ເຈົ້າໜ້າທີ່ ໜ່ວຍງານຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງໄຊເສດຖາ ນະຄອນຫຼວງວຽງຈັນ ຈັບເປົ້າໝາຍຄ້າຂາຍຢາເສບຕິດ ຄາປອມຍາມ ຢູ່ໂຮງແຮມແຫ່ງໜຶ່ງ ເຂດບ້ານພະຂາວ ເມືອງໄຊເສດຖາ, ຊື່ ທ້າວ ພຸດອຸດອນ ຫຼື ຕາມົນ ອາຍຸ 29 ປີ ຢູ່ບ້ານແສງສະຫວ່າງ ເມືອງໄຊເສດຖາ ພ້ອມຂອງກາງຢາບ້າ 600 ເມັດ ໃນວັນທີ 6 ສິງຫາ 2019.
ການມ້າງຄະດີດັ່ງກ່າວ, ໃນເບື້ອງຕົ້ນ ໃນເດືອນກໍລະກົດ 2019, ພາຍຫຼັງເຈົ້າໜ້າທີ່ ສົມທົບກັບ ປກສ ກຸ່ມ VII ລົງແກ້ໄຂຈຸດມົ້ວສຸມ ຢູ່ບ້ານດຸງ ເມືອງໄຊເສດຖາ ແລະ ຈັບຜູ້ມົ້ວສຸມໄດ້ຈຳນວນໜຶ່ງ; ຈາກການສອບສວນກຸ່ມມົ້ວສຸມດັ່ງກ່າວ ໄດ້ໃຫ້ການເປັນຄຳດຽວກັນວ່າ: ຢາບ້າທີ່ເອົາມາເສບ ແມ່ນໄດ້ຊື້ນຳ ທ້າວ ຕາມົນ ທີ່ຂາຍຢູ່ເຂດບ້ານພະຂາວ ເມືອງໄຊເສດຖາ; ສະນັ້ນ, ມາຮອດວັນທີ 6 ສິງຫາ 2019 ເວລາປະມານ 16:00 ໂມງ ຈຶ່ງໄດ້ເຂົ້າຈັບຕົວ ທ້າວ ຕາມົນ ພ້ອມຂອງກາງຢາບ້າ 3 ຖົງ ເທົ່າກັບ 600 ເມັດ ມາສອບສວນ.
ຜ່ານການສອບສວນ, ທ້າວ ພຸດອຸດອນ ຫຼື ຕາມົນ ຮັບສາລະພາບຕໍ່ເຈົ້າໜ້າທີ່ ວ່າ:
ໄດ້ເລີ່ມເຄື່ອນໄຫວເສບຢາບ້າ ມາແຕ່ປີ 2015, ຢາບ້າທີ່ເອົາມາເສບ ແມ່ນຊື້ນໍາໄວລຸ້ນຢູ່ແຖວບ້ານ, ຊື້ຄັ້ງລະ 2-3 ເມັດ ແລ້ວນຳມາເສບຢູ່ເຮືອນ ແລະ ບ່ອນເຮັດວຽກຢູ່ໂຮງແຮມແຫ່ງໜຶ່ງ ເຂດບ້ານພະຂາວ ( ເປັນຍາມ ) ແລະ ຍັງບໍ່ເຄີຍຖືກຜູ້ປົກຄອງ ຫຼື ຍາດພີ່ນ້ອງສົ່ງໄປບໍາບັດຈັກເທື່ອ.
ຕົກມາຮອດເດືອນມັງກອນ 2019, ໄດ້ຮູ້ຈັກກັບໄວລຸ້ນ ອາຍຸປະມານ 22 ປີ ຢູ່ບ້ານປາກຊາບ ເມືອງໄຊທານີ ຮູ້ຈັກກັນດ້ວຍໝູ່ຕໍ່ໝູ່, ຫຼັງຈາກນັ້ນ ກໍຮູ້ວ່າຜູ້ກ່ຽວຂາຍຢາບ້າ ຈຶ່ງໄດ້ໄປພົວພັນ ແລະ ຊື້ຢາບ້ານໍາ ຄັ້ງລະ 2-3 ເມັດ ມາເສບເປັນຈຳນວນຫຼາຍຄັ້ງ ຈົນບໍ່ສາມາດຈື່ໄດ້.
ມາເດືອນພຶດສະພາ 2019, ໄດ້ໄປພົວພັນເອົາຢາບ້ານຳຜູ້ກ່ຽວມາຂາຍ ຈາກນັ້ນປະມານ 1 ອາທິດ ຜູ້ກ່ຽວໄດ້ເອົາຢາບ້າໄປໃຫ້ຢູ່ບ່ອນເຮັດວຽກ ຈຳນວນ 20 ເມັດ ຜູ້ກ່ຽວໃຫ້ຕິດໜີ້ ໄດ້ເງິນແລ້ວຈຶ່ງຈ່າຍຕາມຫຼັງ, ເມື່ອໄດ້ຢາບ້າແລ້ວ ກໍນຳຢາບ້າໄປຂາຍໃຫ້ພວກທີ່ມົ້ວສຸມ ຄັ້ງລະ 2-5 ເມັດ ໂດຍເອົາສະຖານທີ່ເຮັດວຽກເປັນບ່ອນຂາຍຢາບ້າ ແລະ ບາງເທື່ອກໍນຳຢາບ້າມາຂາຍຢູ່ເຮືອນ; ຜ່ານມາ, ໄດ້ຮັບເອົາຢາບ້າມາຂາຍໃນຮູບການແບບຕິດໜີ້ ມາແລ້ວຫຼາຍຄັ້ງ ບໍ່ສາມາດຈື່ໄດ້.
ມາໃນເດືອນກໍລະກົດ 2019, ຜູ້ກ່ຽວ ໄດ້ເອົາຢາບ້າມາສົ່ງໃຫ້ຈຳນວນ 3 ຖົງ ເທົ່າກັບ 600 ເມັດ ຄັ້ງນີ້ນັດຈຸດຊື້-ຂາຍ ຢູ່ເຂດເສັ້ນທາງເຂດບ້ານພະຂາວ ເມື່ອໄດ້ຢາບ້າແລ້ວກໍແບ່ງຂາຍ ປະມານ 2 ອາທິດ ກໍຂາຍໝົດ; ມາວັນທີ 6 ສິງຫາ, ໄດ້ໂທລະສັບສັ່ງເອົາຢາບ້າຈຳນວນ 3 ຖົງ ມາສົ່ງໃຫ້ຕາມທີ່ນັດໝາຍ ແຕ່ຍັງບໍ່ທັນໄດ້ຂາຍເທື່ອ ກໍຖືກ ເຈົ້າໜ້າທີ່ຕຳຫຼວດ ປກສ ເມືອງໄຊເສດຖາ ກັກຕົວຄາປ້ອມຍາມ ພ້ອມທັງກວດຄົ້ນພົບຢາບ້າ 3 ຖົງ ໄປດຳເນີນຄະດີ.
