທຸກຍາກ ແຫ່ງ ສປປ ລາວ; ມອບໂດຍ ທ່ານ ເຂັມ ເພັດເພຍພົນ ເຈົ້າຂອງໂຮງງານຜະລິດເຕັ້ນຢຸງແກ້ວ ແລະ ຮັບໂດຍ ທ່ານ ນາງ ສີສະຫຼຽວ ທຳມະເທວາ ປະທານມູນນິທິຊ່ວຍເຫຼືອຄົນທຸກຍາກ ແຫ່ງ ສປປ ລາວ, ມີນາຍບ້ານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ເຂັມເພັດ ເພຍພົນ ກ່າວວ່າ: ການມອບເຕັ້ນຈຳນວນ 13 ຊຸດ ໃນຄັ້ງນີ້ ເພື່ອເປັນການປະກອບສ່ວນເຂົ້າໃນວຽກງານຂອງມູນນິທິຊ່ວຍເຫຼືອຄົນທຸກຍາກ ແຫ່ງ ສປປ ລາວ ແລະ ເພື່ອນຳໄປປະກອບສ່ວນເຂົ້າໃນການຊ່ວຍເຫຼືອທາງດ້ານວຽກງານວິຊາສະເພາະຂອງ ມູນນິທິ ໃນເວລາອອກຮັບໃຊ້ສັງຄົມ ເປັນຕົ້ນແມ່ນນຳໃຊ້ເປັນຮົ່ມ, ບ່ອນພັກອາໄສ,ໃຊ້ເປັນບ່ອນນອນໃນທີ່ສຸກເສີນ ໃນເວລາອອກເຄື່ອນໄຫວໜ້າທີ່ວຽກງານຕ່າງໆ ຊ່ວຍເຫຼືອສັງຄົມ.
ໂຮງງານຜະລິດເຕັ້ນ ຢຸງແກ້ວ ໄດ້ເລີ່ມເປີດບໍລິການໃນປີ 1997 ທີ່ບ້ານດົງປ່າລານ ເມືອງສີສັດຕະນາກ ນະຄອນຫຼວງວຽງຈັນ, ເຊິ່ງໃນເມື່ອກ່ອນແມ່ນເປັນພຽງຮ້ານບໍລິການຫຍິບເບາະລົດຈັກ, ລົດໃຫຍ່,ໂຊຟາ, ເຕັ້ນ ແລະ ໄດ້ຮັບຄວາມນິຍົມຈາກລູກຄ້າຕະຫຼອດມາ; ຈາກນັ້ນ, ໂຮງງານຂອງພວກເຮົາຈຶ່ງໄດ້ມີການເຕີບໃຫຍ່ຂະຫຍາຍຕົວ ແລະ ໄດ້ສ້າງເປັນໂຮງ ງານຜະລິດເຕັ້ນໃຫຍ່ໃນປີ 2013 ເປັນຕົ້ນມາຈົນມາຮອດປັດຈຸບັນ.
ພ້ອມດຽວກັນນັ້ນ ທ່ານ ນາງ ສີສະຫຼຽວ ທຳມະເທວາ ປະທານ ມູນນິທິຊ່ວຍເຫຼືອຄົນທຸກຍາກ ແຫ່ງ ສປປ ລາວ ກໍໄດ້ສະແດງຄວາມຂອບອົກຂອບໃຈຕໍ່ ທ່ານ ເຂັມເພັດ ເພຍພົນ ເຈົ້າຂອງໂຮງງານຜະລິດເຕັ້ນ ຢຸງແກ້ວ ທີ່ເຫັນໄດ້ຄວາມໝາຍຄວາມສຳຄັນຂອງມູນນິທິຊ່ວຍເຫຼືອຄົນທຸກຍາກ ພ້ອມທັງຈະນຳເອົາເຄື່ອງດັ່ງກ່າວໄປໝູນໃຊ້ເຂົ້າໃນໜ້າທີ່ວຽກງານຕ່າງໆຂອງມູນນິທິໃຫ້ເກີດປະໂຫຍດສູງສຸດ ແລະ ອວຍພອນໄຊ ໃຫ້ທ່ານພ້ອມດ້ວຍຄອບຄົວ ຈົ່ງມີສຸຂະພາບແຂງແຮງທຸລະກິດຈະເລີນກ້າວໜ້າຂຶ້ນໄປເລື້ອຍໆ.