ກອງບັນຊາການ ປກສ ແຂວງອັດຕະປື ໄດ້ຈັດພິທີເຜີຍແຜ່ຄຳສັ່ງຂອງ ກະຊວງປ້ອງກັນຄວາມສະຫງົບ ວ່າດ້ວຍ ການນຳໃຊ້ສື່ສັງຄົມອອນລາຍ ແລະ ຂໍ້ຕົກລົງ ວ່າດ້ວຍ ຂໍ້ຫ້າມຕໍ່ນາຍ ແລະ ພົນຕຳຫຼວດ ໃນວັນທີ 12 ມິຖຸນາ 2019, ເພື່ອໃຫ້ ຄະນະພັກ-ຄະນະກອງບັນຊາການ, ນາຍ ແລະ ພົນຕຳຫຼວດ ທົ່ວກຳລັງປ້ອງກັນຄວາມສະຫງົບ ແຂວງ ທີ່ເຂົ້າຮ່ວມ ໄດ້ຮັບຮູ້ເນື້ອໃນດັ່ງກ່າວ ແລ້ວ ນໍາໄປຈັດຕັ້ງຜັນຂະຫຍາຍ ໃຫ້ປະກົດຜົນເປັນຈິງ.
ພົຈວ ທອງຈັນ ຈັນທະພົງ ຫົວໜ້າກອງບັນຊາການ ປກສ ແຂວງອັດຕະປື ໄດ້ຂຶ້ນເຜີຍແຜ່ຄໍາສັ່ງຂອງ ກະຊວງ ປກສ ວ່າດ້ວຍ ການນໍາໃຊ້ສື່ສັງຄົມອອນລາຍ ໃນກຳລັງປ້ອງກັນຄວາມສະຫງົບ ໂດຍໃນນີ້ປະກອບມີ:
ຫ້າມນາຍ ແລະ ພົນຕຳຫຼວດ ຕົວະຍົວະ, ຫຼອກລວງ, ໂຄສະນາບິດເບືອນ, ໃສ່ຮ້າຍປ້າຍສີ, ສ້າງຄວາມປັ່ນປ່ວນ, ສ້າງຄວາມຂັດແຍ່ງ, ກໍ່ຄວາມເສຍຫາຍຕໍ່ບົດບາດ ແລະ ອິດທິພົນຂອງ ກຳລັງປ້ອງກັນຄວາມສະຫງົບ ແລະ ພໍ່-ແມ່ປະຊາຊົນລາວບັນດາເຜົ່າ.
ຫ້າມນາຍ ແລະ ພົນຕຳຫຼວດ ຖ່າຍຮູບນຸ່ງເຄື່ອງແບບຕິດຊັ້ນ, ປະກອບອາວຸດເຕັກນິກຕ່າງໆ, ໂພສລົງ, ກົດໄລ້, ກົດແຊ, ຕັດຕໍ່, ເສີມແຕ່ງຮູບພາບ, ມີຄຳຄິດ-ຄຳເຫັນລັກສະນະບໍ່ສ້າງສັນ, ປັ່ນປ່ວນ, ໝິ່ນປະໝາດ, ແຕະຕ້ອງເຖິງກຽດສັກສີຂອງພັກ-ລັດ, ການຈັດຕັ້ງ, ສິດທິສ່ວນບຸກຄົນ ແລະ ແຕະຕ້ອງເຖິງຮີດຄອງປະເພນີອັນດີງາມຂອງຊາດ, ຄວາມບໍ່ເປັນລະບຽບຮຽບຮ້ອຍຢູ່ໃນສັງຄົມ ລົງໃນອິນເຕີເນັດ, ເຟດບຸກ, ວັອດແອັບ, ວີແຊັດ, ລາຍ, ອິນສະຕາແກຮມ, ທະວິດເຕີ, ຢູທູບ ແລະ ສື່ສັງຄົມອອນລາຍອື່ນໆ.
ທັງນີ້, ກໍເພື່ອຮັບປະກັນໃນການກໍານົດລະບຽບການ ແລະ ມາດຕະການ ໃນການຄຸ້ມຄອງການນໍາໃຊ້ສື່ສັງຄົມອອນລາຍ ປະເພດຕ່າງໆ, ຮັບປະກັນໃຫ້ແກ່ຄວາມສະຫງົບສຸກຂອງປະຊາດ, ຄວາມເປັນລະບຽບຮຽບຮ້ອຍໃນສັງຄົມ, ແນໃສ່ປົກປັກບົດບາດກຽດສັກສີຂອງ ກຳລັງປ້ອງກັນຄວາມສະຫງົບ, ສະມາຊິກພັກ, ພະນັກງານ-ນັກຮົບ ໃນສະເພາະໜ້າ ແລະ ຍາວນານ.
ສຳລັບຂໍ້ຕົກລົງຂອງ ທ່ານລັດຖະມົນຕີ ກະຊວງປ້ອງກັນຄວາມສະຫງົບ ສະບັບເລກທີ 564/ປກສ ລົງວັນທີ 03 ເມສາ 2019 ວ່າດ້ວຍ ຂໍ້ຫ້າມຕໍ່ນາຍ ແລະ ພົນຕຳຫຼວດ ໃນກຳລັງປ້ອງກັນຄວາມສະຫງົບ ຕໍ່ການນຳໃຊ້ສື່ສັງຄົມອອນລາຍ ລວມທັງໝົດແລ້ວປະກອບມີ 6 ໝວດ, 21 ມາດຕາ, 17 ຂໍ້ຫ້າມ, ລວມ 30 ຂໍ້ຫ້າມ ສະເພາະໃນຂົງເຂດວຽກງານການເມືອງ, 5 ຂໍ້ຫ້າມ ຂອງຄະນະກຳມະການພິຈາລະນາວິໄນ ແລະ 5 ມາດຕະການທາງວິໄນຕໍ່ຜູ້ລະເມີດ.
ການເຜີຍແຜ່ບັນດາເອກະສານໃນຄັ້ງນີ້ ກໍເພື່ອໃຫ້ກຳລັງປ້ອງກັນຄວາມສະຫງົບ ແຂວງ ໄດ້ຮັບຮູ້, ເຂົ້າໃຈ ແລະ ເຊື່ອມຊຶມຕໍ່ເອກະສານດັ່ງກ່າວ, ສາມາດຍົກສູງຄວາມຮັບຜິດຊອບຕໍ່ໜ້າທີ່ການເມືອງ, ສ້າງຄວາມເປັນເອກະພາບໃນການຈັດຕັ້ງປະຕິບັດ, ການສະກັດກັ້ນ ແລະ ແກ້ໄຂປະກົດການຫຍໍ້ທໍ້ ໃນກຳລັງປ້ອງກັນຄວາມສະຫງົບປະຊາຊົນ ເວົ້າລວມ, ເວົ້າສະເພາະ ກໍຄື ກຳລັງປ້ອງກັນຄວາມສະຫງົບ ແຂວງອັດຕະປື, ແນໃສ່ຫຼຸດຜ່ອນຫາງສຽງວິພາກ-ວິຈານຂອງສັງຄົມ ແລະ ເຮັດໃຫ້ ກຳລັງປ້ອງກັນຄວາມສະຫງົບ ມີຄວາມປອດໃສ, ເຂັ້ມແຂງ, ໜັກແໜ້ນ, ມີແບບແຜນທີ່ທັນສະໃໝ, ມີຈັນຍາບັນ, ຈັນຍາທຳ, ມີລະບຽບວິໄນເຂັ້ມງວດ ໃຫ້ສົມກັບເປັນກຳລັງປະກອບອາວຸດປະຕິວັດ ທີ່ມີຄວາມຈົງຮັກພັກດີຕໍ່ພັກ-ລັດ, ຕໍ່ປະເທດຊາດ ແລະ ປະຊາຊົນ.